KE O sa sotava na ituvaki qori, o na rairai vakila kina e levu na ka. Kena ivakaraitaki, e levu era dau lomabibi, galili, qai yalani nodra kaukaua. De dua era na vakila tale ga na cudru, rarawa, ra qai rere. Era na rairai vakasamataka, ena marautaki tale na bula se sega.

E sega ni cala na lolosi. Qori e vakaraitaka nomu volekati ira na wekamu. Ia o na vakacegui vakacava?

Ena rairai sega ni oti na nomu rarawa, ia ena veivakacegui eso na vakatutu qo:

SEGA NI CALA MEDA TAGI

E duidui na sala kei na balavu ni gauna e lolositaki kina nona mate e dua. Ia e rawa ni veivakacegui nomu tagi. E kaya o Vanessa sa cavuti oti mai: “Au na sorova tu ga na tagi, au sega ni vinakata meu kubuta lo noqu rarawa.” E va tale ga qori na ka e kaya o Sofía ni mate o tacina: “E mosimosi dina niu vakasamataka na ka e yaco, e vaka ga ni vakasavasavataki tiko e dua na mavoa. Dredre dina meu vosota na kena mositi au, ia e seavu kina noqu rarawa.”

TALAUCAKA NA LOMAMU

Eso na gauna o na vinakata mo tu taudua. Ia ni o vosota lo nomu rarawa, e vaka ga o colata tiko e  dua na icolacola bibi. Dua na cauravou o Jared e yabaki tinikavitu, sa mate o tamana. E nanuma lesu: “Au dau talaucaka na lomaqu vei ira eso tale. De dua au sega ni tukuna kece sara na ka e tu e lomaqu, ia au marau niu talaucaka vei ira.” E kaya o Janice sa cavuti oti mai: “E vakacegui au dina noqu dau talaucaka vei ira eso tale na lomaqu. Era vakila tale ga na ka au sotava tiko, au sega kina ni vosota duadua.”

CIQOMA NA VEIVUKE

E kaya e dua na vuniwai: “Ke ciqoma o koya e lolosi tiko nodra veivuke nona itokani kei ira na wekana ni se qai mate ga e dua rau dau veivolekati, ena vukei koya qori me vosota na rarawa.” Io, era na tu vakarau nomu itokani mera vukei iko. Ia era na sega ni kila na ka mera cakava, vakavo ke o tukuna vei ira na ka o vinakata.—Vosa Vakaibalebale 17:17.

TORO VOLEKA VUA NA KALOU

E kaya o Tina: “A mate vakasauri o watiqu ena kenisa, sa sega niu qai talaucaka vua na noqu leqa kei na lomaqu. Ia au sa talaucaka kece ga vua na Kalou! Au dau kerei koya me vukei au e veisiga, ni sega ni rawarawa meu tomana na noqu cakacaka ni se qai mate ga o watiqu. Au sega ni vakamacalataka rawa na levu ni nona vukei au na Kalou.” E mate o tinai Tarsha ni se qai yabaki 22, e kaya: “Dau vakacegui au noqu wilika na iVolatabu e veisiga, au vakasamataka kina na ka e veivakauqeti.”

RAITAYALOYALOTAKA NA VEIVAKATURI

E tomana o Tina: “E sega ni vukei au taumada na inuinui ni veivakaturi, ni keitou vinakata vakaveitinani me tiko maliwai keitou o neitou Ta. Ia oti e va na yabaki, na inuinui sara ga qori e qai vakacegui au. Sa bau veivakadeitaki dina qai vukei au meu rai vakanamata ina gauna vinaka se bera mai, meu vosota tale ga na ituvaki dredre au vakila tiko qo. Dau vakacegui au noqu raitayaloyalotaka ni keirau sa sota tale ena marau!”

Ena rairai taura toka na gauna mo qai vakila na vakacegu. Ia e kaya o Vanessa: “De dua o nanuma ni o na sega ni vakila na vakacegu, ia toso na gauna sa na seavu nomu rarawa.”

O na rairai nanumi koya vakalevu na wekamu lomani sa mate, ia se rawa ni o marautaka tiko ga na bula. Nona lomani iko na Kalou o rawa ni marautaka kina na veitokani vinaka, ena vakainaki tale ga nomu bula. Sa voleka sara na gauna me vakaturi ira kina na mate na Kalou, e vinakata tale ga mo marautaki ira na wekamu lomani. Sa na qai oti vakadua kina na mosi!