1-3. (a) Era vakaraitaka vakacava na lotu vaKarisito nira guta mera tiko ena soqoni? (Raica na imatai ni iyaloyalo.) (b) Na cava ena veivosakitaki ena ulutaga qo?

NI SE qai yabaki 17 o Corinna, a vesu o tinana qai kau ina keba ni veivakararawataki mai Soviet. Sega ni dede, e kau tale ga vakavesu o Corinna i Siberia, vica vata na udolu na maile na kena yawa mai nodratou. E vakalolomataki me vaka na bobula, ena so na gauna e cakacaka e tautuba ena draki batabata qai sega ni ganita vinaka na draki na nona isulu. Ena gauna dredre qori, e vakadeitaka o Corinna kei na dua tale na tacida yalewa me rau kua ni calata na soqoni.

² E kaya, “Ena yakavi keirau biubiu mai na vanua keirau cakacaka tiko kina, keirau taubale ina ikelekele ni sitimanivanua, e 25 na kilomita na kena yawa. E biubiu na sitimanivanua ena rua na kaloko ena mataka, keirau vodo tiko me ono na aua, keirau sobu qai taubale tale me 10 na kilomita ina vanua ni soqoni.” Vakacava e yaga na ilakolako qo? E kaya o Corinna: “Keimami vulica na Vale ni Vakatawa, lagasere tale ga ena soqoni. Qo e vakayaloqaqataki keirau sara ga.” Oti tale e tolu na siga, rau qai gole i cakacaka. E sega mada ga ni kila o koya e liutaka na cakacaka ni rau lako tu o Corinna kei na nona itokani.

 ³ O keda na dauveiqaravi i Jiova eda dau vakamareqeta na gauna ni soqoni. Kena ivakaraitaki, ni tauyavu ga na ivavakoso vaKarisito, era tekivu ‘muria na vakasosoqoni vata’ na imuri i Jisu. (Caka. 2:42) De dua o na vinakata tale ga mo dau soqoni wasoma. Ia eso na ka e dau vakalatilati ena noda tiko ena soqoni. Kena ivakaraitaki, na cakacaka saumi, levu na ka meda cakava, se noda dau oca. Eda na walia vakacava qori me rawa nida tiko ga ena soqoni? ^[1] Eda na vukei ira vakacava na vuli iVolatabu kei na so tale mera raica vakabibi na soqoni? Ena veivosakitaki ena ulutaga qo e walu na vuna meda tiko kina ena soqoni. Eda rawa ni wasea vakatolu: na kena yaga vei keda, kena yaga vei ira na tacida, e tarai Jiova vakacava nida tiko ena soqoni. ^[2]

4. E yaga vakacava na soqoni nida vulica na veika me baleti Jiova?

⁴ E vakavulici keda. Eda vulica na veika me baleti Jiova ena soqoni kece. Kena ivakaraitaki, voleka ni ivavakoso kece se qai vulica oti ga na ivola Toro Voleka Vei Jiova ena Vuli iVolatabu ni iVavakoso. Vakacava e vaqaqacotaka nomu lomani Jiova ni o vulica na nona itovo, salavata kei na nodra ivakamacala veiuqeti na tacimu? E levu tale ga na ka eda kila ena Vosa ni Kalou nida vakatudaliga ena ivunau, vakatasuasua, kei na wili iVolatabu. (Niem. 8:8) Kena ivakaraitaki, vakasamataka mada na levu ni iyau vakayalo o vulica e veimacawa ni o vakavakarau se rogoca na veitikina bibi ena wili iVolatabu!

5. E yaga vakacava na soqoni meda muria kina na ivakavuvuli vakaivolatabu qai maqosa ena cakacaka vakavunau?

⁵ E vakavulici keda na soqoni meda muria na ivakavuvuli vakaivolatabu ena noda bula. (1 Ces. 4:9, 10) Kena ivakaraitaki, eda vulica ena Vale ni Vakatawa na ka e ganiti keda na dauveiqaravi ni Kalou. Vakacava e bau uqeti iko na vuli va qori mo dikeva tale na nomu isausau, mo dau veivosoti, se vakavinakataka nomu masu? Na soqoni ena loma ni macawa e vakavulici keda ena cakacaka vakaitalatala. Eda vulica na iwalewale meda vunautaka kina na itukutuku vinaka, meda maqosa tale ga ena veivakavulici.—Maciu 28:19, 20.

6. E veiuqeti qai veivakayaloqaqataki vakacava na soqoni vaKarisito?

⁶ E vakayaloqaqataki keda. Na vuravura i Setani e saga me vakaluluqataka na noda vakabauta, e vakavu lomaocaoca se veivakayalolailaitaki. Ia na soqoni vaKarisito e dau veiuqeti qai veivakayaloqaqataki. (Wilika Cakacaka 15:30-32.) Eda dau veivosakitaka kina na vakayacori ni parofisai ena iVolatabu. Qo e vakanuideitaki keda ni na vakayacora dina o Jiova na nona vosa ni yalayala me baleta na veigauna se bera mai. Era dau vakayaloqaqataki keda o ira na vosa mai na buturara. E uqeti keda tale ga na nodra ivakamacala kei na nodra lagasere mai vu ni lomadra na tacida. (1 Kor. 14:26) Nida veivosaki tale ga kei ira na tacida ni bera se suka na soqoni e vakabulabulataki keda, eda kila nira kauaitaki keda dina.—1 Kor. 16:17, 18.

