Vakamacalataka mada na vuna o vakabauta kina na bula vakaidewadewa.

Au susu ena lotu Katolika, ia au lomatarotarotaka na veika me baleti koya na Kalou. Kena ivakaraitaki, e dredre meu vakabauta ni Kalou e dau vakamai ira na tamata i eli. Au vulica ena univesiti ni sega ni bulia na Kalou na ka bula kece, ia era bula mai vakaidewadewa. Au mani ciqoma na ivakavuvuli qori niu nanuma ni tiko na kena ivakadinadina. E tokona na noqu lotu na ivakavuvuli ni bula vakaidewadewa, ni vakavulica e veidusimaki kina na Kalou.

Na cava e vakavuna mo kauaitaka na iVolatabu?

A tekivu vulica na iVolatabu kei ira na iVakadinadina i Jiova na watiqu o Susana, era vakaraitaka vua mai na iVolatabu ni sega ni dau totogitaki ira na tamata i eli na Kalou. * Era vakaraitaka tale ga vua na nona yalayala me veisautaka na vuravura me parataisi. * Sa qai vakaibalebale vei au na ivakavuvuli qori! Ena 1989, a sikovi au o Nick e dua na iVakadinadina. Dua na siga keirau veitalanoataka se o cei e bulia na yagoda, au kurabuitaka ni vakamatatataki tu qori ena iVolatabu ena Iperiu 3:4, e tukuna “ni tiko o koya e tara na vale yadua, ia o koya e tara na ka kece ga na Kalou.”

E vakavuna beka mo vakabauta na ibulibuli na nomu vulica na veika me baleta na yago?

Io. Kena ivakaraitaki, dua na ka na kena tuvanaki vakamaqosa na nona vakavinakataki koya ga na yago. E va na ka e yaco e yagoda me mavo kina na mavoa. Qori e vakadeitaka  vei au ni noqu cakacaka vakavuniwai e vukea ga na veika sa tu rawa ena yago me vakavinakataki koya kina.

Vakamacalataka mada na ka e yaco nida mavoa.

Ni oti ga e vica na sekodi, ena sagai me tarovi na drodro ni dra. Na veika e yaco veitaravi e vereverea qai totolo. Kena ikuri na noda salanidra, e rauta ni 100 na udolu na kilomita na vanua e vakadrodroya kina na dra. Era na rairai qoroya na idinia era dau buli paipo na kena rawa ni bonota qai vakavinakataki koya ga na noda salanidra.

Na cava e yaco tarava?

Ena mudu na drodro ni dra ena loma ga ni vica na aua qai tekivu vuce na mavoa. E vakatubuqoroqoro na ka e yaco ena gauna qori. Kena ivakaraitaki, a vaqiqotaki e liu na salanidra me drodro kina vakalailai na dra. Ia qo sa rabailevu tale me vakalevutaka na dra e drodro ina mavoa. Ena drodrova tale ga na mavoa na wai bulabula ni yago qai vakavuna me vuce. Qori ena tarova na vuvuca ni mavoa kei na gaga, qai kauta laivi na sela mate. E gadrevi kina mera buli e milioni vakacaca na molecule kei na sela. Eso na ka e kena inaki ga me vakatotolotaka na veitaravi ni ka e yaco me mavo kina na mavoa, sa oti sara ga e kea na nodra itavi.

Na cava tale e yaco?

Ni oti e vica na siga sa na tekivu bulia na yago na veika ena vakavinakataka na mavoa, qai rawa ni taura e rua na macawa. Ena lai vakalevutaki ena mavoa na sela e bulia na kena ilati mamare, era na basika tale ga na salanidra lalai era na salava yani na mavoa mera kauta laivi na sela mate qai vakarautaka eso tale na ka bulabula me vakavinakataka na mavoa. Eso tale na ka vereverea e yaco mera buli kina na sela e nodra itavi sara ga mera sogota na mata ni mavoa.

E cakacaka levu dina! Ena qai mavo ena gauna cava?

Ena taura toka e vica na vula, ni na sagai me kaukaua tale na sui e ramusu, me sosomitaki tale ga na ilati mamare ni mavoa ena dua na ka e kaukaua cake. Na kena vakavinakataki koya ga na mavoa e ivakaraitaki vakasakiti ni nodra cakacaka vata na veika e tu e yagoda.

E dua na ka veivakurabuitaki o bau sotava?

Io. Au qarava e dua na goneyalewa yabaki 16 e coqa qai voleka ni mate ni mavoa na nona yateloa, e kacabote tale ga e loma na dra. Ena vica na yabaki sa oti, e dau caka na veisele me vakavinakataki se kau laivi na yateloa. Ia nikua, keimami sa laiva me vakavinakataki koya na yago. Au qarava ga na nona mavoa na goneyalewa, na lailai ni wai ni yagona, nona dra kei na mosi. Ena vica na macawa tarava, e laurai ni sa mavo na nona yateloa! Au kurabuitaka sara ga na sala e vakavinakataki koya kina na yago. Au sa qai vakadeitaka ga ni buli keda na Kalou.

Na cava o taleitaki ira kina na iVakadinadina i Jiova?

Au raica nira dauveikauaitaki, era sauma tale ga na noqu taro mai na iVolatabu. Au qoroya tale ga na nodra doudou ni wasea nodra vakabauta kei na nodra dau vukei ira na so tale mera kila na Kalou.

E vukea nomu cakacaka nomu sa dua na iVakadinadina i Jiova?

Io. E vukei au meu vosota na oca kei na wawale era dau vakila na vuniwai kei na nasi nira qaravi ira na tauvimate se mavoa e veisiga. Nira via veitalanoa na tauvimate, au dau vakamacalataka na nona yalayala na Dauveibuli me vakaotia na tauvimate kei na rarawa * ena vuravura ena sega ni kaya kina e dua: “Ka’u sa tauvi mate.” *