Ni o bera ni saga mo cakava e dua na ka, de dua o na vaqaqa, ‘Cava na kena yaga vei au?’ Vakacava, e ivakaraitaki ni nomu nanumi iko ga ke o taroga na yaga ni masu? E sega. Eda na via kila ga na kena yaga. Na turaga vinaka mada ga o Jope a taroga: “Keu kacivi koya, ena rogoci au?”—Jope 9:16.

Ena ulutaga sa sivi, eda raica kina ni masu e sega ni dua ga na ivakarau ni lotu se me vakabulabulataki kina na vakasama. E dau rogoca sara ga na masu na Kalou dina. Ena rogoci keda ke donu na ka eda masulaka, e veiganiti tale ga. E uqeti keda mada ga meda toro volekati koya yani. (Jemesa 4:8) Cava gona meda namaka ke sa ivakarau ga ni noda bula na masu? Meda dikeva mada eso na kena yaga.

O dau lomaocaoca ni yaco na leqa se o vakatovolei? E uqeti keda na iVolatabu meda “kua ni cegu ena masu” ena gauna va qori, meda ‘vakaraitaka vua na Kalou’ na ka kece. (1 Cesalonaika 5:17; Filipai 4:6) E vakadeitaka na iVolatabu ke oni dau nuitaka na Kalou ena masu ena “qai taqomaka na lomamuni kei na nomuni vakasama na vakacegu ni Kalou e uasivia na vakasama kece.” (Filipai 4:7) Eda na vakacegu vakalevu ke da talaucaka na lomada vua na Tamada vakalomalagi. E uqeti keda sara ga meda cakava qori. E kaya na Same 55:22: “Biuta vei Jiova na nomu icolacola bibi, ena tokoni iko o koya.”

E dua na iwiliwili levu e vuravura era sa vakila tiko na vakacegu qori. E kaya e dua na yalewa o Hee Ran, mai na Ceva kei Korea: “Sega ni tukuni rawa na levu ni noqu leqa, ia niu masu, e taluva vakadua, au qai vakila na kaukaua meu vosota tiko kina.” E kaya  tale ga e dua na marama o Cecilia, mai na Yatu Filipaini: “Niu tina, au dau leqataki rau na luvequ yalewa, kei tinaqu ni dau guiguileca, qai sega ni kilai au ena so na gauna. Ia e vukei au na masu meu tomana tiko ga noqu cakacaka e veisiga, meu kua ni lomaleqa vakalevu. Au kila ni na vukei au kina o Jiova.”

Vakacava o lomaocaoca tiko vakasivia, se o sotava tiko na ituvaki leqataki, e ririkotaki tale ga nomu bula? Ena yaga sara vakalevu nida masuta na “Kalou e dau vakacegui keda ena ka kece.” E kaya na iVolatabu ni na “vakacegui keda ena veika dredre kece eda sotava.” (2 Korinica 1:3, 4) Kena ivakaraitaki, ena dua na gauna e lomabibi vakalevu o Jisu “e  tekiduru qai masu.” Na kena yaga? “E qai rairai mai lomalagi e dua na agilosi me vakaukauataki koya.” (Luke 22:41, 43) Dua tale na turaga yalodina o Niemaia, era vakarerei koya na tamata ca nira via tarova nona cakava na cakacaka ni Kalou. E masulaka: “Au masulaka moni vakaukauataka na ligaqu.” Na veika e qai yaco tarava e vakadinadinataka ni vukei koya dina na Kalou me kua ni rere, me vakacavara vinaka tale ga nona cakacaka. (Niemaia 6:9-16) E kaya e dua na tagane mai Ghana o Reginald me baleta nona masu: “Niu dau masu, vakauasivi ena gauna au nuiqawaqawataka tiko kina na veika dredre, e vaka ga au talaucaka tiko noqu leqa vua e dua e rawa ni vukei au, qai vakadeitaka meu kua ni lomaleqataka.” Io e rawa ni vakacegui keda na Kalou nida masuti koya.

Eso noda vakatulewa eda qai dau vakila tu na kena ca ena noda bula kece, vaka kina o ira eda veivolekati. Eda na rawa vakacava ni vakatulewa donu? E kaya na iVolatabu: “Ke dua vei kemuni e lailai vua na vuku, me kerea tiko ga vua na Kalou, ni na soli vua. Ni lomasavu o koya vei keda kece, e sega ni dau vaqara cala.” (Jemesa 1:5) Ke da masulaka meda vuku, ena vakayagataka na Kalou na yalona tabu me dusimaki keda meda vakatulewa vakayalomatua. Eda rawa sara ga ni kerea vakadodonu na veivuke ni yalo tabu ni a veivakadeitaki kina o Jisu ni na ‘solia na yalo tabu na Tamada vakalomalagi vei ira era kerea vua!’—Luke 11:13.

O Jisu mada ga e kerei Tamana me vukei koya ni bera ni vakayacora e dua na vakatulewa bibi. E kaya na iVolatabu ni a “masu tiko vua na Kalou ena bogi taucoko” ena gauna e via digitaka kina e 12 nona yapositolo.—Luke 6:12.

Me vakataki Jisu ga, e levu nikua era uqeti sara ga nira raica nona sauma na Kalou nodra kerekere mera vakatulewa vakayalomatua. E vakamacalataka na levu ni nona leqa e dua na yalewa o Regina, mai na Yatu Filipaini. E saga me qaravi koya kei na nona vuvale ni sa takali o watina, e cegu mai na cakacaka, qai dredre nona veisusu. Cava e vukei koya me vakatulewa vakayalomatua? E kaya: “Au nuitaka na veivuke i Jiova ena noqu dau masu vua.” E kaya tale ga e dua na turaga mai Ghana, o Kwabena, na vu ni nona kere veivuke vua na Kalou: “Au cegu mai na dua na kabani ni tara vale qai sau vinaka.” Ni vakasamataka tiko na ka me cakava, e kaya: “Au dau masuta na veidusimaki i Jiova meu vakatulewa kina vakayalomatua.” E kaya tale: “Au kila deivaki ni vukei au o Jiova meu digia e dua na cakacaka meu qarava kina noqu bula vakayalo, vakayago tale ga.” Ena rawa tale ga ni dusimaki iko na Kalou ni o masulaka vua na veika e vauca na nomudrau veiwekani voleka.

Qori ga e vica na ivakaraitaki me baleta na yaga ni masu. (Kena ivakaraitaki, raica na kato “ Yaga ni Masu.”) Ia me yaga vei kemuni qori, e vinaka moni kila mada na Kalou kei na nona inaki. Ke oni via cakava dina qori, oni uqeti moni kerei ira na iVakadinadina i Jiova mera vakavulici kemuni ena iVolatabu. * Qori na imatai ni ka oni rawa ni cakava moni volekati koya kina e “Daurogo masu.”—Same 65:2.