NA ITUKUTUKU e volai ena Vakatekivu 22:6 e vakamacalataki kina ni “taura na buka na isoro kama o Eparama qai vakacolata vei Aisake na luvena. E qai taura e ligana na bukawaqa kei na isele, erau qai gole yani.”

E sega ni cavuti ena iVolatabu na iwalewale e vakayagataki ena gauna makawa me waqa kina na buka. Me baleta na tikina qori, e kaya e dua na daunivakamacala ni “dredre me waqa” tiko ga na buka ena nodrau “ilakolako balavu” o Eparama kei Aisake. E nanumi kina ni rairai dusia tiko qori na iyaya e vakayagataki me waqa tiko ga kina na buka.

Era tukuna eso tale, ni sega ni cakacaka rawarawa na vakawaqa buka ena gauna makawa. Ena rawarawa cake vei ira na lewenivanua mera kerea vei ira na tiko veitikivi na qilaiso katakata me waqa kina na buka. Era vakabauta eso na daunivakadidike ni rairai kauta tiko o Eparama na kuro e vesu ena sinucodo qai tawa tiko kina na qilaiso katakata a vakayagataki mai na bogi. (Aisea 30:14) Na sala qori e rawa kina na vakawaqa buka ena dua na ilakolako balavu.