ENA dua na tauni lailai e Gujarat mai Idia, e tiko kina o John, e lima tale na tacina kei na ganena, kei tinadratou. Eratou lotu Katolika kaukaua, ia e iVakadinadina i Jiova o tamadratou, ni a papitaiso ena icavacava ni veiyabaki ni 1950. Ratou dau tusaqati koya.

Dua na siga, e talai John o tamana me kauta e dua na waqanivola vua e dua na tacida ena ivavakoso. Ena mataka qori e dolava o John e dua na dramu levu qai mavoa kina na ligana. Ia ni vinakata me talairawarawa vei tamana, e mani vadretitaka na mavoa ena dua na tikinisulu qai taubale me kauta na waqanivola.

E yaco o John ena vanua e talai kina, rau mani sota ga kei radinivale, e iVakadinadina i Jiova tale ga, e mani solia vua na waqanivola. E raica sara na liga i John qai tukuna me savata. E savata sara ena wainimate qai vadretitaka. Oti ya e solia e dua na mena bilo ti katakata. Ena gauna kece qori e tukuna tiko vua na itukutuku vakaivolatabu, e vosa tale ga vakayalovinaka.

E tekivu veisau nona dau raicalataki keda na iVakadinadina i Jiova o John. A tarogi radinivale ena rua na ulutaga e duidui mai na vakabauta nei tamana—e Kalou o Jisu, mera masu tale ga vei Meri na lotu vaKarisito. Ni kila na vosanisucu nei John na vosa vaGujarati, e mani sauma vakaivolatabu na nona taro, e solia tale ga vua na ivola lailai “This Good News of the Kingdom.”

E qai wilika o John na ivola qori, e vaka ni se qai rogoca vakadua na ka dina ena iVolatabu. E lako sara vua na bete me taroga na rua na taro ya. E cudru na bete qai viriki koya ena iVolatabu, e kaya vua: “O sa Setani sara ga! Vakaraitaka vei au na tikinivolatabu e dusia ni sega ni Kalou o Jisu. Vakaraitaka mai na vanua e tukuni kina mo kua ni sokalou vei Meri. Vakaraitaka mai!” E kidroa sara ga o John ena ka e cakava na bete, mani tukuna vua, “Au na sega tale ni mai lotu eke.” Qori sara ga na ka e cakava!

A vulica na iVolatabu o John kei ira na tacida, e tokona na sokalou dina ni qaravi Jiova. Toso na gauna eratou mai qaravi Jiova tale ga e vica na lewe ni nona vuvale. Sa oti qo e rauta ni 60 na yabaki, se tiko ga na mawe ni mavoa ena ligana imatau. E sega vakadua ni guilecava na ivakaraitaki ni yalovinaka vaKarisito e uqeti koya ina sokalou savasava.—2 Kor. 6:4, 6.