1, 2. Sala cava e vakavinavinakataka kina na yapositolo o Paula na loloma soli wale ni Kalou?

E RAWA ni tukuna vakadodonu na yapositolo o Paula: “E sega . . . ni maumau na nona loloma soli wale vei au [na Kalou].” (Wilika 1 Korinica 15:9, 10.) E kila vinaka o Paula ni sega ni rawata se ganiti koya na loloma levu ni Kalou, vakabibi ni dautusaqati ira e liu na lotu vaKarisito.

² Ni bera ni takali o Paula, a vola vua na nona itokani vakacakacaka o Timoci: “Au vakavinavinaka vei Karisito Jisu na noda Turaga, o koya e vakaukauataki au, ni okati au meu yalodina ni lesi au ena cakacaka vakaitalatala.” (1 Tim. 1:12-14) Na cakacaka vakaitalatala cava? Dikeva na ka e okati kina ena ka e tukuna o Paula vei ira na qase ni ivavakoso e Efeso: “E sega ni dua na ka vei au na noqu bula, e bibi ga meu vakaotia na noqu itavi kei na cakacaka vakaitalatala e lesi au kina na Turaga o Jisu, oya meu vunautaka vakavinaka sara na  itukutuku vinaka ni loloma soli wale ni Kalou.”—Caka. 20:24.

3. Na cakacaka bibi cava a lesi vei Paula? (Raica na imatai ni iyaloyalo.)

³ Na “itukutuku vinaka” cava e vunautaka o Paula e vakabibitaki kina na loloma soli wale i Jiova? E tukuna vei ira na lotu vaKarisito e Efeso: “Oni sa rogoca niu nuitaki meu vukei kemuni me yaga vei kemuni na loloma soli wale ni Kalou.” (Efeso 3:1, 2) E vakaroti o Paula me tukuna na itukutuku vinaka vei ira na sega ni Jiu, me rawa nira okati kei ira na veiliutaki kei Karisito ena Matanitu vakaMesaia. (Wilika Efeso 3:5-8.) Nona gumatuataka o Paula na cakacaka vakaitalatala, e ivakaraitaki vinaka kina vei keda nikua. E vakaraitaka tale ga ni sega ni “maumau” vua na loloma soli wale ni Kalou.

4, 5. Na cava eda kaya kina ni tautauvata ‘na itukutuku vinaka ni Matanitu ni Kalou’ kei na itukutuku vinaka ni “loloma soli wale ni Kalou”?

⁴ Eda vakaroti na dauveiqaravi i Jiova ena gauna ni vakataotioti meda vunautaka “na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece.” (Maciu 24:14) Na itukutuku eda vakasavuya e “itukutuku vinaka” tale ga “ni loloma soli wale ni Kalou.” Na vuna? Ni veivakalougatataki kece eda nuitaka tu ena veiliutaki ni Matanitu ni Kalou, e ivakaraitaki ni yalololoma i Jiova ena vuku i Karisito. (Efeso 1:3) Vakacava eda vakatotomuria tiko nona vakavinavinakataka o Paula na loloma soli wale i Jiova ena nona guta na cakacaka vakaitalatala?—Wilika Roma 1:14-16.

⁵ Eda vulica ena ulutaga sa oti na yaga ni loloma soli wale i Jiova nida ivalavala ca. E noda itavi gona meda vakatetea na sala e vakaraitaka kina o Jiova na nona loloma kei na kena yaga. Na cava eso tale na ka e vauci ena loloma soli wale ni Kalou meda vukei ira kina eso mera vakavinavinakataka?

6, 7. Nida vakamacalataka na ivoli, eda sa vakatetea tiko vakacava na itukutuku vinaka ni loloma soli wale ni Kalou?

⁶ Nodra sega ni maduataka e levu na nodra valavala ca ena vuravura torosobu qo, era sega kina ni kila na bibi ni nodra vakabulai. Ia e levu tale era sega ni marautaka na ivakarau ni bula ya. Ni bera nira veivosaki kei keda na iVakadinadina i Jiova, levu era sega tu ni kila na ibalebale ni ivalavala ca, sala e tarai ira kina, kei na ka mera cakava mera sereki kina. Era lomavakacegu na yalomalumalumu nira kila na levu ni loloma i Jiova kei na nona loloma soli wale ni tala mai vuravura na Luvena me voli keda mai na ivalavala ca kei na mate.—1 Joni 4:9, 10.

⁷ E vola kina o Paula me baleta na luve duabau i Jiova: “Ena vukuna [o Jisu] ga eda sereki kina ena ivoli, ya na nona dra e vosoti kina na noda cala me vaka na levu ni nona loloma soli wale [o Jiova].” (Efeso 1:7) Na isoro ni veivoli i Karisito e ivakadinadina levu ni nona lomani keda na Kalou kei na nona loloma soli wale. E veivakacegui dina nida kila ke da vakaraitaka noda vakabauta na dra vakadavei i Jisu, ena vosoti kina noda ivalavala ca, ena savasava tale ga noda lewaeloma! (Iper. 9:14) Sa bau itukutuku vinaka dina meda wasea!

