NI TIKO o Jisu Karisito e Katara, kena irairai ni tiko ena ceva i cake ni Wasawasa o Kalili, rau veivosaki kei na dua na turaga a vinakata me nona imuri. E tukuna vua, “Lako i vale vei ira na wekamu, lai tukuna vei ira na veika e cakava vei iko o Jiova, kei na nona lomani iko.” E vakaraitaka e keri o Jisu ni kila vinaka na noda itovo na tamata—eda taleitaka meda wasea vei ira na wekada na ka eda kauai kina kei na ka e bibi vei keda.—Mari. 5:19.

Eda dau raica tale ga na itovo qori nikua. Ena so na vanua, e laurai levu qori ni vakatauvatani ina so tale. Koya gona, ni dua e mai qarava na Kalou dina o Jiova, ena vinakata sara ga me wasea na nona vakabauta vei ira na wekana. Ia me cakava vakacava? E rawa vakacava ni uqeta na lomadra na wekana e duidui na nodra vakabauta se sega sara ga na nodra lotu? E vakarautaka na iVolatabu na ivakasala vinaka, e yaga tale ga.

Ena imatai ni senitiuri, o Adriu a dua vei ira na imatai me vakatakila ni o Jisu na Mesaia. A qai lai tukuna vei cei? “Na imatai ni ka e cakava e lai raici Saimoni na tacina, e tukuna vua: ‘Keirau sa kunea na Mesaia’ (kena ibalebale, na Karisito).” Mani kauti Pita vei Jisu me rawa tale ga ni dua na tisaipeli.—Joni 1:35-42.

Ni oti e ono na yabaki nona tiko e Jopa o Pita, a sureti me lako ina vualiku i Sisaria me sikova na vuvale i Konilio, na sotia ni Roma. O cei era soqoni voli e kea? “E sa namaki iratou tiko mai o Konilio, ira na wekana, kei ira nona itokani voleka e sureta.” E vakarautaka gona o Konilio vei ira na wekana na sala mera mai rogoca na vosa i Pita mera  qai vakatulewa ena ka era rogoca.—Caka. 10:22-33.

Na cava eda vulica ena ka e cakava o Adriu kei Konilio vei ira na wekadrau?

Erau sega tale ni wawa o Adriu kei Konilio. A liu sara ga o Adriu me kauti Pita vei Jisu, tuvanaka tale ga o Konilio me ratou rogoca na wekana na ka e tukuna o Pita. Ia a sega vakadua ni saga o Adriu kei Konilio me vakasaurarataki ira na wekadrau se me rau moici ira vaqaseqase mera mai imuri i Karisito. Na cava o vulica e ke? Meda saga tale ga meda vakatotomuri rau. Eda rawa tale ga ni wasea vei ira na wekada eso na vakasama da qai vakarautaka na sala mera kila kina na ka dina ena iVolatabu kei ira na tacida vakayalo. Ia eda na rokova tiko ga nodra galala ni vakatulewa, eda na sega ni vakasaurarataki ira. Me rawa nida vukei ira na wekada, meda dikeva mada na nodrau ivakaraitaki e dua na veiwatini mai Jamani, o Jürgen kei Petra.

E vulica na iVolatabu o Petra kei ira na iVakadinadina i Jiova, yaco sara me papitaiso. Na watina o Jürgen, a lewena tu na mataivalu. Ena imatai ni gauna, a sega ni marautaka o Jürgen na vakatulewa i watina. Ni toso na gauna, a qai vakadinata nira vunautaka na iVakadinadina na ka dina e tu ena iVolatabu. Mani yalataka tale ga nona bula vei Jiova. Nikua, e sa qase ni ivavakoso. Na cava e tukuna o Jürgen ni sala vinaka meda uqeta kina na lomadra na wekada e duatani na nodra vakabauta?

E dikeva o Jürgen: “Meda kua vakadua ni vakasaurarataki ira na wekada se surevaka vei ira na veika vakayalo. Qori ena sega tu ga nira taleitaka na dina. Ni toso na gauna, ena rairai vinaka cake mo wasea ga vakalalai vua, me caka tale ga vaqaseqase. E yaga tale ga ke da veikilaitaki ira na tacida vakayalo vei ira na wekada e tautauvata na nodra yabaki ni bula kei na ka era taleitaka. Qori e rawa nira mai kila kina na ka dina.”

E totolo na nodratou veisau na yapositolo o Pita kei na vuvale i Konilio ni ratou rogoca na itukutuku ena iVolatabu. Ia eso tale era rogoca na itukutuku dina ena imatai ni senitiuri, era vinakata me soli vei ira na gauna mera qai vakatulewa malua.

E levu vei ira na wekai Jisu era vakabauti koya ena gauna a vunau voli kina. Kena ivakaraitaki, eratou rairai veitatacini o Jisu kei rau o Jemesa kei Joni, ni tinadrau o Salome e taci Meri na tinai Jisu. Na marama qo a rairai dua vei ira “na yalewa era qaravi iratou [Jisu kei ratou na yapositolo] nira vakayagataka na nodra iyau.”—Luke 8:1-3.

