Taro na Dauwiliwili . . .

E tu Beka e Veivanua na Kalou?

▪ E levu na matalotu era tukuna ni tu e veivanua na Kalou, e tiko kina na vakasama ni tiko e veivanua ena dua ga na gauna. Me kena ivakaraitaki, na New Catholic Encyclopedia e tukuna ni Kalou e “tu e veivanua, e tu tale ga ena ka kece.” A vola o John Wesley a tauyavutaka na lotu Wesele e dua na ivunau e kena ulutaga, “E Tu e Veivanua na Kalou.” E tukuna kina “ni Kalou e tiko ena veiyasana kece e maliwalala, se ra mani tu kina na kabula se sega.”

Na cava e kaya na iVolatabu? E rawa ni tu e veivanua na Kalou ena dua ga na gauna, me tiko mai lomalagi, e vuravura, me tiko tale ga kei keda?

Na iVolatabu e tukuna ni dua ga na vanua e tiko kina na Kalou—mai lomalagi. E volai kina na masu nei Tui Solomoni, a kaya vua na Kalou: “Mo ni qai rogoca mai lomalagi, na yasana ko ni sa tiko kina.” (1 Tui 8:43) Ni vakavulici ratou na nona tisaipeli o Jisu Karisito ena ivakarau ni masu, a tukuna me ratou masu vua na “Tamai keimami mai lomalagi.” (Maciu 6:9) Ni vakaturi oti, e tukuna na iVolatabu ni curu o Karisito i “lomalagi ena gauna qo me rairai ena mata ni Kalou.”—Iperiu 9:24.

Na tikinivolatabu e toka e cake e dusia vakamatata ni tiko ga mai lomalagi na Kalou o Jiova, e sega ni tu e veivanua. E macala ni “lomalagi” e tukuni tiko qo e sega ni vakaibalebaletaka na macawa e wavoliti vuravura se na maliwalala. E sega ni rauti koya na Dauveibuli o lomalagi. (1 Tui 8:27) Na iVolatabu e tukuna ni “Yalo na Kalou.” (Joni 4:24) E tiko ena dua na vanua vakayalo.—1 Korinica 15:44.

Ia vakacava na tikinivolatabu ena rairai nanumi kina ni tu e veivanua na Kalou? Me kena ivakaraitaki, a tukuna o Tevita me baleta na Kalou ena Same 139:7-10: “Me’u lako tani kivei me’u yali kina mai na yalomuni? Se me’u dro kivei me’u kakua ni tiko e matamuni? Kevaka ka’u cabe ki lomalagi, ko ni sa tiko mai kina: Kevaka ka’u vakarautaka na noqui mocemoce mai bulu, raica, ko ni sa tiko mai kina. Kevaka ka’u sa taura na taba ni mataka, ka la’ki tiko mai na sauka ni wasawasa; ena tuberi au ga mai kea na ligamuni.” E vakaibalebaletaka beka na tikinivolatabu qori ni Kalou e tu ena veivanua e cavuti kina?

A taroga taumada o Tevita: “Me’u lako tani kivei me’u yali kina mai na yalomuni?” * E vakayagataka na yalona tabu na Kalou me kila kina na ka kece, qai vakatakila na nona kaukaua e veivanua, e sega sara ni gadrevi me lako e kea se lai vakaitikotiko kina. Me kena ivakatautauvata: Era dikeva na saenitisi ena dua na gauna lekaleka ga qo na qele ena vuravura o Mars, e vica vata na milioni na kilomita mai vuravura. Era kila vakacava? Era sega ni lako sara e kea, era raica ga na kena itaba kei na so tale na itukutuku e vakauta lesu mai vuravura na misini era vakavukaca i Mars.

E va tale ga qori na Kalou o Jiova, e sega ni gadrevi me tu e veivanua me kila kina na ka e yaco tiko e lomalagi kei vuravura. E tukuna na nona Vosa: “E sega ni vunitaki vua e dua na kabuli.” (Iperiu 4:13) Io, na igu kaukaua i Jiova se na yalona tabu e yacova na vanua kece, e rawa kina vua me kila na ka kece qai vakayacora na nona inaki mai na nona itikotiko tudei, na nona “itikotiko tabu” mai lomalagi.—Vakarua 26:15.

[iVakamacala e ra]

[iTaba ni Credit Line ena tabana e 27]

IAC/RGO/David Malin Images