O rogoca ena nius ni dau yaco ena internet na veivakatotogani, veivakasagai tawakilikili, qai dau butakoci kina na kena itukutuku e dua. O kauai sara ena itukutuku qori, ni dau vakayagataka na internet o luvemu itabagone qai rairai sega tu ni kila na leqa e rawa ni yaco.

O rawa ni vakavulici luvemu itabagone ena ivakavakayagataki ni internet. Ia ni bera qori, mo kila mada eso na ka me baleta na internet.

E rawa nira vakayagataka na itabagone na internet ena nodra talevoni. E se yaga tiko ga me biu na kompiuta ena vanua e laurai levu e vale. Ia ke vakatalevoni se tablet (dua na mataqali kompiuta) o luvemu itabagone qai tiko kina na internet, ena levu na gauna ena vakayagataka kina, o sega tale ga ni raica na ka e cakava.

Eso na itabagone era vakalusi gauna ena internet. E kaya e dua na goneyalewa yabaki 19, “Au via wilika ga noqu imeli me lima na miniti, ia au tini sara iyaloyalo me vica vata na aua. E vinakati sara ga meu lewai au vinaka.”

Ena rairai sivia tale na itukutuku era biuta na itabagone ena internet. E rawa nira kila na tamata inaki ca na vanua e vakaitikotiko kina e dua na itabagone, vanua e vuli kina, se gauna e lala kina na vale ena itukutuku kei na itaba e biu ena internet.

Eso na itabagone era sega ni kila na revurevu ni ka era biuta ena internet. Ena sega vakadua ni yali ena internet na ka e biu kina. Kena ivakaraitaki, ena rairai raica eso na itukutuku kei na itaba e veivakamaduataki o boso ni cakacaka ni via kila eso na ka me baleti koya e vaqara cakacaka.

O na rairai kauai, ia nanuma tiko: E sega ni ca na internet. E veivakaleqai ga ke vakayagataki cala.

Vakavulici luvemu ena ka e dodonu me vakaliuca kei na vakayagataki ni gauna. Me tamata nuitaki e dua ni sa uabula, e dodonu me vulica me cakava e liu na ka e bibi duadua. Kena ivakaraitaki, na veivosaki vakavuvale, lesoni mai koronivuli, kei na cakacaka ni vale era bibi mai na vakalusi gauna ena internet. Ke o kauaitaka na levu ni gauna e vakayagataka o luvemu itabagone ena internet, mo yalana na gauna e vakayagataka kina—ke gadrevi mada ga mo tuvanaka na gauna me tekivu qai oti kina.—iVakavuvuli vakaivolatabu: Filipai 1:10.

Vakavulici luvemu me vakasama e liu. Vukei koya me taroga eso na taro va qo: E rawa beka ni vakararawataka e dua na veika au vakarau vola? Ena vakacava na kequ irogorogo ena itaba qo? Au na madua beka ke rau raica na noqu itubutubu kei na so tale na itaba se na itukutuku qo? Na cava era na rairai vakasamataka me baleti au nira raica? Na cava noqu rai me baleta e dua e biuta na itukutuku se itaba va qo?—iVakavuvuli vakaivolatabu: Vosa Vakaibalebale 22:3.

Vakavulici l uvemu me muria na ivakavuvuli kei na lawa. E sega ni rawa ni o vakaraici luvemu tu ga ena veika e cakava e veisiga. Kua ni saga mo lewa na ka kece e cakava, ia vukei koya ga me ‘vakavulica nona vakasama me vakaduiduitaka na ka e donu mai na ka e cala.’ (Iperiu 5:14) Kua ni vakabibitaka ga vua na lawa kei na totogi, vukei luvemu itabagone me yalomatua. E vinakata me vakacava na kena irogorogo? Na itovo cava e vinakata me kilai kina? E bibi mo vukei luvemu me vakatulewa vakavuku, se o mani tiko e yasana se sega.—iVakavuvuli vakaivolatabu: Vosa Vakaibalebale 3:21.

Na vakayagataki ni internet e vaka na draiva, ni vinakati kina na lewa matau—sega ni nomu kila wale ga na kena ivakavakayagataki. E bibi gona na nomu veituberi ni o dua na itubutubu. Me vaka ga e tukuna o Parry Aftab, e dauveivakasalataki ena veika me qarauni ena internet: “O ira na gone era kila e levu na ka me baleta na iyaya vovou. Ia o ira na itubutubu era sa qaseta na bula.”