Ia eso tale vei ira na wekai Jisu era sega ni vakabauti koya ena gauna ya. Kena ivakaraitaki, ena dua na gauna ni oti ga e dua na yabaki ni nona papitaiso o Jisu, era soqoni yani e dua na ilala levu ena dua na vale mera rogoci koya. “Ni ratou rogoca na wekana, eratou vinakata me ratou lai kauti koya mai, ni ratou kaya: ‘Sa leqa na nona vakasama.’ ” Ena dua na gauna e muri, ni ratou tarogi Jisu na tacina se vanua cava ena lako kina, e sega ni sauma vakadodonu na nodratou taro. Na vuna? “Eratou sega tiko ni vakabauti koya na tacina.”—Mari. 3:21; Joni 7:5.

Na cava eda vulica ena ka e cakava o Jisu vei ira na wekana? Nira tukuna vua eso ni sa lialia, e sega ni cudru o Jisu. Ni oti nona vakamatei qai vakaturi tale, e uqeti ira vakalevu na wekana na nona rairai  vei Jemesa na tacina vakacabecabe. Na ka e cakava qo e rairai vakadinadinataka vei Jemesa kei ira na vo ni tacina vakacabecabe ni o Jisu dina ga na Mesaia. Koya gona, eratou a tiko kei ratou na yapositolo kei na so tale ena dua na rumu e cake e Jerusalemi, e sobuti ratou tale ga na yalo tabu. Ena dua na gauna e muri, erau qai marautaka o Jemesa kei Juta, e dua tale na taci Jisu vakacabecabe eso tale na itavi dokai.—Caka. 1:12-14; 2:1-4; 1 Kor. 15:7.

Me vaka na imatai ni senitiuri, eso na wekada nikua ena taura na gauna mera qai muria na sala ni bula. Raica mada na ivakaraitaki i Roswitha, e dua na marama a lotu Katolika ena gauna a papitaiso kina o watina ena 1978 me dua na iVakadinadina i Jiova. Ni saga me dei ena nona vakabauta, a dau saqati watina o Roswitha. Ia ni toso na gauna, sa tekivu malumu na nona veitusaqati ni raica nira vakavulica na iVakadinadina na ka dina. Mani papitaiso kina ena 2003. Na cava e vakavuna nona veisau? Sega vakadua ni cudruvaka o watina na nona veitusaqati, ia e solia vua na gauna me veisautaka na nona rai. Na ivakasala cava e tukuna o Roswitha? “E levu sara na ka vinaka e rawati ena noda vosovoso tiko ga vakalevu.”

A papitaiso o Monika ena 1974. Erau mai iVakadinadina tale ga na luvena tagane ni oti e rauta ni tini na yabaki. E sega ni saqata na nodratou vakabauta na tamadratou o Hans, ia a qai papitaiso ena 2006. Me baleta na ituvaki qori, na ivakasala cava eratou tukuna na vuvale? “Kabiti Jiova tiko ga ena yalodina, kua ni soro ni vakatovolei noda vakabauta.” E bibi tale ga me ratou vakadeitaka tiko ga vei Hans na nodratou loloma. Eratou vakanuinui tu ga ni na yaco na gauna ena ciqoma o tamadratou na nodratou vakabauta.

A vakamacalataka o Jisu ena dua na gauna ni itukutuku ni ka dina e vaka na wai e rawati kina na bula tawamudu. (Joni 4:13, 14) Eda vinakata tale ga mera vakabulabulataki na wekada ena wai batabata, na wai savasava ni ka dina. E macala nida sega ni vinakata meda vakaleqai ira tale ena levu ni wai eda solia mera gunuva. Na nodra vakabulabulataki se nodra vakaleqai, ena rairai vakatau sara ga ena sala eda vakamacalataka kina noda vakabauta. E tukuna na iVolatabu ni “lomana na yalododonu sa daunanuma na ka me kaya,” o koya e “vuku sa vakavukuya na gusuna, ka sa kuria nai vakavuvuli ni tebenigusuna.” E rawa vakacava meda bulataka na ivakasala qo?—Vkai. 15:28; 16:23.

Ena rairai vinakata o yalewa me vakamacalataka vei watina na nona vakabauta. Ke “daunanuma na ka me kaya,” ena digia vinaka nona vosa, ena sega ni vosa vakalialia. Me kua ni vakaraitaka ni vakadonui koya ga se ni cecere vei watina. Ke vakasamataka vinaka nona vosa, e rawa ni veivakabulabulataki, rau qai duavata kina vakalevu. Na gauna cava e dau vakacegu kina o watina qai rawarawa ni torovi? Na ulutaga cava e dau taleitaka me veivosakitaka se vakawilika? E taleitaka na veika vakasaenisi, politiki se na qito? Na cava me cakava o yalewa me kauai kina o watina ena iVolatabu, ia me doka tiko ga nona rai kei na ivakarau ni lomana? Nona vakasamataka o yalewa na ka qo, ena vukei koya me vosa, qai cakava na ka ena yalomatua.

