Drau via vakatulewa ruarua kei na luvemu yabaki va, ia kena irairai ni dau yaco ga na lomana.

• E dau vakalecaleca ke o tukuna vua me cakava e dua na ka e sega ni taleitaka.

• Ena vakacudrucudru ni o tukuna vua me kua ni cakava na ka sara ga e dau taleitaka.

O vaqaqa, ‘E nodra ivakarau ga na gone qo? Vakacava o luvequ, ena qai veisau ni toso na gauna?’

O rawa ni vakavulici luvemu me dau talairawarawa. Ni bera ga nida veivosakitaka qori, vakasamataka mada na vu ni nodra talaidredre.

Ni se gonedramidrami o luvemu, e bibi duadua vei iko na nona qaravi. O na saga mo vakacegui koya ena ka kece e vinakata. Ni tagi mada ga vakalailai o sa na tu e yasana. E dodonu ga mo cakava qori, nira vakararavi vakalevu na gonedramidrami ena nodra veivakacegui na itubutubu.

Ni oti e vica na vula na kena caka tiko va qori, sa na nanuma kina o gone ni rau nona dauveiqaravi na nona itubutubu, na ka ga e vinakata rau na cakava. Ia ni sa via yabaki rua sa na vakila na veisau. Sa na yalani nona dau vosa yaco. Rau sa na sega ni vakarorogo nona itubutubu ina ka kece e vinakata; rau namaka me sa vakarorogo vei rau. Ena vou sara ga vei gone qori! So era tini vakacudrucudru kina. So tale era na talaidredre mera vakatovolei ira kina nodra itubutubu.

Qo na gauna mera raica kina vakabibi na itubutubu na nodra itavi, ni dodonu mera vakatulewa vei ira na luvedra, mera vakaraitaka vakadodonu vei ira na ka era namaka. Vakacava ke sega tiko ga ni vakarorogo o gone, me vaka e laurai ena itekitekivu ni ulutaga qo?

Mo tekivu lewa vua. Ke o itubutubu, ena sega ni via vakarorogo o gone ke raica ni o sega mada ga ni cakava tiko nomu itavi, oya mo lewa vua. Mo vakaraitaka ni dodonu mo lewa vua. Saga mo cakava ena sala veiganiti. Ena vica ga na yabaki sa oti era vakamacalataka eso era nanuma nira kenadau, ni vosa qo na “lewa” e rui voravora. Dua e tukuna ni “cala” na nodra lewa na itubutubu. Ke ra vakamalumalumu na itubutubu, era na rawa ni veilecayaki na gone, ra vakademeni, ra qai nanuma ni donu ga na ka era cakava. Ena sega sara ga ni vakarautaki ira vinaka ena nodra veisiga nimataka.—iVakavuvuli vakaivolatabu: Vosa Vakaibalebale 29:15.

Veivakavulici. Kaya e dua na ivolavosa ni ibalebale ni veivakavulici na “veituberi e vaka tiko na lawa se ivakavuvuli me talairawarawa se lewai koya vinaka kina e dua.” Me kua ga ni kaukaua se sivia tale. Me matata nomu veivakavulici, me kua ni raici vakamamada, me rawa ni uqeti gone me veisau.—iVakavuvuli vakaivolatabu: Vosa Vakaibalebale 23:13.

Me matata. So na itubutubu era dau kerei ira tale na luvedra mera cakava na ka. (“Kerekere, samaka mada nomu rumu.”) De ra nanuma na itubutubu nira na vulica kina na itovo vinaka na gone. Ia ena rawa ga ni raici vakamamada nodra itavi na itubutubu, qai nanuma o gone ni tu vua na galala ni vakatulewa me cakava se sega na ka e kerei tiko. Ni kua ni vakamalumalumu vei ira na luvemuni, me matata ga nomuni veidusimaki vei ira.—iVakavuvuli vakaivolatabu: 1 Korinica 14:9.

Dei ena nomu lewa. Ke o tukuna na sega, mo dei kina, drau duavata tale ga vakaveiwatini ena lewa qori. Ke o vakatulewataka me totogitaki ni talaidredre, vakayacora sara. Kua tale ni vakabalavutaka nomu ivakamacala se na vu ni nomu vakatulewa. Ena rawarawa sara vei iko kei ira na luvemu ke o dei “me ‘Io’ na nomuni io, me ‘Sega’ na nomuni sega.”—Jemesa 5:12.

Mo dauloloma. Sega ni dodonu me vakayacori tu na vakatulewa ena dua na vuvale ena veivakasaurarataki se me ra dui lewai ira tu ga. E ituvatuva vakalou na bula vakavuvale, mera tuberi kina vakayalololoma na gone ra qai nuitaki nira sa uabula. Mera vakavulici gona na luvemuni mera dau talairawarawa, vakadeitaka tale ga vei ira na nomu loloma.