NA NODA mona e rauta ni 1.4 na kilokaramu na kena bi, ia e tukuni ni “ka vereverea duadua e bau laurai ena noda vuravura.” E vakatubuqoroqoro dina. Na levu ga ni noda vulica, eda na vakavinavinakataka vakalevu na cakacaka “veivakurabuitaki” i Jiova. (Same 139:14) Raica mada e dua na ka e rawa ni cakava na noda mona, oya me vakasama.

Na cava na ibalebale ni vakasama? E vakamacalataka e dua na ivolavosa ni “rawa nida raitayaloyalotaka se vakasamataka na ka vou qai taleitaki, se ka eda sega ni sotava.” Nida kila qori, vakacava eda duavata nida dau vakayagataka wasoma na noda vakasama? Kena ivakaraitaki, o bau wilika se rogoca na yaca ni vanua o se bera ni butuka? Vakacava e kena ibalebale qori ni o sega ni rawa ni vakasamataka? Nida vakasamataka e dua na ka eda sega ni raica, rogoca, tovolea, tara, se boica, eda sa vakayagataka tiko na noda vakasama.

Eda kila mai na iVolatabu nida buli meda ucuya na Kalou. (Vkte. 1:26, 27) Vakacava e dusia qori ni dau vakasama tale ga o Jiova? Ni digia me buli keda meda dau vakasama, e namaka meda vakayagataka meda kila vinaka na nona inaki. (Dauv. 3:11) Eda na vakayagataka vinaka vakacava noda vakasama meda cakava qori, da qai kua ni vakayagataka vakalialia?

(1) Tadra vakasiga ena gauna cala se tatadrataka na ka ca.

E sega ni cala na tadra vakasiga. E vakadinadinataki ni tiko na kena yaga. Ia e tukuni ena Dauvunau 3:1 ni tiko “na gauna ni ka kece e caka,” e rawa kina nida vakayacora eso na ka ena gauna cala. Kena ivakaraitaki, ke veiciriyaki noda vakasama ena gauna ni soqoni se vuli vakataki keda, vakacava e yaga se sega? E tukuna o Jisu e dua na ivakasala bibi, ni rerevaki meda vakasamataka na ka ca me vaka na itovo vakasisila. (Maciu 5:28) Kena ibalebale ni rawa ni vakararawataki Jiova vakalevu eso na ka eda dau vakasamataka. Nida vakasamataka na itovo vakasisila eda na rawa ni vakayacora na itovo ca. Meda vakadeitaka meda kua ni vakasamataka na ka eda na yawaki Jiova kina!

(2) Nanuma ni itataqomaki na iyau.

E yaga na iyau. Ia eda na rarawa ke da nanuma ni vakavu marau se rawa ni taqomaki keda. E vola na turaga vuku o Solomoni: “Na iyau ni vutuniyau e nona koro kaukaua, e vaka na bai cecere ena nona vakasama.” (Vkai. 18:11) Kena ivakaraitaki, vakasamataka ni waluvu e dua na iwase levu ni vanua o Manila ena Yatu Filipaini, ena Seviteba 2009. Vakacava era bula na vutuniyau? E tukuna e dua na turaga vutuniyau e vakacacani e levu nona iyau, “E tarai keimami kece na waluvu, keimami rarawa kece na vutuniyau kei na dravudravua.” Ena rawarawa meda vakasamataka ni itataqomaki qai veivakacegui na iyau, ia na kena dina, e dravusakulukulu.

(3) Leqataka na veika ena rairai sega sara ga ni yaco.

E vakasalataki keda o Jisu meda kua ni “lomaocaoca” vakasivia. (Maciu 6:34) Ni qori ena vinakati kina na vakasama. Ena vakalusia na noda igu nida leqataka na ka ena rairai sega ni yaco. E tukuni ena iVolatabu ni rawa ni veivakayalolailaitaki se vakavurarawa na lomaocaoca va qori. (Vkai. 12:25, vmr) E bibi gona meda muria na ivakasala i Jisu meda kua ni lomaocaoca vakasivia, meda leqataka ga na siga yadua.

(1) Raica na leqa, gole tani mai kina.

