“Na ka ga dou kerea vei Tamaqu, ena solia vei kemudou ena yacaqu.”—Joni 16:23.

E vakamatatataka o Jisu ni vinakata o Jiova meda masu vua ena vuku ni yacana, sega ena vukudra na matakau, na sanito, ira na agilosi se o ira na vuda era sa mate. Nida masu vua na Kalou ena vuku ni yaca i Jisu, e vakaraitaka nida doka na itavi bibi i Jisu e mai cakava ena vukuda. E kaya o Jisu: “Ena vukuqu ga ena qai torovi Tamaqu rawa kina e dua.”—Joni 14:6.

“Ni sova yani na lomamuni e matana.”—Same 62:8.

Meda masu vei Jiova me vaka ga nida vosa tiko vua na tama dauloloma. Meda masu vua ena veidokai, me vu tale ga mai lomada. Ia meda kua ga ni wilika mai ena dua na ivola se meda cavuqaqataka.

“Eda kila se cava ga eda kerea me salavata kei na lomana, ena rogoci keda o koya.”—1 Joni 5:14.

Ena iVolatabu, e tukuna vei keda na Kalou o Jiova na ka ena cakava vei keda, kei na ka e vinakata meda cakava vua. Me rawa ni rogoca na noda masu na Kalou, e bibi “me salavata kei na lomana” na ka eda kerea. Eda na kila na lomana nida vulica na iVolatabu meda kilai koya kina vakavinaka. Nida cakava qori ena tu vakarau o koya me rogoca na noda masu.

Masulaka na ka o Gadreva. Eda rawa ni masulaka vua na Kalou na ka eda gadreva ena veisiga me vaka na kakana, isulu kei na vale. Eda rawa tale ga ni kerea na vuku meda vakatulewa kina vakayalomatua, se na kaukaua meda rawa ni vosota kina na ituvaki dredre. Eda rawa tale ga ni kerea vua na Kalou me vukei keda, me vakalevutaka na noda vakabauta qai vosota na noda ivalavala ca.—Luke 11:3, 4, 13; Jemesa 1:5, 17.

Masulaki Ira Eso Tale. Era dau marautaka na itubutubu nira veilomani na luvedra. E vinakata tale ga o Jiova mera dau veikauaitaki na luvena e vuravura. E dodonu meda dau masulaki ira na watida, ira na luveda, ira na lewe ni noda vuvale, kei ira na noda itokani. E vola na tisaipeli o Jemesa: “Ni veinanumi ena masu.”—Jemesa 5:16.

Dau Vakavinavinaka. E kaya na iVolatabu me baleti koya na Dauveibuli ‘ni nona caka vinaka tiko ga, e vakatauca vei keda na uca mai lomalagi, e solia na gauna vinaka ni tatamusuki, e vakamamautaki keda ena kakana kei na lomada ena marau.’ (Cakacaka 14:17) Eda na vakavinavinaka vua na Kalou ena masu nida vakasamataka na veika kece e cakava ena vukuda. Ia e dodonu tale ga meda vakaraitaka na noda vakavinavinaka nida talairawarawa vua.—Kolosa 3:15.

Ena so na gauna, eda masu mai vu ni lomada, ia eda na rawa ni yalolailai ni sega ni saumi totolo. Kena ibalebale qori ni sa sega ni kauaitaki keda na Kalou? Sega! Dikeva mada ena tolu na ivakaraitaki qo ni bibi meda masu tiko ga.

E kaya o Steve e sa cavuti oti mai ena imatai ni ulutaga, “Na masu sara ga e vukei au meu kua ni soro.” Ena sala cava? Na gauna e vulica kina na iVolatabu, e raica o koya ni sega ni bibi ga na masu, ia me wasoma. E kaya o Steve, “Au vakavinavinakataka vua na Kalou na nodra veitokoni vakayalololoma na noqu itokani. E sega ni tukuni rawa na levu ni noqu marau ena gauna qo.”

E dua tale o Jenny, ena levu ni nona yalolailai, e nanuma ni sa na sega tu ga ni rogoci koya na Kalou. E kaya, “Au nanuma niu tawayaga, au kerea vua na Kalou me vukei au meu kila se cava na vuna e va kina qori na noqu rai.” E vukei koya vakacava na masu? E kaya, “E vukei au na masu me tiko vei au na rai i Jiova. Ke mani beitaki au vakasivia na lomaqu, o Jiova ena lomani au tu ga. E vukei au tale ga na masu meu kua ni soro, ia meu sasaga tiko ga.” E yaga vakacava qori vua? E tomana, “E vukei au na masu meu raici Jiova ni bula dina tiko, e Kalou dauloloma, e dau veikauaitaki, e Tama, e iTokani tale ga. E tu vakarau me vukei au keu yalodina tiko ga vua.”

Dikeva tale ga na ivakaraitaki i Isabel. Na gauna e bukete kina, ratou kaya vua na vuniwai ni na sucu lokiloki na luvena. E rarawa sara ga. Eso era kaya mada ga vua me vakalutu. E kaya, “Au voleka sara ga ni mate ena levu ni noqu rarawa.” Na cava e sa qai cakava? E kaya, “Au masu, au masu vua na Kalou me vukei au.” Toso na gauna e sucu na luvena tagane o Gerard, e lokiloki. Vakacava e vakila o Isabel ni sauma na Kalou na nona masu? Io! Ena sala cava? E kaya, “E sa yabaki 14 qo na luvequ. Niu raici koya ni marautaka tiko na nona bula dina ga ni lokiloki, au liaca ni qori na sala e saumi kina noqu masu. Qori e dua na ka ni veivakalougatataki levu e solia vei au na Kalou o Jiova.”

Na vosa ni vakavinavinaka va qori, eda lai vakasamataka kina na ka e vola na daunisame: “I Jiova, oni na rogoca na nodra kerekere na yalomalua. Oni na vakataudeitaka na lomadra, oni na kauaitaki ira sara ga.” (Same 10:17) E tiko gona na vuna vinaka meda masu tiko ga kina!

E volai ena iVolatabu e levu na masu i Jisu. E kilai levu duadua na masu e vakavulica vei ratou na nona tisaipeli. Na cava eda rawa ni vulica kina?