Nida via uqeta na lomadra na wekada, e sega ni kena ibalebale meda wasea ga vakalalai na noda vakabauta. Na ka eda tukuna e dodonu tale ga me salavata kei na noda vakaraitaka na itovo vinaka.

E vakamacalataka o Jürgen, sa tukuni oti mai, “Mo muria tiko ga na ivakavuvuli vakaivolatabu e veisiga. Qo e dua na sala yaga e rawa nira kauai kina na wekada, ke mani sega mada ga nira tukuna.” E duavata kina o Hans a papitaiso ni voleka ni oti e 30 na yabaki mai na papitaiso i watina. “E bibi me vinaka tiko ga na noda itovo vaKarisito, mera raica kina na wekada na vinaka ni ka dina ena noda bula.” Mera raica na wekada ni noda vakabauta e vakaduiduitaki keda, mera raica me ka vinaka, sega ni ka ca.

Na yapositolo o Pita e tauca e dua na ivakasala bibi vei ira na yalewa vakawati e sega ni tiko ena vakabauta na watidra: “Moni vakamalumalumu vei ira na dui watimuni, baleta ke ra sega ni talairawarawa ina vosa ni Kalou, ena rawa ni veisautaki ira na nomuni itovo, ke oni sega mada ga ni tukuna e dua na ka, nira na raica ga na nomuni itovo savasava kei na nomuni veidokai dina.  Me kua ni kemuni idivi na veika e sau me vaka na tali drauniulu, na vakaiukuuku koula se na tokari ni isulu e sau, me kemuni idivi ga na tamata e loma, e tokara na isulu e sega ni rusa rawa, ya na lomavakacegu kei na yalomalua, e talei sara ena mata ni Kalou.”—1 Pita 3:1-4.

E vola o Pita ni rawa ni veisau e dua na tagane vakawati ena itovo vinaka i watina. Qori sara ga na idusidusi vakaivolatabu e tovolea me muria o Christa mai na gauna a papitaiso kina ena 1972, ni saga me uqeta na lomai watina ena nona itovo vinaka. A vuli iVolatabu o watina kei ira na iVakadinadina, ia se bera ga ni vakadeitaka me nona na dina. E tikova na soqoni ena so na gauna qai veimaliwai vinaka kei ira na lewe ni ivavakoso. Ena yasana adua, era doka tiko ga na lewe ni ivavakoso na nona dodonu me vakatulewa. Na cava e cakava o Christa me uqeta kina na lomana?

“Au saga sara ga meu muria dei na ka e vinakata o Jiova. Ena gauna vata qori, au saga meu vakamasuti watiqu, sega ena vosa au tauca, ia ena noqu itovo vinaka. Ke sega ni veisaqasaqa kei na ivakavuvuli vakaivolatabu na ka e vinakata, au na saga meu muria. Au doka tale ga nona galala ni vakatulewa qai laiva na kena vo ena liga i Jiova.”

Na ivakaraitaki i Christa e vakavulici keda meda yalorawarawa. E tiko na nona ituvatuva dei ni veika vakayalo, okati kina na soqoni wasoma kei na nona vakaitavi vakalevu ena cakacaka vakavunau. Ia e vakaraitaka tiko ga na veinanumi ena nona kila ni tu vei watina na dodonu me namaka me lomani, me solia nona gauna vua kei na nona kauai. E ka gona vakayalomatua meda dau yalorawarawa da qai veinanumi nida veimaliwai kei ira na wekada era sega ni vakabauta. E tukuna na iVolatabu, “Sa dui vagauna na ka kecega.” Qori e okati kina na gauna o vakayagataka kei ira nomu vuvale, vakabibi vei ira na veiwatini e sega ni tiko ena vakabauta na kedra isa. Ena rawa na veivosaki ke tiko na gauna era vakayagataka vata na veiwatini. Sa vakadinadinataki ni noda dau veivosaki vinaka e sega ni vakilai kina vakalevu na galili, eda na sega ni nanuma nida guilecavi, se vuvu.—Dauv. 3:1.

E raica o Holger ni “bibi meda vakaraitaka nida lomani koya na wekada ya, meda dau masulaki koya tale ga.” A qai papitaiso o tamana ni oti e 20 na yabaki nodratou papitaiso na vo ni nona vuvale. E tukuna tale ga o Christa ni ‘na sega vakadua ni soro me yacova ni sa mai qaravi Jiova o watina qai ciqoma na dina.’ Me donu tu ga na noda rai me baleti ira na wekada eda sega ni vakabauta vata qai salavata kei na vakanuinui.

Me noda inaki me dei tiko ga na keda isema vakaveiwekani, da wasea vei ira na sala mera kila na ka dina, da qai uqeta na lomadra ena itukutuku vakaivolatabu. Na ka kece eda cakava e dodonu meda ‘yalomalua da qai veidokai dina.’—1 Pita 3:15.