‘Veiyaloni o Ira e Vakadonui Ira na Kalou’
“Me vakalagilagi na Kalou mai lomalagi, ia e vuravura, mera vakacegu [se veiyaloni] o ira e vakadonui ira na Kalou.”—LUKE 2:14.
Vuna era solevutaka kina eso na Kirisimasi.
E veiyabaki e dau vakasavuya na itukutuku ni veiyaloni na tui tabu ni lotu Katolika kei na so tale na iliuliu ni lotu, era nuitaka ni gauna ni Kirisimasi ena vakayacori kina na nodra vosa na agilosi: ‘Ia e vuravura, mera veiyaloni o ira e vakadonui ira na Kalou.’ Eso era lako ena ilakolako vakalotu ena so tale na vanua mera solevutaka kina na Kirisimasi.
Na cava e dredre kina me caka qori?
Na veiyaloni e vakilai ena gauna ni Kirisimasi e dau lekaleka ga. Kena vakaraitaki, ena Tiseba 1914, ni yaco tiko na veivaluvaluti e Urope ena iMatai ni Valu Levu, o ira na sotia ni Peritania kei Jamani era biuta na qara era vuni tu kina mera solevutaka vata na Kirisimasi. Era kana vata, ra gunu, ra qai vakatavako. Era qito soka mada ga. Ia e lekaleka wale ga na nodra sota vata qori. Ena dua na ivola mai na iyatu e liu ni ivalu, e tukuna kina e dua na sotia ni Peritania ni dua na sotia ni Jamani a tukuna vua: “Nikua daru veiyaloni. Mataka daru na dui valataka na nodaru matanitu.”
Na ivakavuvuli vakaivolatabu cava e rawa ni vukei iko?
“Ni sa sucu mai e dua na gone me noda . . . Ena vakatokai na yacana . . . ko Veivakurabuitaki. Ena sega ni oti na kena tubu na nona lewa kei na Sautu [se veiyaloni].” (Aisea 9:6, 7) E veivakacegui dina na parofisai qori me baleti Jisu Karisito. A sega ni sucu e vuravura o Jisu me kauta mai na veiyaloni ena dua ga na siga e veiyabaki. Ni iLiuliu mai lomalagi ena kauta mai na veiyaloni dina me tawamudu.
“Mo dou vakacegu [se veiyaloni] kina ena vukuqu [Jisu]. Dou na vakararawataki e vuravura, ia dou yaloqaqa! Au sa vakamalumalumutaki vuravura.” (Joni 16:33) Ena gauna mada ga qo e vukei ira tiko na nona imuri o Jisu mera veiyaloni. Era vakila na rarawa na lotu vaKarisito dina. Ia, era marau nira vulica ena iVolatabu na vuna e yaco kina na rarawa, kei na sala ena kauta mai kina o Jisu bula veiyaloni e tawamudu. Ya na vuna era lomavakacegu kina.
Nira muria na vosa i Jisu, era veiyaloni na iVakadinadina i Jiova, dina ni duidui na vanua era cavutu tu mai kina, roka ni kuliniyagodra, se nodra vosa. O na raica sara ga qori ni o tiko ena soqoni e dau caka ena nodra Vale ni Soqoni. De dua o na duavata kei ira e levu ni vinaka cake sara na veiyaloni qo mai na veiyaloni e vakilai ena gauna ni Kirisimasi.
Era duavata na iVakadinadina i Jiova ena nodra dau veiyaloni, dina ni duidui na roka ni kuliniyagodra se nodra vosa. O na raica sara ga qori ni o tiko ena soqoni e dau caka ena nodra Vale ni Soqoni
