Taro na Dauwiliwili . . .

E iVakavuvuli Vakaivolatabu na Letoluvakalou?

▪ E levu na sala e vakamacalataki kina na Letoluvakalou, qo e dua vei ira: “Tolu na kalou (na Tamana, na Luvena, kei na Yalo Tabu), e tukuni ni ratou tawamudu, ratou kaukaua kece, eratou tautauvata kece, e tukuni ni ratou Kalou kece, ia o ratou na le tolu qori eratou duabauga na Kalou.” Qori beka na ka e vakavulica na iVolatabu?

E dau vakayagataki na Maciu 28:19 me tokona na ivakavuvuli qori. E tukuna na King James Version me baleta na ka e cavuta o Jisu: “O koya mo dou qai lako, ka vakalotutaki ira na lewe ni veivanua kecega, ka papitaisotaki ira e na yaca ni Tamamudou, kei na Luvena, kei na Yalo Tabu.” E cavuti dina ena tikinivolatabu qori na Tama, na Luvena, kei na yalo tabu. Ia e sega ni tukuna tiko ni ratou duabauga. A lesi ira na nona imuri Jiu o Jisu mera veivakavulici ra qai veipapitaisotaki ena yaca ni Tamana, Luvena kei na yalo tabu. Na cava era vakabauta kece na Jiu?

Ni soli vei ira na Isireli na Lawa ni veiyalayalati e volai ena dua na iwase ni iVolatabu, era vakaroti kina: “Me kakua vei iko na Kalou tani, oi au duaduaga.” (Vakarua 5:7) E vica ra vosa tiko ena tikinivolatabu qori? E vakamatatataka na Vakarua 6:4: “Mo ni rogoca, na Isireli: O Jiova na noda Kalou ko Jiova sa dua bau”—sega ni tiki ni letoluvakalou. Era se qai sereki ga mai Ijipita na Isireli, na vanua eratou sokaloutaki kina o Osiris, Isis, kei Horus (itaba ena imawi)—dua vei ira na vicavata na letoluvakalou. Era vakaroti gona na Isireli mera sokaloutaka ga e dua na Kalou. Na cava e bibi kina mera kila na Isireli na ibalebale ni ivakaro qori? E kaya na rapai o Dr. J. H. Hertz: “Na ivakamacala matata qori ni dodonu me qaravi ga e dua na kalou e veisaqasaqa sara ga kei na vakasama ni nodra qaravi e levu na kalou . . . Na Shema e sega ni okata ena ivakavuvuli ni lotu vaKarisito na letoluvakalou ni beci kina na nona Duabau na Kalou.” *

Ni Jiu o Jisu, a dodonu me muria tale ga na ka a vakaroti ira kina na Isireli na Kalou. Ni oti na nona papitaiso, a temaki koya na Tevoro qai kaya o Jisu: “Lako tani, Setani! E volai, ‘E dodonu mo sokalou vei Jiova na nomu Kalou, mo qaravi koya duadua ga.’” (Maciu 4:10; Vakarua 6:13) Eda rawa ni vulica e rua na ka ena ituvaki qori. Kena imatai, a via temaki Jisu o Setani me sokaloutaka tale e dua, sega ni o Jiova, ena ka vakalialia qori ke tiki ni Kalou qori o Jisu. Kena ikarua, a tukuna tale ga vakamatata o Jisu ni dua ga na Kalou me sokaloutaki ni cavuta “o koya duadua ga,” ke a tiki ni Letoluvakalou ke a tukuna “keirau.”

Nira kila na ka dina me baleta na Kalou na tamata ra qai via qaravi koya, era na papitaiso “ena yaca i Tamada kei na Luvena kei na yalo tabu.” (Maciu 28:19) Era kila ra qai ciqoma na lewa i Jiova kei na itavi i Jisu Karisito ena kena vakayacori na inaki i Jiova. (Same 83:18; Maciu 28:18) Era kila tale ga na itavi kei na cakacaka ni yalo tabu ni Kalou, na nona igu tawarairai.—Vakatekivu 1:2; Kalatia 5:22, 23; 2 Pita 1:21.

A veivakasesei voli ena veisenitiuri na ivakavuvuli ni Letoluvakalou. Ia e vakavulici ira na nona imuri o Jisu mera toro voleka vua “na Kalou dina duadua ga” o Jiova.—Joni 17:3.

[iVakamacala e ra]

[iYaloyalo ena tabana e 23]

Musée du Louvre, Paris