Qori na ka e nanuma e dua na goneyalewa yabaki 13 ni soli vakailoloma vua e dua na koli. E kaya e dua na yalewa e vakabisinisi ni dau vakamareqeta na kompiuta a lolomataka vua o tamana ni se vuli. Oti e dua na yabaki nodrau vakawati, e cakava e dua na yalewa na kad ni vakanuinui vinaka qai solia vei watina. E kaya o tagane ni oya na iloloma vinaka duadua me bau soli vua.

Dua na ka na gauna era vakayagataka e levu e veiyabaki ena vaqara iloloma, nira via solia na iloloma “vinaka” duadua vua na nodra itokani se wekadra. Era vinakata e levu me marautaki na iloloma era solia me vaka ga eratou vakila na le tolu eratou sa cavuti oti mai. Vakacava o vinakata me marautaki na iloloma o solia, mo marautaka tale ga na iloloma e soli vei iko?

E macala ga nida na vinakata kece qori baleta ni basogairua na yaga ni noda soli iloloma. Ena yaga vua e taura, ena yaga tale ga vei keda na solia. E kaya na iVolatabu: “E marau vakalevu o koya e solia na ka, vakalailai o koya e taura na ka.” (Cakacaka 20:35) Io, ena marautaki vakalevu na iloloma ke taleitaka qai vakamareqeta o koya e soli vua.

Na cava mo cakava mo marautaka kina na soli iloloma, me marau tale ga o koya e taura? O na marautaka tiko ga vakacava nomu soli iloloma ke o sega mada ga ni ceguva rawa na iloloma “vinaka” duadua?