Na Cava e Cala Kina na Vakatevoro?

A dau raivotu qai rogoca eso na domo o Bale * ni se gone, a vakadeitaka kina ni veitaratara tiko kei ira na wekana era sa mate. Erau dau wilika kei na watina o Jo na ivola ni vakatevoro, rau kenadau tale ga ena tuvaimau. E tukuna na imau ni rau na vutuniyau, qai yaco dina qori ni a dua na nodrau bisinisi. Ia a vakaroti rau ena dua na siga na imau nira na lako mai ena nodrau vale eso na tamata rerevaki, a vakaraitaka tale ga na ka me rau cakava me rau taqomaki kina.

E RAIRAI makawa na vakabauta vakatevoro, ia sa taleitaki vakalevu nikua na veika vakatevoro. E levu e veiyasa i vuravura era dara na qato kei na taube, era vakayagataka na papa ni vakatevoro na Ouija, se ra tarogi ira na dauvakacuru ena veika vinaka era na sotava se me taqomaki ira mai na ca. Ena dua na mekesini mai Jamani na Focus, a tukuni ena ulutaga na “Laptop and Lucifer:” “Na Internet e uqeti ira tiko e levu mera taleitaka na vakatevoro.”

O bau kila ni tukuni ena iVolatabu na vakatevoro? De dua o na kurabuitaka na ka e tukuna me baleta na vakatevoro.

Ka e Kaya na iVolatabu

A tukuni ena lawa a solia na Kalou vei ira na nona tamata e Isireli makawa: “Me kakua ni kune vei kemuni . . . e dua na rairai, se dua sa daudigitaka na siga eso, se dua sa dauia na parofisai e na gata, se dua sa daucakai sausau, se dua sa lawaki, se dua sa taroga na daucurumi, se dua na dauveinita, se dua sa taroga na tamata sa mate. Ni ra sa tamata vakasisila vei Jiova ko ira kecega era sa kitaka na veika oqo.” (Vakarua 18:10-12) Na cava e saqati vakalevu kina na vakatevoro?

Me vaka e tukuni ena itekivu ni ulutaga qo, e levu era vakabauta nida rawa ni veivosaki kei ira na mate. Na itukutuku tale ga e vakasavui ena vakatevoro e nodra itukutuku na mate. Na vakabauta va qori e yavutaki ena ka era vakavulica e levu na lotu, nida lai bula ena vuravura ni yalo ena gauna eda mate kina. Ia e duidui sara na ka e tukuna na iVolatabu me baleta na ivakavuvuli qori, e vakamatatataki kina: “Ko ira na mate era sa sega ni kila e dua na ka.” (Dauvunau 9:5) E vakamacalataka na iVolatabu  ni o ira na mate e vaka ga era moce lutu, era sa sega tale ni kila e dua na ka e yaco wavokiti ira tu. * (Maciu 9:18, 24; Joni 11:11-14) Ke dina qori, o na rairai taroga: Ia vakacava o ira era tukuna nira dau veitaratara kei ira na timoni? E rawa vakacava qori?

Veivosaki kei Ira na Yalo Velavela

E tukuni ena Kosipeli ni gauna se bula kina e vuravura o Jisu, a veivosaki kei ira na yalo velavela. E kaya na Marika 1:23, 24 ni dua na “timoni” a tukuna vei Jisu: “Au kilai iko vinaka.” Era kilai iko vinaka tale ga na timoni. Ia vakacava o kilai ira?

Ni bera ni bulia na kawatamata na Kalou, a buli ira taumada e dua na iwiliwili levu ni kabula vakayalo se agilosi. (Jope 38:4-7) Era cecere cake vei keda na agilosi. (Iperiu 2:6, 7) Era kaukaua, vuku, era buli tale ga mera cakava na loma ni Kalou. A lagata na daunisame: “Dou vakavinavinaka vei Jiova koi kemudou na nona agilose; sa uasivi e na kaukauwa, ka sa cakava na nonai vakaro.”—Same 103:20.