7. Na cava e bibi kina meda tiko ena soqoni?

⁷ E dusimaki keda kina na yalo tabu. E kaya o Jisu Karisito: “O koya e vakadaligana me rogoca sara na ka e tukuna na yalo tabu ina ivavakoso.” (Vkta. 2:7) Io, e liutaka o Jisu na ivavakoso vaKarisito ena veivuke ni yalo tabu. Na yalo tabu e vukei keda meda vorata na veitemaki, meda doudou qai maqosa ena cakacaka vakaitalatala, meda vakatulewa tale ga  vakavinaka. Meda vakayagataka vinaka mada ga na isolisoli kece, wili kina na soqoni ni ivavakoso me dusimaki keda kina na yalo tabu.

8. E uqeti ira vakacava na tacida na noda tiko ena soqoni, ivakamacala, kei na lagasere? (Raica tale ga na kato “E Marau ni Tiko ena Soqoni.”)

⁸ Nida tiko ena soqoni, e vakaraitaka nida lomani ira na tacida. Vakasamataka mada na veika dredre era vosota eso na tacida ena ivavakoso. Sa rauta me vola kina na yapositolo o Paula: “Meda dau veinanumi”! Oti e qai vakamacalataka ni rawa nida vakaraitaka na noda veinanumi nida sega ni “biuta na noda soqoni vata.” (Iper. 10:24, 25) Noda tiko ena soqoni e vakaraitaka nida vinakata meda vakayagataka noda gauna vei ira, meda veivosaki, da qai kauaitaki ira. Kena ikuri, ena uqeti ira na noda lagasere kei na noda ivakamacala mai vu ni lomada.—Kolo. 3:16.

9, 10. (a) E uqeti keda vakacava na vosa i Jisu ena Joni 10:16 ena bibi ni noda tiko ena soqoni kei ira na tacida? (b) Ena yaga vakacava vua e dua na tacida e sega ni taleitaki mai vale na noda tiko wasoma ena soqoni?

⁹ Na soqoni e vakaduavatataki keda vakaveitacini. (Wilika Joni 10:16.) E vakatauvatani koya o Jisu me ivakatawanisipi, o ira na nona imuri mera qelenisipi. Kena ivakaraitaki: E rua na sipi e tiko e baba, e rua rau tiko ena buca qai dua e kana voli ena dua tale na vanua. Vakacava e rawa ni tukuni ni dua ga na qelenisipi na lima na sipi ya? Sega. Na qelenisipi era na tiko vata ga ra qai muria na nodra ivakatawa. E va tale ga qori o keda, ke da nakita meda tu duadua ga eda na sega ni muria na noda iVakatawa. Bibi gona meda dau soqoni vata kei ira na tacida me rawa nida “dua ga na qelenisipi, dua ga na kena ivakatawa.”

¹⁰ E vakaduavatataki keda vakaveitacini noda tiko ena soqoni. (Same 133:1) Eso na tacida era sega ni taleitaki vei ira nodra itubutubu kei na vo tale ni vuvale. Ia e yalataka o Jisu ni na tiko na nodra vuvale vakayalo, mera lomani qai karoni kina. (Mari. 10:29, 30) Nida tiko wasoma ena soqoni, eda rawa ni vakaraitaka vei ira na tacida qori nida tamadra, tinadra, tacidra, se ganedra! Vakacava ena uqeti keda qori meda saga ena noda igu taucoko meda tiko ena soqoni kece?

11. Na cava eda kaya kina ni noda tiko ena soqoni eda sa solia vei Jiova na ka e dodonu me caka vua?

¹¹ Nida tiko ena soqoni eda sa solia tiko vei Jiova na ka e dodonu me caka  vua. Ni Dauveibuli o Jiova, e dodonu me vakacaucautaki, me vakalagilagi, me vakarokorokotaki tale ga. (Wilika Vakatakila 7:12.) Nida masu, lagasere, qai tukuni Jiova ena soqoni, eda sa vakayacora tiko na ka sara ga e dodonu me caka vua—noda sokalou. E ka dokai dina meda vakarokorokotaki Jiova ena levu ni ka e cakava ena vukuda.

12. E raica vakacava o Jiova na noda talairawarawa ina nona ivakaro meda tiko ena soqoni?

¹² E buli keda o Jiova, e dodonu meda talairawarawa vua. E vakaroti keda meda kua ni dau biuta na noda soqoni vata, vakabibi ena iotioti ni veisiga qo. Ena marautaka o Jiova ni vu mai lomada noda muria na ivakaro qori. (1 Joni 3:22) E kila vinaka qai kauaitaka na sasaga eda cakava meda tiko ena soqoni yadua.—Iper. 6:10.

