Taro na Dauwiliwili . . .

Na Cava a Vakayagataka Kina o Setani na Gata me Vosa Vei Ivi?

▪ O na rairai duavata kei na ka e vakamacalataki ena tabana e 8, ni o Setani a vakayagataka na gata me vosa vei Ivi. E tukuni qo ena iVolatabu. Ia o na rairai vakasamataka, ‘E rawa vakacava me vakayagataka na kabula kaukaua vakayalo na gata me nona waqawaqa?’

E vakamacalataka na iVolatabu na “ivadi” se ilawaki qaseqase e vakayagataka o Setani me veivakacalai kina, eda na vakadinadinataka qo ena ka e yaco. (Efeso 6:​11) Ia na ka e yaco ena were o Iteni e sega ni dua wale ga na italanoa ni manumanu e rawa ni vosa; ia e ivakaraitaki ni ilawaki qaseqase qai vakarerevaki mera vakacalai kina na tamata mera kua ni qarava na Kalou. Ena sala cava?

A vakalewa vinaka o Setani se o cei me bacana. O Ivi a buli duadua e muri vei ira kece na kabula e vuravura kei lomalagi. A vakayagataka gona o Setani na lailai ni ka e kila o Ivi me coriti koya kina. A doudou ni vakayagataka vaqaseqase o Setani na gata me kua ni kilai na nona inaki vuni. (Vakatekivu 3:1) Vakasamataka tale ga na nona vakayagataka o Setani na gata me vaka e vosa tiko me rawata kina na lomana.

Kena imatai, a mana na ilawaki i Setani ni coriti Ivi sara ga. E kila o Ivi ni sega ni rawa ni vosa na gata; ni o watina a vakadikevi ira na manumanu kece wili kina na kena qo, sa qai vakayacani ira. (Vakatekivu 2:​19) Sega ni vakabekataki ni a vakadikeva vinaka tale ga o Ivi na manumanu qo. Na ivadi i Setani a vakavuna me lomatarotaro o Ivi; lai galeleta kina e dua na ka ena were e vakatabui vua. Kena ikarua, ni raica o Ivi ni dolo voli ena vunikau vakatabui na gata, na cava ena rairai nanuma? Sega beka ni na nanuma ni sa vosa rawa na gata ni kania na vuanikau vakatabui? Ke sa vosa rawa na gata ni kania na vuanikau, na cava ena yaco ke kania tale ga o koya? Eda sega ni kila se a kania na vuanikau na gata se cava na nanuma nei Ivi, ia e matata ga ni a vakabauta o Ivi na lasu e tukuna vua na gata ni na ‘vaka na Kalou’ ke kania na vuanikau.

Na ivosavosa i Setani e vakavotui kina e levu tale na ka. A bucina e lomai Ivi na vakatitiqa ni bureitaka vua na Kalou e dua na ka vinaka, e sega ni solia tale ga vua na galala. Ena mana na ilawaki i Setani ke cakava ga o Ivi na ka e vinakata ni sega ni lomana na Kalou e solia vua na ka kece. (Vakatekivu 3:​4, 5) A mana na ilawaki i Setani; rau a sega ni bucina o Ivi kei Atama me rau lomani Jiova, me rau vakavinavinakataki koya tale ga. E sega beka ni uqeta tiko nikua o Setani na vakatitiqa kei na yalo ni nanumi koya ga?

Na cava na inaki i Setani? Na cava a vinakata? A sega ni via vakatakilai koya se na nona inaki ena were o Iteni. Ia ni toso na gauna sa qai kilai na veika me baleti koya. Ena gauna e vakatovolei Jisu kina e kila ni sa na tawayaga na nona via vunivuni tiko. A mani tukuna ga vakadodonu vei Jisu: “Cuva mo sokalou vakalekaleka ga vei au.” (Maciu 4:9) E macala ni dua na gauna balavu a vuvutaka voli kina o Setani na sokalou e dodonu me caka vakatabakidua ga vua na Kalou o Jiova. Ena sagai ira vagumatua eso tale mera kua ni sokaloutaki Jiova se mera qarava na Kalou ena kena ivalavala e donu ga vua. E vinakata meda kua ni yalodina vua na Kalou.

E tukuna vakamatata na iVolatabu ni o Setani e kenadau me vakaleqai ira e taketetaka. O koya gona meda kua ni vakacalai me vakataki Ivi ena noda “sega ni lecava na nona ilawaki” o Setani.​—2 Korinica 2:​11.