1. Na cava e dodonu ga kina me nei Jiova na ka kece? (Raica na imatai ni iyaloyalo.)

NA KA kece e nei Jiova! E nona “na lomalagi, na veilomalagi, na vuravura kei na ka kece e tu kina.” (Vkru. 10:14; Vkta. 4:11) Koya gona, eda nei Jiova na kawatamata kece nida buli tale ga. (Same 100:3) Ia ena ivolatukutuku ni bula ni kawatamata, e tiko e dua na ilawalawa e vakasakiti nona vakarautaki ira o Jiova mera nona.

2. O cei e cavuti ena iVolatabu nira ka talei era nei Jiova?

² Kena ivakaraitaki, na Same 135 e vakamacalataki ira na dausokalou i Jiova e Isireli makawa mera “nona iyau talei.” (Same 135:4) E parofisaitaka na ivola i Osea nira na wili tale ga mera dauveiqaravi i Jiova eso na kai veimatanitu era sega ni Jiu. (Osea 2:23) A vakayacori na parofisai qori ena gauna e digi ira kina na kai veimatanitu o Jiova mera veiliutaki tale ga kei Karisito. (Caka. 10:45; Roma 9:23-26) Na “matanitu tabu” qo e “taukena sara ga” o Jiova ena dua na sala vakasakiti, nira lumuti ena yalo tabu ra qai digitaki mera bula i lomalagi. (1 Pita 2:9, 10) Ia vakacava o ira na lotu vaKarisito yalodina e sega ni tukuni rawa na kedra levu e nodra inuinui mera bula e vuravura? O Jiova e vakatokai ira  tale ga mera nona “tamata” kei na nona ‘digitaki.’—Aisea 65:22.

3. (a) O cei nikua era veiwekani voleka kei Jiova? (b) Na cava eda na veivosakitaka ena ulutaga qo?

³ Nikua, era nuitaka na bula i lomalagi na “qelenisipi lailai,” o ira na ‘so tale na sipi’ era na bula e vuravura, era okati mera “dua ga na qelenisipi” e vakamareqeta o Jiova me nona. (Luke 12:32; Joni 10:16) Macala ga nida vakavinavinakataki Jiova vakalevu ni vakadonuya meda veiwekani kei koya. Ena veivosakitaki ena ulutaga qo eso na sala eda rawa ni vakavinavinakataki koya kina.

4. Na cava e dua na sala eda rawa ni vakavinavinakataki Jiova kina, a vakaraitaka tale ga vakacava qori o Jisu?

⁴ Eda vakaraitaka na noda vakavinavinaka ni vu mai lomada noda yalataki keda vei Jiova. Nida papitaiso ena wai eda vakaraitaka kina e matanalevu ni sa taukeni keda na Kalou, eda na yalorawarawa ni vakamalumalumu vua. (Iper. 12:9) A cakava tale ga qori o Jisu ni papitaiso, e kaya vei Jiova: “Au marautaka vakalevu meu cakava na lomamuni.” (Same 40:7, 8) A sucu o Jisu ena matanitu e yalayala vua na Kalou, ia e soli koya me cakava na loma i tamana.

5, 6. (a) Na cava e cakava o Jiova ni papitaiso o Jisu? (b) Na ka buli kece e nei Jiova, ia e marautaka vakacava nida yalataki keda vua?

⁵ Na cava e cakava o Jiova ni sa papitaiso o Jisu? E tukuni ena iVolatabu: “Ni lamata ga mai wai o Jisu ni papitaiso oti, raica! e tadola na lomalagi, qai raica na yalo ni Kalou ni lako sobu mai vua me vaka na ruve. Raica! E tukuna tale ga e dua na domo mai lomalagi: ‘Qo na Luvequ lomani, au vakadonuya.’” (Maciu 3:16, 17) Sa nei Jiova oti tu o Jisu, ia e marau na Tamana vakalomalagi me raica na yalorawarawa i luvena me cakava vakatabakidua na loma ni Kalou. O Jiova tale ga e marautaka me ciqoma noda yalayala, ena rokovi keda ni vakalougatataki keda.—Same 149:4.

⁶ Vakasamataka mada ke tea e dua na turaga e levu na senikau rairai totoka ena nona lomanibai. Dua na siga e betia e dua na senikau qori o luvena yalewa lailai qai solia vua me nona iloloma. E nona ga o tama na senikau qori, se vakaevei? A rawa vakacava me solia o goneyalewa na ka e nei tamana? Na tama dauloloma ena sega vakadua ni taroga qori. Ena marautaka ga me ciqoma na iloloma, ni vakaraitaka na loloma i luvena yalewa. Vei ira kece na senikau ena lomanibai, ena vakamareqeta duadua o tama na iloloma i luvena. E sega tale ga ni tukuni rawa na levu ni marau i Jiova nida yalorawarawa meda yalataki keda vakatabakidua vua.—Lako 34:14.