13, 14. Eda na volekati Jiova kei Jisu vakacava ena soqoni?

¹³ Nida tiko ena soqoni e vakaraitaka nida via volekati Jiova kei na Luvena. Na Dauniveivakavulici Levu o Jiova e dusimaki keda ena soqoni ni vakayagataka nona Vosa na iVolatabu. (Aisea 30:20, 21) Ke ra tiko ena soqoni o ira na sega ni vakabauta, de dua era na tukuna: “E tiko dina kei kemuni na Kalou.” (1 Kor. 14:23-25) O Jiova e vakayagataka na yalona tabu me dusimaka na ka kece e caka ena noda soqoni. Nida tiko ena soqoni, eda rogoca na domo i Jiova, eda vakila nona kauaitaki keda vakayalololoma, eda na volekati koya kina.

¹⁴ E tukuna o Jisu: “Na vanua e soqoni kina e le rua se tolu ena yacaqu, au na tiko ena kedratou maliwa.” (Maciu 18:20) Na kena ivakavuvuli e vakaibalebale tale ga ena noda soqoni. Ni ulu ni ivavakoso o Karisito, e “veilakoyaki ena [kedra] maliwa” na ivavakoso ni dauveiqaravi ni Kalou. (Vkta. 1:20–2:1) Rau vakaitavi tiko gona o Jiova kei Jisu ena noda vakayaloqaqataki ena soqoni vaKarisito. O bau vakasamataka se cava na rai i Jiova ni o guta mo toro volekati koya kei Luvena?

15. Nida tiko ena soqoni, e vakaraitaka vakacava nida via talairawarawa vua na Kalou?

¹⁵ Eda tokona na veiliutaki cecere ni Kalou nida tiko ena soqoni. E vakaroti keda o Jiova meda tiko ena soqoni, ia e sega ni vakasaurarataki keda. (Aisea 43:23) Koya gona, ena vakatau sara ga vei keda ke vu mai lomada noda lomani Jiova kei na noda yalodina ni tokona nona veiliutaki. (Roma 6:17) Kena ivakaraitaki, ena rairai vakasaurarataki keda noda boso ni cakacaka meda calata na soqoni ena vuku ni cakacaka. De dua ena vakatabuya na matanitu meda soqoni vata nida na totogitaki kina, bala i valeniveivesu, se so tale na ituvaki leqataki. Se da na rairai temaki meda vakaitavi ena ka ni veivakamarautaki meda calata kina na soqoni. Ena ituvaki kece qori, ena vinakati kina na vakatulewa: O cei o na qarava? (Caka. 5:29) Eda na vakamarautaki Jiova nida digia meda tokona nona veiliutaki cecere.—Vkai. 27:11.

16, 17. (a) Eda kila vakacava ni bibi vei ira na lotu vaKarisito taumada na soqoni? (b) E raica vakacava o Brother George Gangas na soqoni?

¹⁶ Ni oti na cakamana vakasakiti ena Penitiko 33 G.V., e sega ni cegu nodra soqoni na lotu vaKarisito. “Era muria tiko ga na nodra ivakavuvuli na yapositolo, era dau soqoni vata.” (Caka. 2:42) Na vosa vaKirisi e vakadewataki “era muria tiko ga” e kena ­ibalebale na  vosota se gumatua tiko ga. E sega gona ni rawarawa vei ira na lotu vaKarisito taumada mera tiko ena soqoni, nira donuya na veiliutaki vakaRoma kei na nodra veitusaqati na iliuliu ni lotu vakaJiu. Ia era gumatua tiko ga na tacida.

¹⁷ E levu tale ga na dauveiqaravi ni Kalou nikua era raica vakabibi na soqoni vaKarisito. E kaya o George Gangas, e 22 na yabaki nona lewe ni iLawalawa Dauvakatulewa: “Au raica ni ka talei dina meda soqoni kei ira na tacida, meda veivakayaloqaqataki tale ga. Au dau vinakata meu liu ena Vale ni Soqoni, meu iotioti tale ga ni biubiu mai kea ke rawa. Dua na ka noqu marau niu sotavi ira na taciqu. Niu maliwai ira, vaka ga au tiko kei ira na lewe ni noqu vuvale ena parataisi vakayalo.” E tomana: “Na kabasi e dau dusi tu ga ina vualiku, e va tale ga kina na lomaqu kei na noqu vakanananu, niu dau via gole tu ga ena soqoni.”

18. Na cava nomu rai me baleta na soqoni? Cava o vakadeitaka mo cakava?

¹⁸ Vakacava e va tale ga qori na nomu rai? Mo vakadeitaka gona mo vosota qai gumatua ni tiko wasoma ena soqoni. Ni o cakava qori, o na duavata kei Tui Tevita ni kaya: “I Jiova, au taleitaka na vale oni tiko kina.”—Same 26:8.