E tukuna na iVolatabu nira saqata eso na agilosi na ka e vinakata na Kalou ra qai mai veimaliwai kei na tamata. Na cava e kena inaki? Na imatai ni agilosi a saqata na Kalou a vakacalai rau o Atama kei Ivi me rau vakarorogo vua, me rau talaidredre tale ga vua na Kalou a buli rau. Na ka e cakava qori a veisau kina me o Setani na Tevoro, e dau vosavakacacataka qai saqata na Kalou.—Vakatekivu 3:1-6.

Ena dua tale na gauna e muri era “biuta na nodra itikotiko dodonu” mai lomalagi eso tale na agilosi, ra vukici ira mera tamata mera vakawatitaki ira na yalewa totoka e vuravura. (Juta 6; Vakatekivu 6:1, 2) E dau voravora na nodra ivalavala na agilosi talaidredre qori kei na nodra kawa yagolevu, qori na vuna a “sinai [kina] e nai valavala kaukauwa” na vuravura. De dua o kila vinaka na italanoa vakaivolatabu ni nona muduka na Kalou na kawatamata ca qai voravora ena Waluvu ena gauna i Noa.—Vakatekivu 6:3, 4, 11-13.

Na waluvu e vakavuna mera biuta na agilosi na yagodra vakatamata ra qai lesu i lomalagi. Ia a sega ni vakatara na Dauveibuli mera lesu ina “nodrai tikotiko” taumada mai lomalagi. Ia era lai vesu tu ena dua na vanua lolovira e vaka na “qara butobuto.” (2 Pita 2:4, 5) E vakatokai ira na agilosi talaidredre na iVolatabu mera “timoni.” (Jemesa 2:19) O ira sara ga qo era solia tiko na kaukaua vei ira era dau vakatevoro.

Ka Era Vinakata na Timoni

O ira na timoni era veitaratara kei na tamata era via veivakacalai me kua ni sokaloutaki na Kalou dina o Jiova. Na isolisoli se kaukaua e tu vei ira na dauvakatevoro, e vakacalai keda ga meda kua ni kila na ka dina me baleta na Kalou se veiwekani voleka kei koya.

E dua tale na ka era vinakata na timoni a laurai ena ka a via cakava vei Jisu o Setani na nodra iliuliu. A solia vei Jisu o Setani “na matanitu kece e vuravura kei na kedra lagilagi.” Na cava e vinakata o Setani me cakava o Jisu? E kaya: “Cuva mo sokalou vakalekaleka ga vei au.” E vinakata o Setani kei ira na timoni mera sokaloutaki. Ia a sega ni vinakata o Jisu me vakanadakuya na Kalou kei na sokalou dina.—Maciu 4:8-10.

Era sa sega sara ni veivosaki va qori e matanalevu na timoni nikua. Ia era saga  mera vakacalai ira na lecaika ena veika e nanumi ni sega ni dua na kena ca, me vaka na vakayagataki ni polo karisitala, drauniuci, tuvaimau, kei na horoscope. Mo kua ni vakacalai ena ivakarau va qori! Qori e sega ni sala ni veitaratara ina dua tale na vuravura. Era bukana na timoni me taleitaki na vakatevoro meda bacani kina da qai vakacalai meda kua ni sokaloutaki Jiova. Ni sega ni yaco na nodra inaki, era dau veivakasagai na timoni se vakalolomataki ira era coko ena nodra dai. Ke sa yacovi iko qori, na cava mo cakava mo rawa ni sereki mai na nodra veivakamuai?

