Kune e Itali Makawa e Dua Mai na Tokalau kei Esia
Kune e Itali Makawa e Dua Mai na Tokalau kei Esia
A LAI tu vakacava e dua na turaga ni Tokalau kei Esia ena matanitu o Roma makawa ena 2,000 na yabaki sa sivi? Na taro qo era taroga na daunivakekeli nira kunea e dua na ka vakasakiti ena ceva kei Itali ena 2009.
Era kunea na ka vakasakiti qo ena dua na ibulubulu e Roma makawa ena vanua o Vagnari, e toka ena 60 na kilomita ena ra kei Bari. A laurai kina e vitusagavulukalima na sui ni tamata. Ni vakadikevi na sui kece qori e laurai ni levu era sucu ena yasayasa voleka e kea. Ia era kurabuitaka ga na dauvakekeli na sui ni dua na turaga. Ni vakadikevi na nona DNA e vakatokai na mitochondrial e laurai ni yatukawa i tinana e basika mai na Tokalau kei Esia. * E vakadinadinataki tale ga ni a bula ena imatai se ikarua ni senitiuri S.K. A tukuna e dua na ripote me baleta na vakekeli qo ni “se qai imatai ni gauna e kune kina ena matanitu vakaRoma na sui ni dua na tamata mai na iyatukawa ena Tokalau kei Esia.” O cei na turaga qo?
Na ripote vata oya, e kaya, “Ni dua ena rairai nanuma ni turaga qo e dau volitaki silika ena gauna oya ni a takalevu tu kina e Jaina kei Roma.” E nanumi nira dau volivolitaki ga na itini, e sega gona ni dua ena lakova e 8,000 na kilomita mai Jaina i Itali.
Na cava eda ni vulica me baleta na vanua e kune kina na sui? Ena gauna makawa o Vagnari a dua na vanua e lewa na Empara—era dau vakawaicalataka kina o ira na tamata cakacaka na kaukamea ra qai bulia na taile (tiles) mai na qele. E levu vei ira na tamata cakacaka qo era bobula, a rairai wili tale ga kina na turaga ni Esia qo. E laurai ena nona ibulubulu ni sega ni vutuniyau. Ni a bulu tu kei koya e dua ga na kuro kei na dua tale na tamata.
Na cava e drukataki kina na ka e kune qo? Ena imatai ni senitiuri S.K, ena vakatau na tete ni itukutuku era kacivaka na lotu vaKarisito ena yawa ni vanua era lakova ena gauna oya. E kaya na iVolatabu ni oti na Penitiko 33 S.K., era vakasavuya na itukutuku vinaka na vulagi era a tiko e Jerusalemi ina veivanua yawa era dui lako mai kina. (Cakacaka 2:1-12, 37-41) Ena itukutuku e kilai rawa me baleta na sui qo, e nanumi ni so mai na Tokalau kei Esia era dau lako ena yasayasa na Mediterranean ena gauna oya. *
[iVakamacala e ra]
^ para. 3 E sega ni rawa ni vakadeitaka na DNA e vakatokai na mitochondrial na iyatukawa i tamana.
^ para. 6 E tiko tale ga na ivakadinadina ni o ira mai na veivanua tani era dau lako ina Tokalau kei Esia. Raica na ulutaga “How Far East Could Missionaries Go?” ena Watchtower, 1 Janueri, 2009.
[Mape ena tabana e 29]
(Raica tale na ivola)
ROMA
Vagnari
Wasa na Mediterranean
TOKALAU KEI ESIA
WASA PASIFIKA
[iYaloyalo ena tabana e 29]
A kune na sui ni dua na turaga ni tokalau kei Esia ena dua na ibulubulu makawa mai Roma
[Credit Line]
© Su concessione del Ministero per i Beni e le Attività Culturali - Direzione Regionale per i Beni Culturali e Paesaggistici della Puglia-Soprintendenza per i Beni Archeologici della Puglia