Vakacava e kaukaua cake o mate vua na Kalou? Sega! E rawa vakacava ni kaukaua o mate se dua tale na “meca” vua na “Kalou Kaukauwa duaduaga”? (1 Korinica 15:26; Lako Yani 6:3) E tu vua na Kalou na kaukaua me vakaotia na mate ena nona vakarautaka na veivakaturi, qai yalataka me na vakayacora qori ena nona vuravura vou. * Eda vakadeitaka vakacava ni na yaco dina na yalayala qori? Eda nuidei ni tukuna sara ga qori na Luve ni Kalou, o Jisu.​—Wilika Maciu 22:​31, 32.

Ena gauna e vosa tiko kina vei ira na Setoki, era sega ni vakabauta na veivakaturi, a tukuna o Jisu: “Oni sega beka ni wilika na ka e tukuna vei kemuni na Kalou me baleta nodra vakaturi na mate, ni a kaya, ‘O yau na Kalou i Eparama, na Kalou i Aisake, kei na Kalou i Jekope’? E sega ni nodra Kalou na mate o koya, e nodra Kalou ga na bula.” A vakaibalebaletaka tiko eke o Jisu na nodrau veivosaki o Mosese kei na Kalou ena yasa ni vunikau kama, rauta na 1514 B.S.K. (Lako Yani 3:​1-6) Me vaka e tukuna o Jisu, na nona cavuta o Jiova vei Mosese​—“koi au na Kalou ni nomu qase, na Kalou i Eparama, na Kalou i Aisake, kei na Kalou i Jekope”​—e vakadeitaka ni na yaco dina na veivakaturi e yalataka tu. Ena sala cava?

Dikeva mada na veitikina yavolita. Na gauna a vosa kina vei Mosese o Jiova, eratou sa mate makawa na peteriaki o Eparama, Aisake, kei Jekope. Sa 329 na yabaki na nona mate o Eparama, o Aisake e 224, kei Jekope e 197. Ia e tukuna ga o Jiova “koi au” na nodra Kalou​—e sega ni tukuna tiko ni a nodra Kalou tu e liu. A cavuti ratou tiko na tolu peteriaki qori o Jiova me vaka sara ga ni ratou se bula tiko. Na cava na vuna?

A vakamacalataka o Jisu: “E sega ni nodra Kalou na mate o koya [Jiova], e nodra Kalou ga na bula.” Vakasamataka mada na ibalebale ni vosa e cavuti qori. Ke sega na veivakaturi, eratou sa na sega ni bula tale o Eparama, Aisake kei Jekope. Ke sa va qori, o Jiova e sa na nodra Kalou na mate. Ena vakaraitaka tale ga ni kaukaua cake vei Jiova o mate, e vaka ga ni sega na kaukaua i Jiova me sereki ira na nona tamata yalodina mai na ivau ni mate.

Na cava gona eda rawa ni tukuna me baleti Eparama, Aisake, Jekope kei ira na dauveiqaravi yalodina kece i Jiova era sa takali? A cavuta o Jisu e dua na vosa bibi: “Vei koya era se bula tu ga.” (Luke 20:38) Io, ena vakayacori dina na inaki i Jiova me vakaturi ira kece na nona dauveiqaravi yalodina era sa takali, oya na vuna e nanuma kina nira se bula tiko ga. (Roma 4:​16, 17) Ni tawavakaiyalayala na ka e rawa ni vakasamataka o Jiova, e se nanumi ira tu na nona tamata yalodina me yacova na gauna e sa lokuca me na vakaturi ira kina.

O marautaka mo sotavi ira na tale na wekamu lomani era sa takali? Ke vaka kina, mo nanuma tiko ni kaukaua cake sara vei mate o Jiova. E sega ni dua na ka ena tarova na vakayacori ni nona vosa ni yalayala me baleta na veivakaturi. Vakacava mo vulica e levu tale na ka me baleta na Kalou kei na veivakaturi sa yalataka tu? Nomu cakava qori o na veivolekati kina kei Jiova, na “nodra Kalou ga na bula.”