E yalataka ni na vakaduavatataki na matanitu o Isireli nira sa lesu ina Vanua Yalataki. E parofisaitaki tale ga kina na nodra vakaduavatataki na tamata ni Kalou ena iotioti ni veisiga.

A tukuna vei Isikeli o Jiova me volavola ena rua na kau. Me vola ena dua na kau, “Na nei Juta kei ira na Isireli era tokoni koya.” Dua tale me vola kina, “Na nei Josefa, na kau nei Ifireimi, kei ira kece na vuvale ni Isireli era tokoni koya.” Na rua na kau e taura tu o Isikeli ena yaco me “dua ga na kau.”—Isik. 37:15-17.

 Na cava e vakatayaloyalotaka na vosa “Ifireimi”? O Jerepoami na imatai ni tui ena tini na yavusa kei Isireli ena vualiku, e cavutu mai na yavusa o Ifireimi, e yavusa kaukaua. (Vkru. 33:13, 17; 1 Tui 11:26) E basika mai na yavusa qo na luve i Josefa o Ifireimi. (Tiko 1:32, 33) A vakalougatataki Josefa vakalevu na tamana o Jekope. E veiganiti kina me vakatokai na kau e matataka na matanitu yavusa e tini me “kau nei Ifireimi.” Ni qai volatukutukutaka o Isikeli na parofisai me baleta na rua na kau, era sa kauti ira makawa na matanitu kei Isireli ena vualiku na kai Asiria ena 740 B.G.V. (2 Tui 17:6) E levu gona vei ira na Isireli qori era sa veituyaki ena vanua qali e Papiloni, e isosomi ni Matanitu o Asiria.

Ena 607 B.G.V., era kau vakavesu i Papiloni na matanitu yavusa e rua mai na ceva, de dua eso tale ga na kena vo mai na matanitu ena vualiku. Era basika mai na yatukawa i Juta na tui era veiliutaki ena rua na yavusa qo, era dau veitokoni kei na matabete, nira veiqaravi na bete ena valenisoro e Jerusalemi. (2 Vei 11:13, 14; 34:30) E veiganiti kina me vakatayaloyalotaka na kau “nei Juta” na matanitu yavusa e rua.

Gauna cava erau qai sema kina vakaivakatakarakara na kau qo? Nira lesu e Jerusalemi na Isireli mera tara tale na valenisoro ena 537 B.G.V., era lesu vata eso na ilawalawa mai na yavusa e rua kei na yavusa e tini. Sa sega nira qai tawase na luvei Isireli. (Isik. 37:21, 22) Era sa duavata tale na sokaloutaki Jiova. Rau parofisaitaka tale ga o Aisea kei Jeremaia na veivakaduavatataki qo.—Aisea 11:12, 13; Jere. 31:1, 6, 31.

Na ka dina cava me baleta na sokalou savasava e vakabibitaki ena parofisai qo? O Jiova ena raica mera “dua ga” nona dauveiqaravi. (Isik. 37:18, 19) Vakacava e dina tale ga nikua na yalayala qo? Io. A vakayacori taumada na parofisai ena 1919, nira tuvanaki tiko qai vakaduavatataki tale na dauveiqaravi ni Kalou. E seva na inaki i Setani me vakaleqa noda duavata.

Ena gauna ya, levu vei ira na vakaduavatataki tale era nuitaka mera tui, mera bete kei Jisu e lomalagi. (Vkta. 20:6) Era vaka na kau nei Juta. Ni toso na gauna, levu vei ira na nuitaka na bula e vuravura era tokoni ira na Jiu vakayalo qori. (Saka. 8:23) Era vaka na kau nei Josefa, era sega ni veiliutaki kei Karisito.

Era duavata ni qaravi Jiova nikua na ilawalawa e rua qo, e dua ga nodra Tui o Jisu Karisito, me vaka e parofisaitaki me “noqu tamata o Tevita.” (Isik. 37:24, 25) E masuta o Jisu mera “duavata” na nona imuri, me ‘vaka ga na nona duavata o Tamana kei koya, kei na nona duavata kei Tamana.’ * (Joni 17:20, 21) E parofisaitaka tale ga o Jisu ni nona qelenisipi lailai era lumuti era na “dua ga na qelenisipi” kei ira na ‘so tale na sipi.’ Ena ‘dua ga na nodrau ivakatawa.’ (Joni 10:16) E macala mai na vosa i Jisu na duavata vakayalo eda vakila tu nikua na dauveiqaravi ni Kalou, se mani duidui sara na noda inuinui!