E KAUAITAKA beka o Jiova na nodra sasaga na nona dauveiqaravi mera vakamarautaki koya? Io! Ia e sega wale ga ni kauaitaka o koya na nodra ivalavala vakalou kei na nodra vosa ni veivakacaucautaki. E kauaitaka tale ga na gauna era vakasamataka kina na ka vinaka me baleti koya. Koya e bibi sara, ena sega vakadua ni guilecavi ira na nona tamata o Jiova kei na veika era cakava. Eda rawa ni vakadeitaka vakacava qori? Eda na raica na kena isau ena ka e vola na parofita o Malakai.​—Wilika Malakai 3:16.

A parofisai o Malakai ena ikalima ni senitiuri B.S.K. ena gauna e ca tu kina na itovo kei na nodra ivakarau ni qaravi Kalou na Isireli. Era vakaweleweletaka na bete na nodra itavi, o ira tale ga na lewenivanua era vakayacora eso na itovo e beci kina na Kalou me vaka na vakatevoro, veibutakoci kei na veidabui. (Malakai 2:8; 3:5) E dina ni taka levu tu ena gauna oya eso na ivakarau ca qori, ia era yalodina tiko ga e dua na ilawalawa lailai e Isireli. Na cava era cakava tiko?

A vakamacalataka o Malakai, “sa ra qai dauveivosaki vakataki ira ko ira era sa rerevaki Jiova.” Na rerevaka na Kalou e dua na itovo vinaka. O Malakai a tukuni ira tiko na Isireli era doka vakalevu na Kalou ra qai sega ni via cakava e dua na ka e vakararawataki koya. Dikeva nira dauveivosaki “vakataki ira” o ira na ilawalawa lailai qori era dau rerevaka na Kalou. Koya gona, era dau soqovata mera veitalanoataka na veika vinaka me baleti Jiova ra qai veivakauqeti mera kua kina ni yalolailai se vakaleqai ena ivakarau ca e taka levu tu ena gauna ya.

E dua tale na sala bibi era vakaraitaka kina na Isireli yalodina na nodra dokai Jiova: Era dau “vakananuma na yacana.” E kaya e dua tale na ivakadewa nira “vakalagilagia na Yacana.” O ira na dau rerevaka na Kalou era rokovi Jiova ena veika mada ga era dau vakasamataka. E vu mai lomadra na nodra dau vakasamataka se vakananuma vakatitobu na veika vinaka me baleti Jiova kei na yacana cecere. Vakacava e kila o Jiova na veika era cakava tiko?

E kaya o Malakai: “A sa vakarorogo ko Jiova, ka rogoca.” Mai na nona itikotiko cecere e lomalagi, a vakarogoca matua o Jiova na vosa kece ni veivakacaucautaki era veivosakitaka na nona dauveiqaravi. E kauaitaka tale ga na ka kece era dui vakananuma. (Same 94:13) Ia e sega wale ga ni kauaitaka na veika vinaka era cavuta kei na ka era vakasamataka.

E vola o Malakai: “A sa volai e dua nai vola ni veivakananumi e matana.” Na ivola qori e volai kina na kedra itukutuku kece o ira era qaravi Jiova tu ena yalodina. E vakatokai na ivola qori me ‘ivola ni veivakananumi.’ * E vakaraitaka qori vei keda ni o Jiova ena sega vakadua ni guilecavi ira era qaravi koya ena yalodina kei na veika kece era vakayacora mera lagiti koya kina​—nodra ivalavala vinaka kece, vosa era cavuta kei na ka era vakasamataka. Ia e tiko na vuna e nanumi ira kina na Kalou. E yalataka o koya vei ira e volai tudei tu na yacadra ena ivola ni veivakananumi ni na vakaicovitaki ira ena bula tawamudu. *​—Same 37:29.

E veivakacegui dina nida kila ni vakamareqeta o Jiova na veika kece eda cakava meda qaravi koya kina ena ivalavala e vakadonuya! Na ka e tukuni ena Malakai 3:16 e dodonu me uqeti keda meda vakasamataka vakabibi na noda veiwekani kei Jiova. E vinaka gona meda taroga: ‘E volai tiko na yacaqu ena ‘ivola ni veivakananumi’ ni Kalou?’ Ena rawa qori ke da saga ena noda vinaka taucoko meda vakamarautaki Jiova ena ka eda cakava, vosataka, da qai vakasamataka e veisiga.