ITOVO KAUKAUA E VALE KEI NA KUCU: E kaya na Matabose kei Vuravura: “Dua mai na tolu na yalewa sa vakayacori vua na itovo kaukaua e vale se kucuvi.” E ka ni rarawa ni “dua mai na lima na yalewa e veiyasa i vuravura e kucuvi se sagai me vakayacori vua na ivalavala qori.”

BASULAWA: E tukuni ni sivia na 30,000 na ilala daubasulawa e Merika. Ena yasayasa vakaLatina mai Merika, e dua mai na veiyatolu na lewenivanua e lai ripotetaka ni vakayacori vua na itovo voravora.

LABA: Voleka ni le limanadrau na udolu era labati ena dua na gauna wale tiko ga qo, e lailai tale o ira na mate ena ivalu. E levu duadua na laba ena ceva kei Aferika kei Merika e Loma. E vakavataki se sivia na kedra iwiliwili na labati e veiyasa i vuravura ni vakatauvatani kei ira na labati ena rua na vanua qori. Dua na yabaki, e sivia na le 100,000 era labati ena yasayasa vakaLatina mai Merika, sivia na 50,000 mai Brazil. Vakacava ena oti na itovo kaukaua?

Cava sa rui levu kina na itovo kaukaua? Qo eso na ka e laurai ni vakavuna qori. Kena imatai, na tiko yavavala ena vuku ni kena duidui na rawaka vakailavo kei na ivakarau ni bula. Kena ikarua, na levu ga ni nodra veibeci eso. Kena ikatolu, na vakayagataki ni alakaolo kei na wainimate gaga. Kena ikava, levu era sa vulica ga na itovo kaukaua nira se gone. Kena ikalima, era sega ni totogitaki na daubasulawa voravora.

Era sa saga eso na vanua me vakalailaitaki na basulawa. Kena ivakaraitaki, e tukuni ni lutu ena rauta na 80 na pasede na iwiliwili ni laba ena koro levu o São Paulo, mai Brazil ena tini na yabaki sa oti. Ia e se yaco tiko ga ena vanua qori eso tale na mataqali basulawa, sega tale ga ni se oti vakadua na laba. Ena qai oti ga vakacava na itovo kaukaua?

Ena qai oti ga na itovo kaukaua ke veisautaka na tamata nona rai kei na nona ivakarau. Na nona veisau e dua na tamata voravora e okati kina na nona biuta laivi na dokadoka, kocokoco, kei na yalo ni nanumi koya ga. Oti me qai saga me dauloloma, dauveidokai, dauveikauaitaki tale ga.

Cava ena uqeta e dua me veisautaka na nona itovo? Na ivakavuvuli vakaivolatabu. Kena ivakaraitaki:

• “Qo na ibalebale ni noda lomana na Kalou, meda muria na nona ivunau.”—1 Joni 5:3.

• “Na ibalebale ni rerevaki Jiova meda cata na ka ca.” *—Vosa Vakaibalebale 8:13.

Se mani voravora vakacava na nona itovo e dua, ena saga me veisau ke lomana na Kalou qai sega ni via vakacudrui koya. E sega ni vakarairai ga na veisau  qori, ia ena veisau sara ga na ivakarau ni lomana kei na nona rai. Vakacava e rawa ni vakayacori dina na veisau va qori?

Rogoca mada na italanoa kei Alex , * a 19 na yabaki nona curu tu ena dua na valeniveivesu e Brazil ena vuku ni nona itovo voravora. A vulica na iVolatabu kei ira na iVakadinadina i Jiova, sa qai papitaiso me dua na iVakadinadina i Jiova ena yabaki 2000. Vakacava sa veisautaka dina na nona itovo voravora? Io, e veivutunitaka tale ga o Alex na ka ca kece e dau cakava. E kaya: “Au sa qai lomana qo na Kalou ni tarai au dina na nona veivosoti. Na levu ni noqu vakavinavinaka kei na noqu lomani Jiova e uqeti au sara ga meu veisautaka na noqu itovo.”

Dua tale na italanoa mai Brazil, e 15 na yabaki nona dua tu na daubasulawa voravora o César. E qai veisau vakacava? A sotavi ira na iVakadinadina i Jiova e valeniveivesu, mani vulica na iVolatabu. E kaya o César: “Au vakila ni sa qai vakainaki na noqu bula. Na ka au vulica e uqeti au meu lomana na Kalou, meu kua tale ga ni vakacudrui koya se vakararawataki koya niu lesuva noqu ivakarau ca. Au via vakaraitaka niu vakavinavinakataka na nona yalovinaka. Na noqu lomani koya kei na noqu rokovi koya e uqeti au meu veisautaka noqu itovo.”

Cava e vakaraitaka vei keda na italanoa ruarua qori? Io, na iVolatabu e rawa ni veisautaka na ivakarau ni rai. Ni sa veisau na rai, sa na qai veisau na itovo. (Efeso 4:23) E kaya o Alex a cavuti ena imatai ni italanoa: “Na ka au vulica ena iVolatabu e vaka na wai savasava, e vakasavasavataki au mai na vakanananu ca. Au kurabuitaka niu cakava rawa na veisau qori.” Io, e dau veivakasavasavataki na Vosa ni Kalou. Eda na vorata gona na ca ke da dau vakasamataka na ka eda wilika ena iVolatabu. (Efeso 5:26) Era vakadinadinataka qori eso era dau voravora qai kocokoco tu e liu, era sa veisau mera dau yalovinaka qai dauveiyaloni. (Roma 12:18) E vakacegui ira na nodra muria na ivakavuvuli vakaivolatabu.—Aisea 48:18.

Na cava era vakabauta kina na iVakadinadina i Jiova ena 240 na vanua ena veiyasa i vuravura ni na oti dina na itovo kaukaua? Sa laurai rawa tiko ena kedra maliwa na duavata kei na veilomani. Era vaka e dua na vuvale levu, dina ga ni duidui na matatamata era cavutu mai kina, duidui nodra ivakatagedegede ni bula kei na isususu. E rawa ga qori nira lomana na Kalou ra qai rokovi koya. (1 Pita 4:8) Na nodra ivakarau ni veimaliwai e vakadinadinataka ni rawa ni oti dina e vuravura na itovo kaukaua.

E kaya na iVolatabu ni sa vakarau muduka na Kalou na itovo kaukaua. Sa sega ni caka rawa na itovo voravora ena vuravura qo. Sa na waraki ga “na siga ni lewa mera vakarusai kina o ira na sega ni doka na Kalou.” (2 Pita 3:5-7) Qori ena qai oti kina vakadua na nodra veivakalolomataki na tamata voravora. Eda kila vakacava ni na vakaotia na Kalou na itovo kaukaua?

E kaya na iVolatabu ni “cati ira kece era taleitaka na itovo kaukaua” na Kalou. (Same 11:5) E Kalou ni vakacegu kei na lewadodonu na Dauveibuli. (Same 33:5; 37:28) Qori na vuna ena vakarusai ira kina na tamata voravora.

Io, sa voleka sara na vuravura vou ni vakacegu. (Same 37:11; 72:14) Ia e tiko na ka mo cakava ke o via bula ena vuravura sa na sega kina na itovo kaukaua.