E CAKACAKA bibi duadua nikua na kacivaki ni itukutuku vinaka. Ni o dua na dauveiqaravi nei Jiova, o na raica me ka dokai na nomu veivakatisaipelitaki. Ia o na vakadinata ni so na gauna e dredre mera gumatua tiko ga na painia kei ira na dautukutuku.

Eso na dautukutuku era sega ni veivosaki rawa kei ira na itaukeinivale. Levu na gauna e sega ni dua e tiko e vale. Ia nira sotava e dua e vale, e sega ni kauai o itaukeinivale se saqata na itukutuku vinaka ni Matanitu ni Kalou. So tale na dautukutuku era sega ni taqea rawa na levu ni yalava vuavuaivinaka mera vunau kina ra qai leqataka nira na sega ni vakaotia na cakacaka. So tale na lewe ni ivavakoso sa vicasagavulu na yabaki nodra vunau voli, era dau yalolailai nira sega ni namaka me va ya na kena dede.

Meda kurabuitaka nida na sotava na dauveiqaravi kece i Jiova na dredre ena rawa ni vakaseavutaka noda gugumatua ena cakacaka vakavunau? Sega. Vakacava, eda namaka me rawarawa noda tukuna na itukutuku ni veivakabulai ni Kalou ena vuravura e lewa tu na “Vunica” o Setani na Tevoro?—1 Joni 5:19.

Mo nuidei ni na vukei iko o Jiova mo walia na dredre o sotava ni o kacivaka tiko na itukutuku vinaka. Ia na cava mo cakava mo gumatua kina ena cakacaka vakaitalatala? Meda dikeva mada eso na vakatutu.

Era papitaiso e veiyabaki e vicavata na udolu mera iVakadinadina i Jiova. Ke o yalataki iko vua na Kalou ena nomu papitaiso ena dua na gauna lekaleka sa oti, macala ga ni yaga vei iko na nodra ivakaraitaki o ira sa vunau tiko mai ena dua na gauna balavu. Ke o dautukutuku me vicavata na yabaki, vakacava o rawa ni vukei ira na ka vou?

 E kila o Jisu ni dodonu mera dusimaki na nona tisaipeli mera daukaulotu maqosa. E vakaraitaka sara ga na kena icakacaka. (Luke 8:1) E bibi tale ga ena gauna qo mera vakavulici eso tale mera italatala maqosa.

Meda kua ni nanuma ni na maqosa ena veivakavulici na dautukutuku vou ni lako tiko ga ena cakacaka vakavunau. E vinakati me dua e vakavulici koya vakayalololoma. Ena okati ena veivakavulici qo na (1) vakavakarau kei na vakatovotovo, (2) veitalanoa kei na itaukeinivale se dua e tavali tu e gaunisala, (3) solia na ivola, (4) veisikovi lesu, kei na nona (5) tekivuna na vuli iVolatabu. Dau vuavuaivinaka ke dikeva matua na dautukutuku vou na iwalewale e vakayagataka o koya e veivakavulici, me vakatotomuria sara. (Luke 6:40) Ena taleitaka na dautukutuku vou ni dua e tokoni koya tiko me vakarorogo qai veivuke ena gauna veiganiti. Ena yaga tale ga vua ni vakacaucautaki qai dusimaki ena so na tikina.—Dauv. 4:9, 10.

Ke dreve na nomu sasaga kece mo vosa vei itaukeinivale ena so na siga, na veivosaki vinaka duadua oya na nomu veivosaki kei koya drau cakacaka vata ena vunau. Nanuma ni o Jisu a talai ratou na nona tisaipeli mera “lako yarua” nira lai vunau. (Luke 10:1) E rawa nira veiuqeti nira cakacaka vata. Koya gona na noda lai vunau kei ira na tacida e gauna vinaka “meda veivakayaloqaqataki” kina.—Roma 1:12.

Na cava e rawa ni veivosakitaki? Bau dua vei kemudrau e sotava e dua na ituvaki veivakauqeti? Dua na tikina o taleitaka ena nomu vuli vakataki iko se na nomudou sokalou vakavuvale? E uqeti iko e dua na ka o rogoca ena soqoni? Eso na gauna o na cakacaka kei na dua drau sega ni dau vunau vata. E mai kila vakacava na dina? E vakadeitaka vakacava ni qo na isoqosoqo i Jiova? Na cava eso na itavi a lesi kina se ituvaki e sotava? De dua o rawa ni talanoataka vua eso na ka o sotava. Ke mani vuavuaivinaka na vunau se sega, na noda cakacaka vata kei na dua e gauna vinaka meda “veivakauqeti” tiko ga kina.—1 Ces. 5:11.

E bibi meda vakavinakataka na ivakarau ni noda vuli vakataki keda meda kua kina ni guce  ena cakacaka vakaitalatala. Sa dau tabaka e levu na ulutaga na “dauveiqaravi e yalodina e vuku.” (Maciu 24:45) Koya gona e duidui na ulutaga o rawa ni vakani iko kina vakayalo. Meda dikeva mada e dua na ulutaga vinaka ni vuli: Na cava e bibi kina na cakacaka vakavunau? E vakamacalataki eso na vuna ena kato ena tabana e 16.