Ka mo Cakava me Baleta na Vakatevoro

Kua sara ni guilecava nira meca ni Kalou o ira na timoni era veitaratara kei na tamata, sa lewai oti tu mera na vakarusai. (Juta 6) Era dauveidabui ra qai lasulasu, era lasutaka nira dua vei ira na mate. Na cava o na cakava ke o kila ni dauveidabui qai via vakaleqa na nomu bula e dua o nanuma ni nomu itokani? Na cava o na cakava ke o qai kila ena dua na gauna e muri ni drau sa veitokani tiko ena Internet kei na dua e vinakata ga mo drau veiyacovi? Ia e rerevaki sara ke o dau veitaratara kei ira na timoni. Ena vinakati mo sasaga vakaukaua mo muduka kina nomu veitaratara kei ira. Na cava o rawa ni cakava?

Nira sa vulica na ka e kaya na iVolatabu me baleta na vakatevoro, era raica eso na lewenivanua e Efeso makawa ni dodonu mera vakama na nodra ivola saulevu ni vakatevoro. Era “vakama e matadra kece” na lewenivanua. (Cakacaka 19:19, 20) Na veika me baleta na vakatevoro nikua e sega ni okati ga kina na ivola, qato se taube, papa ni vakatevoro na Ouija, kei na so tale. Ia e wili tale ga kina na ka e rogoci se saravi ena iyaya vovou ni gauna qo. Mo cata na ka kece o rawa ni coriti kina ena vakatevoro.

Vakasamataki rau na veiwatini ena itekivu ni ulutaga qo. Erau kila ena nodrau tuvaimau nira na lako yani na marama rerevaki, ia me rau kua ni vakarorogo se ciqoma na ka erau na solia. Ia ni rau gole yani ena nodrau vale e rua na iVakadinadina i Jiova o Connie kei Gudrun rau qai kaya ni rau via wasea na itukutuku vinaka me baleta na Kalou, rau vakatulewataka o Jo kei Bale me rau na vakarorogo. Ratou mani veivosakitaka na vakatevoro, rau vakamacalataka sara o Connie kei Gudrun na ka dina e kaya na iVolatabu me baleta na vakatevoro. A wasoma sara nodratou vulica vata na iVolatabu.

Sega ni dede rau sa vakatulewataka o Jo kei Bale me rau muduka na nodrau veitaratara kei ira na timoni. Erau vakamacalataka na iVakadinadina ni na rairai sega ni vakamarautaki ira na timoni qori. A sega ni vinaka na veika erau sotava o Jo kei Bale nirau sa muduka na vakatevoro, qai vakarerevaki na nodra vakasagai rau na timoni. Erau domobula e veibogi ena loma ni dua na gauna, sa qai via maravu qori ni rau toki ena dua tale na vale. Ena veika erau sotava qori, erau dau nuidei ena ka e tukuni ena Filipai 4:13: “Au rawata na ka kece ena vuku i koya e vakaukauataki au.” A vakalougatataka o Jiova na nodrau yalodei, lakolako sa mudu tale ga na nodra veivakasagai na timoni. Erau marautaka tiko nikua o Jo kei Bale na nodrau sokaloutaka na Kalou dina o Jiova.

Na iVolatabu e uqeti ira kece era vinakata na veivakalougatataki i Jiova: “Moni vakamalumalumutaki kemuni vua na Kalou; moni vorata na Tevoro, ena qai dro tani vei kemuni. Toro voleka yani vua na Kalou ena qai toro voleka mai vei kemuni.” (Jemesa 4:7, 8) E rawa ni vukei iko na Kalou o Jiova mo sereki mai na veivakamuai ni timoni ke o vinakata. Ni rau raica lesu na nodrau sereki mai na vakatevoro, erau vakadeitaka sara ga mai vu ni lomadrau o Jo kei Bale na ka e tukuni ena Same 121:2: “Sa lako maivei Jiova na noqui vukevuke.”

[iVakamacala e ra]

[iTikina bibi ena tabana e 21]

Na vakatevoro ena tarova na noda veiwekani vinaka kei na Kalou

[Tikina bibi ena tabana e 22]

“Toro voleka yani vua na Kalou ena qai toro voleka mai vei kemuni.”—JEMESA 4:8