NI DUA vei rau na itubutubu e vakanadakuya na Kalou dina o Jiova, ena rawa ni vakadredretaka na nona bula e dua na gone. Meda raica mada na ivakaraitaki i Jocami. Eda na vulica na leqa a basika ena nona vuvale ena gauna se tubu cake tiko kina.

A tui kei Juta o Usaia, na tamai Jocami. A turaga kaukaua duadua ena vanua qori. Ni bera mada ga ni sucu o Jocami, a dua tu na tui vinaka o Usaia me vica vata na yabaki. Ia e muri, ni se gone o Jocami, a dokadoka o Usaia qai beca na Lawa ni Kalou. Mani vakavuna na Kalou me tauvi koya na vukavuka, qo e dua na mate vakasisila. O kila na ka a qai cakava o Jocami?— *

A tomana tiko ga na nona qaravi Jiova o Jocami. De dua a vukei koya o Jirusa na tinana. Ia ena rairai dredre ga vei Jocami me yalodina tiko ga vei Jiova ni oti nona vakanadakuya o Usaia na vale i Jiova.

Vakacava ke vakanadakui Jiova o Ta se o Na? Qori ena dredre sara ga vei iko, se vakacava?— Ia e sega ni cala meda vakasamataka na ka eda na cakava ke sa vakanadakui Jiova o Ta se o Na. Na ka a vola o Tevita ena iVolatabu e vakaraitaka ni sega ni cala ke va qori na noda rai.

A turaga vinaka na tamai Tevita, o Jese. A qaravi Jiova, da qai vakadeitaka ni a lomani tamana o Tevita. Ia a vulica o Tevita me lomani Jiova vakalevu mai na nona lomani  Jese. Meda raica mada se da kila vakacava qori.

Yalovinaka cega mada na iVolatabu ena Same 27:10. A vola kina o Tevita: “Ni sa laivi au na tamaqu kei na tinaqu, ena qai keveti au cake ko Jiova.” Vakasamataka mada qo: Na ka e tukuna tiko na iVolatabu ni na qaravi Jiova tiko ga o Tevita ke vakanadakui Jiova mada ga o Jese na tamana se o tinana.

Vakacava o iko? O na qaravi Jiova tiko ga ke vakanadakui Jiova o Na kei Ta?​— Qo e dua na taro vinaka mo taroga. Na vuna mo taroga kina qori e baleta tiko na ivunau levu duadua ena iVolatabu. Qo na ivunau levu: “Mo lomani Jiova na nomu Kalou ena lomamu taucoko, ena nomu bula taucoko, kei na nomu vakasama taucoko.”

Na ibalebale ni ivunau qori oya meda yalodina tiko ga vei Jiova ena gauna mada ga e dredre kina na bula. O cei o nanuma e vinakata tiko meda vakanadakui Jiova?— Na meca ni Kalou o Setani na Tevoro e vinakata qori. E vakatokai koya o Jisu me “turaga ni vuravura qo.” E tukuna tale ga na iVolatabu ni o koya “na kalou ni veika vakavuravura qo.” E dodonu beka meda rerevaki Setani?—

Sega. Ia e bibi meda nanuma tiko ni o Jiova e kaukaua cake vei Setani. Ena taqomaki keda o Jiova ke da nuitaki koya. Wilika ena nomu iVolatabu na sala a taqomaki Tevita kina o Jiova mai vua na tuwawa rerevaki o Koliaci. Ena taqomaki iko tale ga o Jiova ke o yalodina tiko ga vua.