Era vakabauta e vica vata na milioni e veiyasa i vuravura ni solevutaki na siganisucu i Jisu Karisito ena Kirisimasi. Ia vakacava era solevutaka na Kirisimasi ena imatai ni senitiuri na lotu vaKarisito era veitokani voleka kei Jisu? O kila na ka e kaya na iVolatabu me baleta na siganisucu? Na isau ni taro qori ena vakaraitaka vei keda e dodonu mera solevutaka na lotu vaKarisito na Kirisimasi se sega.

E sega ni vakamacalataka na iVolatabu ni a solevutaki na siganisucu i Jisu se dua tale na tamata yalodina ni Kalou. Na iVolatabu e vakamacalataka ga nodrau siganisucu e rua erau sega ni qaravi Jiova, na Kalou e vakavuna na iVolatabu. A yaco na leqa ena siganisucu ruarua qori. (Vakatekivu 40:20; Marika 6:21) E kaya na Encyclopædia Britannica nira cata na lotu vaKarisito taumada na “ivalavala butobuto ni kena solevutaki na siganisucu.”

E sega ni vakamatatataka na iVolatabu na siga e sucu kina o Jisu. Erau kaya ena nodrau ivola na Cyclopedia o McClintock kei Strong, ni sega ni volai ena Veiyalayalati Vou se dua tale na ivola na siga e sucu kina o Karisito. E macala ga ni na vakaraitaka vei ira nona imuri o Jisu na siga a sucu kina ke vinakata mera solevutaka.

E sega tale ga ni tukuni ena iVolatabu ni a solevutaka na Kirisimasi o Jisu se dua vei ratou nona tisaipeli. E vakamacalataki ena ivola na New Catholic Encyclopedia ni a cavuti taumada na solevutaki ni Kirisimasi “ena ivola i Philocalus, e dua na dauvolaivola ni Roma. Eso na itukutuku e yavutaka kina na ka e vola e qai kumuni ena rauta na 336 [G.V.].” Qori sa oti toka e dua na gauna balavu mai na kena volai na iVolatabu, sa oti tale ga e vica na senitiuri mai na gauna a bula kina e vuravura o Jisu. Sa rauta me rau kaya o McClintock kei Strong ni “sega ni ivakaro vakalou se yavutaki ena V[eiyalayalati] V[ou] na solevutaki ni Kirisimasi.” *

E vakamatatataka ena iVolatabu na Qasenivuli Levu o Jisu na ivakasala e vinakata mera muria nona imuri. E sega ni wili ena ivakasala qori na solevutaki ni Kirisimasi. E sega ni vinakata e dua na qasenivuli mera kuria na gonevuli na veika e vakavulici ira kina. Ena vakasama vata qori, e sega ni vinakata o Jisu mera “kuria na ka e volai” ena iVolatabu na nona imuri.—1 Korinica 4:6.

Ia e dua na soqo bibi era kila na lotu vaKarisito taumada, na iVakananumi ni mate i Jisu. E kaya sara ga o Jisu vei ratou nona tisaipeli na gauna me ratou solevutaka kina qori, e vakaraitaka tale ga vei ratou na kena icakacaka. E volai ena iVolatabu na idusidusi matata qori kei na tikinisiga a mate kina o Jisu.—Luke 22:19; 1 Korinica 11:25.

Eda sa dikeva mai ni solevu ni siganisucu na Kirisimasi. Era sega ni muria na ivalavala butobuto qori na lotu vaKarisito taumada. E sega tale ga ni tukuni ena iVolatabu ni solevutaka na Kirisimasi o Jisu se dua tale. Ni vakasamataki qori, era vakadeitaka e vica vata na milioni na lotu vaKarisito e veiyasa i vuravura ni sega ni dodonu mera solevutaka na Kirisimasi.