8. Na cava meda vakaduavatataki kina kei na Kalou?

⁸ E noda itavi meda tukuna vei ira na tamata ni rawa nira veitokani vinaka kei na Dauveibuli. Ni bera nida vakaraitaka nida vakabauti Jisu, e okati keda tu na Kalou meda kena meca. E vola na yapositolo o Joni: “Ena bula tawamudu o koya e vakaraitaka ni vakabauta na Luvena, o koya e talaidredre vua na Luvena ena sega ni vakabulai, ena tiko ga vua na cudru ni Kalou.” (Joni 3:36) Ia ena vuku ni isoro i Karisito eda rawa kina ni vakaduavatataki kei na Kalou. E tukuna o Paula: “Oni a yawaka tu na Kalou, oni meca, ni oni dau vakasamataka na ka ca. Qo oni sa mai vakaduavatataki tale ena vuku ni yago i koya a solia nona bula me vakamatei.”—Kolo. 1:21, 22.

9, 10. (a) Na itavi cava e lesi ira kina na tacina lumuti o Karisito? (b) Era vukei ira vakacava na tacidra lumuti na ‘so tale na sipi’?

⁹ Me vaka e tukuna o Paula, e lesi ira na tacina lumuti i vuravura o Karisito ena “itavi ni veivakaduavatataki.” E vakamacalataka kina o Paula vei ira na lotu vaKarisito lumuti taumada: “Na ka kece e vakavuna na Kalou, o koya e vakaduavatataki keitou tale vua ena vuku i Karisito, qai solia vei keitou na itavi ni veivakaduavatataki, ya me keitou tukuna yani ni Kalou e vakaduavatataka na vuravura vua ena vuku i Karisito, e sega ni nanuma tiko ga na nodra ivalavala ca, e lesia tale ga vei keitou na vosa ni veivakaduavatataki. O keitou na mata, keitou matataki Karisito, ni keitou veivakauqeti e sa veivakauqeti sara tiko ga na Kalou. Ni keitou matataki Karisito keitou vakamasuti kemuni kina: ‘Moni mai duavata tale kei na Kalou.’”—2 Kor. 5:18-20.

¹⁰ E ka dokai vei ira na ‘so tale na sipi’ mera vukei ira na tacidra lumuti ena cakacaka vakaitalatala. (Joni 10:16) Nira italai i Karisito na ‘so tale na sipi,’ era qarava e dua na iwase levu ni veivakavulici vakayalo kei na nodra vukei na tamata mera veiwekani kei Jiova. Qori e tiki bibi ni kena vunautaki vakavinaka sara na itukutuku vinaka ni loloma soli wale ni Kalou.

11, 12. Na cava e itukutuku vinaka kina vei ira na tamata ni rawa nira masuti Jiova?

¹¹ E levu era masu baleta ni vakacegui ira, ia era sega ni vakabauta me rogoca na Kalou. E bibi mera kila ni “Daurogo masu” o Jiova. E vola na daunisame o Tevita: “Kemuni na Daurogo masu, era na lako mai vei kemuni na tamata kece. Au sega ni taqea rawa na noqu cala, ia oni ubia na neimami valavala ca.”—Same 65:2, 3.

¹² E tukuna o Jisu vei ratou nona tisaipeli: “Na ka kece ga dou kerea ena yacaqu, au na cakava.” (Joni 14:14) Na matavosa “ka kece” e vakaibalebaletaka na ka kece e salavata kei na loma i Jiova. E vakadeitaka vei keda o Joni: “Ena levu ni noda nuitaki koya, eda kila se cava ga eda kerea me salavata kei na lomana, ena rogoci keda o koya.” (1 Joni 5:14) E ka marautaki dina meda tukuna vei ira na tamata ni masu e sega ni dua ga na ka me vakaceguya noda vakasama, ia e ka talei meda torovi Jiova ena nona “idabedabe vakaturaga ni loloma soli wale”! (Iper. 4:16) Nida vakavulici ira ena ivakarau dodonu ni masu, o cei mera torova, kei na ka e dodonu  mera masuta, eda sa vukei ira sara tiko ga mera volekati Jiova, mera vakacegui tale ga nira rarawa.—Same 4:1; 145:18.

13, 14. (a) Na itavi dokai cava ena soli vei ira na lumuti ena gauna se bera mai? (b) Na ka totoka cava era na cakava na lumuti ena vukudra na kawatamata?

¹³ Na loloma soli wale i Jiova ena sega ni yala ga ena ivakataotioti ni ituvaki kei vuravura qo. Me baleta na itavi dokai e solia na Kalou vei ira na le 144,000 era na lai veiliutaki kei Karisito ena Matanitu vakalomalagi ni Kalou, e tukuna kina o Paula: “Ena levu ni nona kauaitaki keda na Kalou kei na levu ni nona lomani keda, e vakabulai keda meda duavata kina kei Karisito, dina nida mate tu ena noda cala—oni vakabulai ena nona loloma soli wale. E vakaturi keda vata qai vakatikori keda vata ena itikotiko vakalomalagi, nida imuri i Karisito Jisu, koya gona ena ivakarau ni bula ena gauna se bera mai ena qai uasivi sara na nona loloma soli wale kei na nona yalovinaka vei keda nida duavata kei Karisito Jisu.”—Efeso 2:4-7.

