‘E sega ni dau caka ca na Kalou.’—Jope 34:12.

KA ERA TUKUNA ESO

Ra kaya eso ni ka kece e yaco e inaki ga ni Kalou. Era vakabauta kina ni vakavuna tiko o koya na noda rarawa. Kena ivakaraitaki ni yaco na leqa tubukoso, era nanuma ni totogitaki ira tiko na daucaka ca na Kalou.

KA E KAYA NA IVOLATABU

E vakamatatataka na iVolatabu ni sega ni dau vakavuna noda rarawa na Kalou. Kena ivakaraitaki, e vakacala na iVolatabu noda kaya ena gauna eda vakararawataki se vakatovolei kina: “E vakatovolei au na Kalou.” Na vuna? Ni “sega ni rawa ni vakatovolei na Kalou ena ka ca, e sega tale ga ni vakatovolea e dua ena ka ca.” (Jemesa 1:13) Tukuni tiko ga e ke ni sega ni dau vakatovolei keda na Kalou se vakavuna na ka rarawa e salavata mai. Ni “na sega ni caka ca na Kalou.”—Jope 34:12.

Ke sega ni vakavuna na Kalou noda rarawa, o cei ga me beitaki kina? Se cava e vakavuna? Eda dau veivakararawataki ga vakataki keda nida sega ni uasivi. (Dauvunau 8:9) Eda na rairai sotava tale ga na leqa ena vuku ni “ka e sega ni namaki” nida tu ena vanua cala kei na gauna cala. (Dauvunau 9:11, NW) E kaya na iVolatabu ni o koya sara ga na “turaga ni vuravura qo,” o Setani na Tevoro, e vakavuna na noda rarawa, ni “lewa tiko na Vunica na vuravura taucoko.” (Joni 12:31; 1 Joni 5:19) Me beitaki ga o Setani ena noda rarawa, sega ni Kalou.

“E na nodra rarawa kecega sa rarawa kina ko koya.”—Aisea 63:9.

KA ERA TUKUNA ESO

Era nanuma eso ni sega ni kauaitaka noda rarawa na Kalou. E kaya e dua na dauvolaivola ni “sega ni lomani keda se nanumi keda” na Kalou “nida vakararawataki.” E kaya tale ga ke bula dina tiko na Kalou, ena sega ni “kauaitaki” keda.

KA E KAYA NA IVOLATABU

E sega ni va qori na rai ni iVolatabu me baleta na Kalou, e vakavulica ga ni dau kauaitaka na noda rarawa, sa vakarau vakaotia tale ga. Raica mada e tolu na ivakavuvuli ena iVolatabu e veivakacegui.

Kila vinaka tu na Kalou na noda rarawa. E kila tu o Jiova * na wainimata kece e tuturu ena gauna e tekivu rarawa kina na kawatamata ni “vakaraica tiko na matana” na ka kece. (Same 11:4; 56:8) Kena ivakaraitaki, nira vakararawataki na nona dauveiqaravi ena gauna makawa e kaya na Kalou: “Au sa raica dina na nodra rarawa na noqu tamata.” Vakacava, e kila ga vakatikina na nodra rarawa? Sega, e kaya tale: ‘Niu sa kila vinaka na nodra rarawa.’ (Lako Yani 3:7) Levu e vakacegui ira na itukutuku dina qori, ni kila vinaka tu na Kalou na noda rarawa kece, so mada ga era na sega ni raica se kila.—Same 31:7; Vosa Vakaibalebale 14:10.

E vakila noda rarawa na Kalou. E sega wale ga ni kila na Kalou o Jiova na noda rarawa, e vakila sara ga. Kena ivakaraitaki, e rarawa vakalevu nira vakararawataki na nona dausokalou ena gauna makawa. E kaya na iVolatabu: “E na nodra rarawa kecega sa rarawa kina ko koya.” (Aisea 63:9) E cecere vei keda na Kalou, ia e dau vakila na noda rarawa! “O Jiova [e] dau yalololoma qai dau veinanumi.” (Jemesa 5:11) E dau vukei keda tale ga meda vosota noda rarawa.—Filipai 4:12, 13.

Ena vakaotia na noda rarawa kece na Kalou. E kaya na iVolatabu ni na vakaotia na Kalou na nodra rarawa na kawatamata kece e dela i vuravura. Ena vakavinakataka na keda ituvaki o Jiova ni vakayagataka na nona Matanitu vakalomalagi. Ena gauna oya e yalataka na iVolatabu ni na “qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.” (Vakatakila 21:4) Vakacava o ira na sa takali? Ena vakaturi ira na Kalou e vuravura mera marautaka na bula ena sega kina na rarawa. (Joni 5:28, 29) Vakacava na veika rarawa sa sivi, ena dua tale e nanuma tiko? Sega, ni yalataka o Jiova: “Ena sega ni nanumi na ka eliu, ena sega ni curu tale ki na lomamudou.”—Aisea 65:17. *