“E YALO na Kalou,” eda sega gona ni rawa ni raici koya. (Joni 4:24) Ia e tukuna na iVolatabu ni so era sa raica na Kalou. (Iperiu 11:27) E rawa vakacava? Eda rawa beka ni raici koya na ‘Kalou e tawaraici?’—Kolosa 1:15.

E rawa ni vakatauvatani na keda ituvaki kei na dua e sucu mataboko. Ni sega ni rai, e kena ibalebale beka ni sega ni kila na veika e wavoliti koya? Sega. E kaya e dua na turaga, ‘au mataboko, ia au kila na veika e tu wavoliti au.’ E tiko gona na sala vei ira na mataboko mera kila kina na veika e tu se yaco wavoliti ira.

O keda tale ga e tiko na sala eda rawa ni ‘raici’ koya kina na Kalou. (Efeso 1:18) Dikeva mada.

Era na kila na mataboko na veika e tu wavoliti ira nira vakayagataka na ligadra kei na daligadra. Noda dikeva tale ga na veika e tu wavoliti keda, eda na kilai koya kina na Kalou tawaraici. “Tekivu mai na gauna a buli kina na vuravura e kilai na veika tawarairai me baleti koya, . . . e kilai qori ena veika e buli.”—Roma 1:20.

Kena ivakaraitaki, vakasamataka mada noda vuravura. E sega ni buli me rawa wale ga kina na bula, ia meda marautaka tale ga. Nida vakila na mudre ni cagi, cila ni siga, boi kamica ni vuata, kei na nodra sere na manumanuvuka, sega beka ni vakamarautaki keda qori? E laurai e keri na veinanumi, yalololoma kei na nona yalovinaka na Dauveibuli.

Na cava o vulica ni o dagava na maliwalala? Io, e vakatakila o lomalagi na kaukaua ni Kalou. Era vakadinadinataka na vuku ni tubu tiko na noda maliwalala, qai totolo na kena yaco. Ni o dagava na lomalagi ena bogi, vakasamataka mada: Na kaukaua cava e vakavuna me tubu totolo kina na noda maliwalala? E sauma na iVolatabu “na nona kaukauwa” na Dauveibuli. (Aisea 40:26) E laurai tale ga ena ka e buli ni Kalou “kaukauwa” duadua qai “uasivi ko koya e na kaukauwa.”—Jope 37:23.

E kaya e dua na tina e mataboko e rua na luvena: “Rau vuli na luvequ mai na veika au vakamacalataka vei rau. Ni o tukuna vei ira na ka o rogoca kei na ka kece o raica, o sa vaka tiko na matadra.” E ‘sega tale ga ni dua se bau raica na Kalou,’ na Luvena ga o Jisu ‘e tukuni koya, ni tiko o koya ena lomaserei Tamana.’ (Joni 1:18) Ni imatai ni ibulibuli ni Kalou o Jisu qai Luvena duabau e “matada” gona i lomalagi o koya. Ena nuitaki gona vakaoti na nona itukutuku me baleta na Kalou tawaraici.

Dua na gauna balavu erau bula vata tu mai kina o Jisu kei na Kalou, dikeva gona eso na ka e tukuna me baleti Tamana:

• E cakacaka tiko ga na Kalou. “E cakacaka tiko ga o Tamaqu me yacova mai qo.”—Joni 5:17.

• E kila na ka eda gadreva. “Ni kila na Tamamuni na ka oni vinakata ni bera mada ga ni oni kerea.”—Maciu 6:8.

• E vakarautaka vakayalololoma vei keda na ka. “[Na] Tamamuni e tiko mai lomalagi, . . . [e] dau vakacabea na matanisiga vei ira na tamata ca kei na tamata vinaka, e vakatauca tale ga na uca  vei ira na yalododonu kei ira na sega ni yalododonu.”—Maciu 5:45.

• E kauaitaki keda yadua na Kalou. “E sega beka ni volitaki e rua na siparo ena dua na ilavo lailai? Ena sega ni lutu ina qele e dua vei rau me sega ni kila na Tamamudou. Ia e kila vinaka o koya na iwiliwili ni drauniulumudou. Dou kua gona ni rere: Dou talei sara vei ira na siparo.”—Maciu 10:29-31.

E duidui na sala era kila kina na ka na mataboko ni vakatauvatani kei ira era rai. Kena ivakaraitaki, o ira na mataboko era sega ni kila na irairai ni vanua e rurugu, era kila ga ni qori na vanua batabata qai sega ni cila kina na siga. Me vaka ga na nona sega ni vakaduiduitaka rawa e dua na mataboko na rarama mai na butobuto, o keda tale ga eda na sega ni tu tu ga eda sa kilai koya na Kalou. E vakarautaka gona na Kalou o Jiova e dua me vakaraitaka na nona itovo kei na ka e kilai tani kina.

Qori o Jisu. (Filipai 2:7) E sega wale ga ni tukuni Tamana o Jisu, ia e vakatakilai koya sara ga. A kerei koya o Filipi na nona tisaipeli: “Turaga, vakatakilai Tamamuni mada vei keitou.” E mani sauma o Jisu: “O koya e raici au e raici Tamaqu.” (Joni 14:8, 9) Vakacava o “raici” koya na Kalou ni o dikeva na ivakarau ni bula i Jisu?

E dau yalololoma o Jisu, yalomalumalumu, qai torovi rawarawa. (Maciu 11:28-30) Qori e vakavuna mera taleitaki koya e levu. E tarai koya na rarawa kei na marau era vakila. (Luke 10:17, 21; Joni 11:32-35) Ni o wilika se rogoca na itukutuku i Jisu, saga mo raitayaloyalotaka me vaka sara ga era yaco dina tiko. Ia ke o qai vakasamataka vakatitobu na ivakarau ni nona dauveikauaitaki, o na raica kina na itovo vakasakiti ni Kalou. Qori ena uqeti iko mo toro voleka vua.

E kaya e dua na dauvolaivola me baleta na sala era kila kina na mataboko na veika e tu wavoliti ira: “Era dau vakarorogo, vakila na ka, boica ra qai raitayaloyalotaka.” Nida dikeva tale ga na ibulibuli ni Kalou, wilika na ka e tukuna o Jisu me baleti Tamana, qai vakasamataka na itovo vakasakiti ni Kalou ena ivakaraitaki i Jisu, eda na boroya e dua na iyaloyalo totoka me baleti Jiova. E vaka sara ga eda sa raica na Kalou.

A vakadinadinataka tale ga qori o Jope, e dua a bula ena gauna vakaivolatabu. Ia taumada a “lecava” tu qori o koya. (Jope 42:3) Ia na nona dikeva vinaka na veika vakatubuqoroqoro e bulia na Kalou, e uqeti koya me tukuna: “Ka’u a rogoci kemuni e na daligaqu walega; Ia sa qai raici kemuni na mataqu.”—Jope 42:5.

E rawa ni dina tale ga qori vei iko. “Kevaka ko na vakasaqarai koya [Jiova], ko na kunei koya.” (1 Veigauna 28:9) Era marautaka na iVakadinadina i Jiova mera vukei iko mo kilai koya na Kalou tawaraici.