E uqeti keda na iVolatabu meda yalomatua qai vakasamataka rawa na ka meda cakava. (Vkai. 22:3) Nida vakayagataka noda vakasama, eda na raica na leqa e rawa ni yaco da qai vakatulewa. Kena ivakaraitaki, ke o sureti ena soqo, o na vakayagataka vakacava nomu vakasama mo vakatulewataka mo tiko se kua? Nida kauaitaka se o cei tale e sureti, na levu ni soqo, na gauna kei na vanua ena vakayacori kina, vakasamataka: ‘Na cava ena rawa ni yaco?’ Vakacava o rawa ni vakasamataka na veiuqeti ni soqo e salavata kei na ivakavuvuli vakaivolatabu? Ni o cakava qori o na raitayaloyalotaka kina na soqo. Ni o vakayagataka nomu vakasama mo vakatulewa vakavuku, ena sega ni yacovi iko na leqa.

(2) Vakasamataka na sala mo walia kina na leqa.

Na vakasama e okati kina noda ‘sega ni drovaka na leqa, ia eda na saga meda walia.’ Kaya mada ke drau veileqaleqati kei na dua ena ivavakoso. O na torova vakacava na tacimu mo drau veivakameautaki? E vica na ka mo vakasamataka. E dau vakacava na ivakarau ni nona veivosaki? Na gauna veiganiti cava mo drau veivosaki kina? Na itautau ni vosa cava me vakayagataki? Ni  o vakasamataka qori, o na raica na sala vinaka duadua mo walia kina na leqa. (Vkai. 15:28) Qori ena veiyaloni tiko ga kina na ivavakoso, nida vakayagataka vinaka na noda vakasama.

(3) Vakavinakataka nomu wili iVolatabu kei na nomu vuli vakataki iko.

E bibi na wili iVolatabu e veisiga. Ia e levu tale na ka e vinakati kina. E vinakati meda kila na ka eda vulica da qai muria. Eda na marautaka vakalevu na veika e cakava o Jiova nida wili iVolatabu. Eda rawa ni vakayagataka kina noda vakasama. Ena sala cava? Raica mada na ivola Vakadamurimuria Nodra Vakabauta. Nida wilika na ivola qo ena uqeta noda vakasama meda raitayaloyalotaka na vanua kei na ka era kilai kina na talanoataki ena iVolatabu. Eda uqeti meda raica, rogoca, boica, meda biuti keda tale ga ena kedra ituvaki. Nida cakava qori eda na vulica e levu na ka vinaka kei na tikina veiuqeti eda rairai nanuma nida sa kila tu. Nida vakayagataka noda vakasama ena sala qo, eda na vakavinakataka kina noda wili iVolatabu kei na vuli.

(4) Bucina na veikauaitaki.

Na itovo talei na veikauaitaki oya na noda vakila nona rarawa e dua tale. E dau veikauaitaki o Jiova kei Jisu, e dodonu gona meda vakatotomuri rau. (Lako 3:7; Same 72:13) Eda na bucina vakacava na itovo qo? Na sala vinaka duadua oya nida vakayagataka noda vakasama. De dua eda se sega ni vakila na ka era sotava na tacida. Ia o rawa ni taroga: ‘Na cava ena yaco niu sotava na ituvaki qo? Na cava au vinakata?’ Nida vakasamataka na isaunitaro qori ena uqeti keda meda dau veikauaitaki. Ena yaga dina na itovo qo ena noda bula vaKarisito, wili kina noda cakacaka vakaitalatala kei na veimaliwai kei ira na tacida.

(5) Vakasamataka na bula ena vuravura vou.

E vakamacalataki ena iVolatabu na bula e yalataka na Kalou ena vuravura vou. (Aisea 35:5-7; 65:21-25; Vkta. 21:3, 4) E tabaki tale ga ena noda ivola e levu na kena droini totoka. Na vuna? Na droini e uqeta noda vakasama, meda raica kina na veika eda na marautaka ena gauna ya. Na Dauveibuli o Jiova e kila vinaka na yaga ni noda vakasama. Nida vakayagataka gona meda vakananuma kina na veika e yalataka, eda nuidei ni na yaco dina, ena uqeti keda tale ga meda yalodina, se vosota na veika dredre ena gauna qo.

Ni dauloloma o Jiova, e solia vei keda na vakasama. E yaga dina meda qaravi koya vinaka kina ena veisiga. Meda vakavinavinakataka mada ga na iloloma talei qo nida vakayagataka vakavuku ena veisiga.