Dua na ka nodrau marautaka o Don kei Margaret * na nona gade yani na luvedrau yalewa kei na nona vuvale. E matai na vakasaqa o Margaret, mani vakasaqara na kedrau kakana taleitaki na makubuna na macaroni vakajisi * me kedratou kakana ni veitalatala.

Ni ratou vakarau kana, e biuta sara ena teveli o Margaret na ka e vakasaqara. Ia ni dolava na boulu, e kidacala ni tu ga kina na jisi kei na kena wai sosoko. A guilecava o Margaret me biuta na macaroni!

Eda dau cala kece se da qase se gone. De dua eda cala ena vosa eda tauca se na ka eda cakava se da guilecava ga meda cakava na ka e dodonu me caka. Na cava eda dau cala kina? Na cava meda cakava nida cala? Na cava ena vukei keda me kua ni levu noda cala? Me rawa ni saumi na taro qori, e vinaka meda raica mada e liu na rai donu me tiko vei keda me baleta noda cala.

Eda dau marau nida vakacaucautaki ena veika vinaka eda cakava. Ia vakacava nida cala, eda dau vakaraitaka vakadodonu ke da sega mada ga ni nakita noda cala se ra sega ni kila e levu? Qori ena vinakati kina na yalomalumalumu.

Ke da dau nanumi keda vakasivia, eda na sega ni raica vakabibi na cala eda cakava, eda na beitaki ira eso tale se da cakitaka noda cala, qai sega ni dau vinaka na kena itinitini. Ena sega ni walia qori na leqa, era rawa ni beitaki vakatawadodonu kina eso tale. Ke da vunitaka noda cala qai sega ni dua na ka e yaco kina ena gauna qo, meda nanuma tiko nida “na dui saumitaro . . . vua na Kalou.”—Roma 14:12.

E donu na rai ni Kalou me baleta noda cala. E vakamacalataka na Same ni dau “yalololoma qai dauveinanumi” na Kalou, e “sega ni dau vaqara cala o koya, se cudru tiko me tawamudu.” E kila nida ivalavala ca qai tiko noda malumalumu, e “nanuma tiko nida kuvuniqele.”—Same 103:8, 9, 14.

Na Kalou e vaka na tama dauloloma, e vinakata meda vakatotomuria nona rai me baleta noda cala. (Same 130:3) E tu ena nona Vosa na ivakasala vinaka ena vukei keda nida cala se nira cala eso tale.

Levu na gauna ena vakasamataka tiko ga o koya e cala na ka e cakava. Ena rawa sara ga ni beitaki ira eso tale, se saga me vakadodonutaka na ka e tukuni se na ka e yaco. Qori ena kauta ga mai na leqa. Ke rarawataka e dua na vosa o tauca, ena vinaka mo kere veivosoti vua, saga mo walia na leqa me rawa ni vinaka tale nomudrau veimaliwai. Vakacava o sa bau cakava e dua na cala o sotava kina na leqa se vakaleqa nomudrau  veitokani kei na dua tale? De dua ena vinaka mo veivakameautaki, kua ni rarawataka tiko ga na ka o cakava. Kua ni totolo ni veibeitaki ni na rawa ni vakavuna tu na veimaliwai ca ena dua na gauna balavu qai vakalevutaka ga na leqa. Ia vuli mai na nomu cala, qai cakava na ka kece e gadrevi me wali kina na leqa.

Ni cala e dua tale, e dau totolo ga noda vakaraitaka nida sega ni duavata kei na ka e cakava. E vinaka meda muria na ivakasala i Jisu ni kaya: “Na ka kece dou vinakata mera cakava vei kemudou na tamata, dou cakava tale ga vei ira.” (Maciu 7:12) Ke cala lailai mada ga, o na vinakata mera kauaitaki iko eso tale se guilecava na cala o cakava. Vakacava mo vakaraitaka tale ga na veikauaitaki vata qori vei ira eso tale?—Efeso 4:32.

E tukuni ena dua na ivolavosa nida dau cala ena vuku ni “lewa cala, lecaika, se vakawelewele.” De dua eda coriti ena dua vei ratou na tolu na ka qori ena dua na gauna. Ia ena sega ni levu na noda cala ke da muria na ivakavuvuli ena iVolatabu.

Dua na ivakavuvuli e laurai ena Vosa Vakaibalebale 18:13, e kaya: “O koya e tukuna na ka ni bera ni rogoca, e lialia qai vakamadua.” Ke o saga mo rogoca na itukutuku taucoko ni ka e yaco, o na sega ni vosa vakalialia se cakava e dua na ka e veivakamadualaki. E bibi mo dau vakarorogo ni na vukei iko qori ena nomu vakatulewa, o na sega kina ni cakava e dua na cala.

E kaya e dua tale na ivakavuvuli vakaivolatabu: “Ke rawa, saga moni veiyaloni kei ira na tamata kece.” (Roma 12:18) Saga mo dau guta na veiyaloni kei na duavata. Ni o cakacaka kei ira eso tale, e dodonu mo veinanumi, veidokai, veivakacaucautaki, veiuqeti tale ga. Ni vinaka noda veimaliwai, ena rawarawa noda vosoti ke cala na ka eda tukuna se cakava. Ena wali rawa tale ga kina na leqa lelevu e dau basika.

Raica na ka o rawa ni vulica mai na nomu cala. Kua ni soli ulubale ni o cala, e gauna vinaka qori mo vulica kina eso na itovo totoka me vaka na vosovoso, yalololoma, lewa vinaka, yalomalua, vakacegu, kei na loloma. (Kalatia 5:22, 23) O rawa ni vakaraitaka ni o sa vuli mai na nomu cala ni o saga mo kua ni cakava tale. Kua ni vakasamataka vakalevu na cala o cakava. Na veiwali e dau iwali vinaka ni leqa ena so na gauna.

Ni donu noda rai, eda na kila na ka meda cakava nida cala. Ena vinaka noda veimaliwai kei ira eso tale. Ke da vuli mai na noda cala, eda na yalomatua, era na taleitaki keda eso tale. Eda na sega ni rarawa se da beitaki keda tu ga ena cala eda cakava. Noda kila nira dau cala eso tale ena vakavolekati keda vei ira. Koya e bibi sara, ena uqeti keda meda vakatotomuria na loloma ni Kalou kei na nona dau tu vakarau me veivosoti.—Kolosa 3:13.

Vakacava a vakavu leqa dina ena vuvale i Margaret na nona cala? Sega, ratou veiwalitaka tale na ka e yaco. E bau dredrevaka mada ga o Margaret na nona guilecava me biuta na macaroni! Ni oti e vica na yabaki, erau talanoataka na makubui Margaret vei rau na dui luvedrau na ka e yaco ena nodratou kana ni veitalatala kei na veika totoka ratou marautaka vata. A sega ni vakavu leqa ena nodratou vuvale na ka e cakava o Margaret ni a dua ga na cala lailai!