¹⁴ Sa wacava na totoka ni ka sa vakarautaka tu o Jiova me baleti ira na lumuti nira na dabe ena idabedabe vakatui ra qai veiliutaki kei Karisito mai lomalagi. (Luke 22:28-30; Fpai. 3:20, 21; 1 Joni 3:2) Ena “uasivi sara” na “loloma soli wale” ena vakaraitaka vei ira o Jiova. Era na lewe ni “Jerusalemi Vou,” na yalewavou i Karisito. (Vkta. 3:12; 17:14; 21:2, 9, 10) Era na tomani Jisu ena nodra ‘vakabulai na veimatanitu,’ nira dusimaki ira na talairawarawa mera galala mai na revurevu ni ivalavala ca kei na mate, era na tuberi ira tale ga me yacova nira sa uasivi.—Wilika Vakatakila 22:1, 2, 17.

15, 16. Ena vakaraitaka vakacava o Jiova nona loloma soli wale vei ira na ‘so tale na sipi’ ena gauna se bera mai?

¹⁵ Eda dikeva ena Efeso 2:7 ni loloma soli wale ni Kalou ena qai yaco “ena ivakarau ni bula ena gauna se bera mai.” Sa na vakadinadinataki ga ena vuravura vou i Jiova na kena “uasivi sara na nona loloma soli wale.” (Luke 18:29, 30) Dua na ivakaraitaki levu ni yalololoma i Jiova e vuravura oya na nodra vakaturi na tamata mai na “iBulubulu.” (Jope 14:13-15; Joni 5:28, 29) Era na vakaturi mera bula ra qai qaravi Jiova tiko ga o ira na yalodina era takali ni bera ni mate vakaisoro o Karisito kei ira na ‘so tale na sipi’ era mate ena yalodina ena ivakataotioti ni veisiga.

¹⁶ Era na vakaturi tale ga na vica na milioni era sega ni kila na Kalou. Ena soli vei ira na gauna mera vakamalumalumu ina veiliutaki i Jiova. E vola o Joni: “Au qai raici ira na mate, na vetaicake kei na vetaira, nira duri tu ena mata ni idabedabe vakaturaga, qai dola eso na ivolavivigi. Ia e dola e dua tale na ivolavivigi, na ivolavivigi ni bula. Era lewai na mate ena veika e volai tu ena ivolavivigi me salavata kei na ka era cakava. E qai solia mai o wasawasa na mate era tu kina, e solia tale ga mai o mate kei na iBulubulu na mate era tu kina, era qai lewai yadua me salavata kei na ka era cakava.” (Vkta. 20:12, 13) Ena vinakati vei ira na vakaturi mera vulica na sala era na muria kina na ivakavuvuli vakaivolatabu. Mera muria tale ga na yaga ni ivakaro vou ena “ivolavivigi,” ni na vakamacalataka na ka e vinakati  meda bula kina ena vuravura vou. Na ka e tiko ena ivolavivigi qo ena laurai tale kina na loloma soli wale i Jiova.

17. Na cava meda vakasamataka tiko nida cakacaka vakavunau?

¹⁷ Ni sa voleka na icavacava, sa qai bibi ga noda vunautaka na itukutuku vinaka ni Matanitu ni Kalou! (Mari. 13:10) E vakabibitaki na loloma soli wale i Jiova ena itukutuku vinaka. Qori na ka meda vakasamataka tiko nida lai vunau. Me noda inaki me rokovi kina o Jiova. Eda cakava qori nida tukuna vei ira na tamata ni ka kece e yalataki me baleta na veivakalougatataki ena vuravura vou, e dusia na vakatubuqoroqoro ni loloma i Jiova.

18, 19. Eda na vakalagilagia vakacava na loloma soli wale i Jiova?

¹⁸ Nida vunau, meda vakamacalataka ni na uasivi na yaga ni isoro ni veivoli vei keda na kawatamata ena veiliutaki i Karisito, ena vakalesui tale ga vakamalua na bula uasivi. E kaya na iVolatabu: “Mera sereki tale ga na kabuli mai na nodra bobula tu ina ca, mera qai vakila na galala lagilagi era vakila tu na luve ni Kalou.” (Roma 8:21) Ena rawa ga qori ena levu ni nona loloma o Jiova.

¹⁹ E ka dokai meda wasea na yalayala veivakurabuitaki ena Vakatakila 21:4, 5: “[Na Kalou] ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.” E qai kaya o Jiova e dabe tiko ena nona idabedabe vakaturaga: “Raica! Au sa vakavoutaka na ka kece.” E kaya tale ga: “Vola, e donu na vosa qo, e dina tale ga.” Nida gumatua meda vunautaka na itukutuku vinaka qori, eda sa vakalagilagia tiko na loloma soli wale i Jiova!