7. E vakamacalataka vakacava o Malakai na rai i Jiova me baleti ira na tu vakarau mera qaravi koya?

⁷ Wilika Malakai 3:16. Ke o se bera ni yalayala qai papitaiso, vakasamataka mada na bibi ni ikalawa qori. Macala ga ni gauna eda buli kina, eda sa nei Jiova vaka kina o ira na vo ni kawatamata. Ia vakasamataka mada na levu ni nona marau o Jiova ni o doka nona veiliutaki, o yalataka sara kina nomu bula qai cakava na lomana. (Vkai. 23:15) O Jiova e kilai ira vinaka na tu vakarau mera qaravi koya, ena vola na yacadra ena nona “ivola ni ivakananumi.”

8, 9. Na cava e namaka o Jiova vei ira na volai na yacadra ena “ivola ni ivakananumi”?

⁸ Me rawa ni volai na yacada ena “ivola ni ivakananumi” i Jiova, e tiko na  ka meda cakava. A vakamatatataka o Malakai ni dodonu meda ‘dokai Jiova qai vakananuma tiko na yacana.’ Ke da sokaloutaka tale e dua se dua na ka, sa na boko na yacada mai na ivola ni bula i Jiova.—Lako 32:33; Same 69:28.

⁹ Koya gona na noda yalayala vua na Kalou e sega ni okati wale ga kina noda bubului nida na cakava na lomana se meda papitaiso ena wai. E lekaleka ga qori, ena oti yani. Ena vinakati meda vakaraitaka tiko ga nida to vei Jiova, qori nida talairawarawa ena gauna qo kei na gauna se bera mai—na gauna taucoko eda bula kina.—1 Pita 4:1, 2.

10. Na duidui cava me laurai vei ira na qaravi Jiova kei ira na sega?

¹⁰ A veivosakitaki ena ulutaga sa oti na ivakaraitaki i Keni, Solomoni kei ira na Isireli. O ira kece qo era kaya nira sokaloutaki Jiova, ia e sega ni vinaka sara nodra veiqaravi. Na cava eda vulica kina? O ira kece e taukeni ira o Jiova e dodonu mera dei ni totaka na ka e vauca na veika dodonu ra qai cata na veika ca. (Roma 12:9) Sa rauta ni gauna e cavuta oti kina o Malakai na “ivola ni veivakananumi,” e cavuta sara o Jiova na “kedrau duidui na tamata yalododonu kei na tamata ca, o koya e qarava na Kalou kei koya e sega ni qaravi koya.”—Mala. 3:18.

11. Na cava mera raica kina na tamata nida qaravi Jiova vakatabakidua?

¹¹ Qo e dua tale na sala eda vakavinavinakataki Jiova kina ni digitaki keda meda nona tamata. E dodonu mera “raica na tamata kece” noda toso vakayalo. (1 Tim. 4:15; Maciu 5:16) Mo taroga: ‘Era raica eso tale niu totaki Jiova vakatabakidua? Au dau qara na sala meu vakatakilai au kina niu iVakadinadina i Jiova?’ O Jiova e digitaki keda meda nona dauveiqaravi, ena rarawa vakalevu ke da lomalomarua ni tukuna vei ira na so tale nida nona.—Same 119:46; wilika Marika 8:38.

12, 13. Na cava era cakava eso e sega kina nira kilai mera iVakadinadina i Jiova?

¹² Ka ni rarawa ni ka era cakava eso, e sega ni kilai kina na ‘kedra duidui na qaravi Jiova kei ira na sega,’ qo  ena nodra muria “na yalo ni vuravura.” (1 Kor. 2:12) Qori na yalo e salavata kei ‘na gagadre ni yagoda.’ (Efeso 2:3) Kena ivakaraitaki, eda dau vakasalataki vakavica ena isulusulu kei na sasauni, ia eso era se tokara tiko ga na kena e sega ni rakorako. Era dara na isulu e kabita se laurai levu kina na yagodra, qo ena soqo sara ga vaKarisito. Se duatani sara tu nodra ikotikoti kei na icakacaka ni uludra. (1 Tim. 2:9, 10) Cava e yaco kina? Nira lai tiko vakalewe levu, e dredre me kilai nira nei Jiova se “veitokani kei vuravura.”—Jeme. 4:4.

¹³ Qo eso tale na sala era vakaraitaka kina eso na iVakadinadina i Jiova nira sega ni cata na ivalavala vakavuravura. Kena ivakaraitaki, e laurai ena nodra dadanisi kei na nodra ivalavala ena pati ni sega ni vaKarisito. Era biuta na kedra itaba se ivakamacala ena sala ni veitaratara ena veilawa (internet), ni sega ni kilikili vei ira na tamata vakayalo. De dua era na sega ni vakadodonutaki ena ivavakoso me vaka e dau caka vei ira na cala bibi, ia e rawa nira vakaleqa nodra toso vakayalo o ira na saga tiko me savasava nodra qaravi Jiova.—Wilika 1 Pita 2:11, 12.

