AU SUCU ena 1965, ena dua na vuvale dravudravua e Noca Ailadi. Au susu e County Derry, ena gauna a veileqaleqati tu kina na lotu Katolika kei na lotu Tawase qai yaco tiko me sivia e 30 na yabaki, e vakatokai na gauna qori me “Troubles.” E dua na wase levu ni lotu Tawase era dau vakaduiduitaki ira na lotu Katolika. Nira lewe lailai ga na Katolika, era dau beitaki nira cakacaka vakailawaki ena veika e vauca na veidigidigi, na cakacaka, veivakavaletaki, ra beca tale ga na lawa.

Au sotava e veivanua na veivakaduiduitaki kei na veika tawadodonu. Au mokulaki ena levu na gauna, vakasaurarataki meu sobu ena motoka, dodoki vei au na dakai, ra qai dau vaqaqai au na ovisa se sotia. E vakararawataki au dina qori, au mani veinanuyaka: ‘Meu cakava kina e dua na ka, se meu vosota ga!’

Ena 1972 au vakaitavi ena tayabe e vakatokai na Bloody Sunday, eratou vakananumi kina na le 14 eratou lauvana mate vei ira na sotia ni Peritania, au vakaitavi tale ga ena hunger strike, me vakananumi kina nodratou mate e 10 na kaivesu eratou vakabesebese na kana ena 1981 ni ratou tokona na matanitu ni lewenivanua. Au vakarewataka  na kuila ni Noca Ailadi a vakatabui tu ena gauna ya, vola e levu na ka ena lalaga niu sega ni taleitaka na matanitu o Peritania. Keimami dau vakaduduile ena gauna e yaco kina na veivakalolomataki se ni labati e dua na lotu Katolika. E dau tekivu ga ena tayabe, lai tini sara ina veivakamavoataki.

Ena gauna au vuli tiko kina ena univesiti, au vakaitavi ena vakaduduile me taqomaki na veikabula. Au lai vakaitavi tale ga ena tayabe e Lodoni, me kudruvaki kina na lawa e bulia na matanitu nira dau kanabuta na vutuniyau ena veika era cakava na dravudravua. Au vakaitavi ena kudruvaki ni musu ni isau ni tamata cakacaka, au tokona tale ga na tayabe a vakayacori ena 1990 ni lavaki mera saumi vakacavacava na tamata kece, vakavuna me levu na vakacaca e Trafalgar Square, na vanua ni saravanua ena loma ni siti o Lodoni.

Toso na gauna au sa bese ni tokona na vakaduduile, ni sa sega ni rawati kina na kena inaki qai vakavuna ga e levu na veicati.

Au sotavi ira sara na iVakadinadina i Jiova. Era vakaraitaka vei au mai na iVolatabu ni kauaitaka na Kalou na rarawa eda sotava, ena walia tale ga na leqa kece e vakavuna na tamata. (Aisea 65:17; Vakatakila 21:​3, 4) Se mani vakacava na sasaga ni kawatamata, ena sega ni walia rawa na veivakaduiduitaki. Ena vinakati me dusimaki keda na Kalou baleta ni tu vua na kaukaua me vakaotia na veika ca e vakavuna tu o Setani.​—⁠Jeremaia 10:23; Efeso 6:⁠12.

Au sa qai kila ni na maumau wale keu saga meu walia na veika ca e yaco tu e vuravura. Au marau niu vulica ni sa voleka ni oti na veika tawadodonu kei na veivakaduiduitaki.