Na kena vakasamataki na vuna e volai ena kato ena uqeti iko mo gumatua tiko ena vunau. O rawa ni okata qo ena nomu vuli vakataki iko mo vola eso tale na vuna. Oti mo vakasamataka vakatitobu na vuna kei na kena tikinivolatabu. Ena uqeti iko qori mo gugumatua ena cakacaka vakaitalatala.

Dau levu na vakatutu e vakarautaka na isoqosoqo i Jiova me vakavinakataka noda cakacaka vakaitalatala. Eda sega ni vunau ga e veivale, eda volavola tale ga, vunau ena talevoni, e salatu se matanalevu, vunau tawalokuci, vunau ena yalava ni bisinisi. E rawa tale ga nida tuvanaka meda lai vunau ena yalava e tarai vakavudua.

Vakacava, o na yalorawarawa ni ciqoma na vakatutu va qo? O sa bau tovolea eso? Levu era marautaka na ka e rawati kina. Dikeva mada e tolu na ivakaraitaki.

Na imatai ni ivakaraitaki e baleta na ka e volai ena dua na ulutaga ena Cakacaka Vakaitalatala ena tekivutaki ni vuli iVolatabu. E uqeti April e dua na tacida yalewa me sureta e tolu ratou cakacaka vata me ratou vuli iVolatabu. Dua na ka nona kurabui kei na marau ni ratou vakadonuya me ratou vuli, ratou qai lako tale ga ena soqoni vakaivavakoso.

Na kena ikarua e baleta na soli ni mekesini.  Eda dau uqeti meda vaqarai ira na taleitaka e dua na ulutaga ena noda ivola. E tukuna e dua na ivakatawa ni tabacakacaka mai Merika ni a solia na itabataba ni Yadra! me baleta na taya vei ira kece na manidia ni sitoa e dau volitaki taya ena dua na yalava. E veisoliyaka tale ga kei watina na itabataba me baleti ira na vuniwai (“Understanding Your Doctor”) ena 100 vakacaca na valenivolavola ni vuniwai. E tukuna: “E yaga na veisiko va qo meda vakamacalataki keda kina kei na noda ivola. Ni keirau sa veikilai vinaka kei ira ena veivanua qori, e rawa kina me keirau sikovi ira vakawasoma.”

Na ikatolu ni ivakaraitaki na vunau ena talevoni. A volavola e dua na tacida yalewa na yacana o Judy ina valenivolavola liu me vakavinavinakataka kina na veiuqeti ni vunau ena talevoni. E kaya ni dau vakayagataka vakalevu o tinana na iwalewale ni vunau va qo, sa yabaki 86 qai levu na mate e tauvi koya. Dua na ka na nona marau ni vuli iVolatabu kei na dua na marama yabaki 92 ena talevoni!

E yaga dina na iwalewale ni vunau va qo e dau tabaki ena noda ivola. Tovolea mada! Ena uqeti iko qori mo marautaka tale qai gugumatua ena vunau.

E sega ni vakatau na vuavuaivinaka ni noda vunau ena levu ni ivola eda solia, na levu ni vuli iVolatabu, se na levu ni tamata eda vukea mera qaravi Jiova. Vakasamataka na ivakaraitaki i Noa, e sega sara ga ni dua ena taudaku ni nona vuvale e mai qaravi Jiova. Ia e gugumatua ena vunau. Bibi ga meda qaravi Jiova ena yalodina.—1 Kor. 4:2.

E levu na dautukutuku ni Matanitu ni Kalou era tekia eso na isausau rawarawa mera gumatua tiko ga kina ena vunau. Na cava soti e okati kina? E toka eso na vakatutu ena kato ena imawi.

Kerei Jiova me vukei iko me vuavuaivinaka qai vakaibalebale na nomu veiqaravi. Ni o sauva na nomu isausau, o na marautaka na ka o sa rawata, o lomavakacegu tale ga ni o solia kina na nomu vinaka duadua mo vunautaka na itukutuku vinaka.

Io, e sega ni ka rawarawa na vunautaka na itukutuku vinaka. E tiko na ka mo cakava mo dua na dautukutuku ni Matanitu ni Kalou gugumatua. Mo marautaka na nomudrau veivakayaloqaqataki kei koya drau cakacaka vakavunau vata, me dei nomu ituvatuva ni vuli, vakayagataka na vakatutu e vakarautaka na dauveiqaravi yalodina qai tekia eso na isausau rawarawa. Kena ilutua, e lesi iko na Kalou mo dua na iVakadinadina i Jiova, e nomu itavi dokai mo vunautaka na itukutuku vinaka. (Aisea 43:10) Sa na wacava na levu ni nomu marau ni o gugumatua tiko ga ena cakacaka vakaitalatala!