14. Na cava e bibi meda cakava ke da via taqomaka noda veiwekani talei kei Jiova?

¹⁴ Dua na ka nona togoraka o vuravura “na gagadre ni yago, na gagadre ni mata, kei na nona dokadokataka e dua na ka e taukena.” (1 Joni 2:16) Ia me vaka nida nei Jiova, eda vakamasuti meda “biuta na ka kece e sega ni salavata kei na loma ni Kalou kei na gagadre ca vakavuravura, e vakavulici keda tale ga meda yalomatua, meda yalododonu, meda qarava na Kalou nida tu ena vuravura qo.” (Taito 2:12) Me laurai mada ga ena ka kece eda cakava, na noda ivosavosa, noda kana, gunu, isulusulu, sasauni kei na ivakarau ni cakacaka nida qaravi Jiova vakatabakidua.—Wilika 1 Korinica 10:31, 32.

15. Na cava meda kauaitaki ira kina na tacida vakayalo qai lomani ira?

¹⁵ Ke da vakavinavinakataka na noda veiwekani talei kei Jiova, ena laurai  tale ga ena noda ivalavala vei ira na tacida vakayalo. Me nanumi nira nei Jiova tale ga. Ke da nanuma dei tiko qori, eda na kauaitaki ira na tacida qai lomani ira. (1 Ces. 5:15) E kaya o Jisu vei ira na nona imuri: “Na ka qo era na kila kece kina ni dou noqu tisaipeli, ke dou veilomani.”—Joni 13:35.

16. Na ivakaraitaki cava ena Lawa i Mosese e dusia na rai i Jiova me baleti ira nona dauveiqaravi?

¹⁶ Me rawa ni matata vei keda na bibi ni noda kauaitaki ira na tacida ena ivavakoso, meda dikeva mada na ivakaraitaki qo: Na iyaya ni valenisoro era vakatabui vei Jiova, se vakayagataki ga vakatabakidua ena sokalou savasava. E vakamacalataki ena Lawa e vola o Mosese na sala me maroroi se qaravi kina na iyaya qori, ke dua e beca ena totogi mate. (Tiko 1:50, 51) Na iyaya e dau vakayagataki ena sokalou e ka mate, ia ke kauaitaka o Jiova na kena taqomaki sa qai wacava na nona taqomaki ira nona dausokalou yalodina e digitaka mera nona! Ni vosa vei ira nona dauveiqaravi, e kaya o Jiova: “O koya e tarai kemuni e tara na loa ni mataqu.”—Saka. 2:8.

17. Na cava e ‘raica qai rogoca’ tiko o Jiova?

¹⁷ E vakamacalataka o Malakai ni o Jiova e “vakarorogo tiko qai vakatudaliga” nira veivosaki nona dauveiqaravi. (Mala. 3:16) Io, o Jiova e “kilai ira na nona tamata.” (2 Tim. 2:19) E kila vinaka na veika kece eda cakava kei na ka eda cavuta. (Iper. 4:13) Ke da sega ni lomani ira na tacida vakayalo, e “vakarorogo tiko” o Jiova qai “vakatudaliga” kina. Nida veikauaitaki, lomasavu, veivosoti da qai yalololoma, eda nuidei ni kila tiko qori o Jiova.—Iper. 13:16; 1 Pita 4:8, 9.

18. Eda na vakavinavinakataki Jiova vakacava ni dokai keda meda nona dauveiqaravi?

¹⁸ Macala ga nida na via vakavinavinakataki Jiova ena nona dokai keda nida nona dauveiqaravi. Eda vakadinata ni ka vakayalomatua meda vakaraitaka nida nei Jiova, qori ena noda yalorawarawa ni yalataki keda vua. Nida bula “ena kedra maliwa na itabatamata takelo qai talaidredre,” eda vinakata mera raica eso nida ‘sega ni beitaki ena dua na ka qai tawacala nida rarama tiko yani me vaka na cina.’ (Fpai. 2:15) Eda dei nida cata na veika ca. (Jeme. 4:7) Eda lomani ira na tacida, eda dokai ira nira nei Jiova tale ga.—Roma 12:10.

19. E vakaicovitaki ira vakacava na nona dauveiqaravi o Jiova?

¹⁹ E yalataka na iVolatabu: “O Jiova ena sega ni biuti ira nona tamata.” (Same 94:14) Na veivakadeitaki qori ena sega vakadua ni daro, ke dredre vakacava na ituvaki. O mate mada ga ena sega ni tarova vakadua nona lomani keda o Jiova. (Roma 8:38, 39) “Ke da bula, eda bula ena vuku i Jiova, ke da mate, eda mate ena vuku i Jiova. O koya gona, se da bula se da mate, eda nei Jiova.” (Roma 14:8) Io, eda vakanamata ena siga ena vakaturi ira kina na nona dausokalou yalodina era sa takali. (Maciu 22:32) Ena gauna mada ga qo, eda sa vakalougatataki vakalevu. Me vaka ga e tukuna na iVolatabu, “e marau na matanitu e nona Kalou o Jiova, na matatamata e digitaka o koya mera nona ivotavota.”—Same 33:12.