Au sucu ena dua na tauni lailai e Poladi, volekata ga na iyala ni vanua e Jamani. Au vakila na bula vakacegu ena neitou itikotiko ni wavokita na veikau kei na iteitei. Rau uqeti au noqu itubutubu meu qara na bula vinaka, meu gumatua e koronivuli, me dua tale ga noqu cakacaka vinaka.

E tekivu veisau noqu bula niu lai vuli loya ena dua na univesiti ena siti o Wrocław. Niu yawaki rau noqu itubutubu, au vakailala ca. Au dau taleitaka na soka, ia au bobula kina ena nodra veiuqeti noqu itokani vou. Dua na timi mai Warsaw au dau taleitaka, au dau sarasara ena vanua kece ga e qito kina ena muanimacawa. Au dau lai gunu sivia kina, vakayagataka na wainimate gaga, so na gauna au tini sara ena veivala kei ira na ito ni timi adua. Na gauna qori au dau guilecava kina na oca ni bula e veisiga, ia au kila tale ga ni na rawa ni vakaleqa noqu via lai vuli loya ke ra vesuki au na ovisa.

Au dau taleitaka kei ira na noqu ilala na lako ina vale ni danisi kei na vanua ni veivakamarautaki e caka kina na gunu. Na lasa va qori e dau tini ga ena veibuturaki e gaunisala. Ra vesuki au vakavica na ovisa, ia au sega ni dau beitaki ena cala levu niu dau vaqumi ira ena so na gauna. Au nanuma ga ni sa bula vinaka duadua qo. Ia au kila deivaki ni cala na ka au cakava tiko. Au lai lotu ena veisigatabu me kua ni ca kina noqu lewaeloma.

Rau tukituki yani e vale ena 2004 na iVakadinadina i Jiova, au mani vakadonuya me keitou veitalanoa vakaivolatabu. Niu vulica na ibalebale ni lotu vaKarisito dina, sa qai ca ga vakalevu na lomaqu. Au kila ni dodonu meu muduka noqu gunu vakasivia, vakayagataki wainimate gaga, vaka kina noqu vakailala kei ira na sega ni muria na ivakatagedegede vakaivolatabu. Meu na veisautaka tale ga na noqu ivakarau ni bula meu kua ni dau cudrucudru. Au sa kila tu ni dodonu meu veisau, ia au se muria tiko ga na sala ca.

E veisau noqu bula ena dua na bogi niu tekivutaka na veibuturaki kei na walu na tagane. Sega ni yali rawa vei au na noqu sa davo tu e gaunisala, au lau vacu, caqeti tale ga na uluqu. Niu kila niu sa vakarau mate, au qai masu: “Vosoti au Jiova niu sega ni kauaitaka vakabibi na nomuni Vosa. Keu bula, au yalataka niu na vuli iVolatabu  kei ira na iVakadinadina i Jiova, au na veisau tale ga.” Kalougata niu bula. Au dina ina noqu yalayala meu vulica na iVolatabu.

Au toki i Igiladi ena 2006. Noqu inakinaki meu lai rawa ilavo mai kina, meu qai lesu i Poladi meu lai tomana noqu vuli loya, ena ivakatagedegede e tiko sara e cake. Ia niu vuli iVolatabu tiko ga, e uqeti au e dua na tikinivolatabu. E vola na yapositolo o Paula: “Au okata mera tawayaga na ka kece ena vuku ni kena talei na kilai Karisito Jisu na noqu Turaga. Ena vukuna au bolea meu vakanadakuya na ka kece, au okata mera benu meu veivolekati kina kei Karisito.” (Filipai 3:8) E vakataki au na yapositolo o Paula, a vuli loya qai voravora nona bula. (Cakacaka 8:3) Ia e qai vulica e dua tale na ivakarau ni bula vinaka: me qarava na Kalou, qai saga nona igu me vakatotomuri Jisu. Niu vakasamataka vakatitobu na bula i Paula, au raica ni sega na marau ena cakacaka isaulevu kei na ivalavala voravora. Au vakadeitaka niu rawa ni veisau me vakataki Paula. Au mani vakatulewataka meu sa tu ga e Igiladi, meu kua ni tomana noqu vuli loya.

Na levu ga ni noqu vulici Jiova, na noqu volekati koya. E uqeti au na nona yalayala ni na vosoti ira na vinakata dina mera veisau. (Cakacaka 2:38) Niu vakasamataka vakatitobu na 1 Joni 4:16, e tukuni kina ni “Kalou ga na loloma,” au sa qai kila na vuna e cata kina na ivalavala voravora na Kalou.

E uqeti au tale ga na nodra itovo na iVakadinadina. Au raica votu nira saga tiko mera muria na ivakavuvuli vakaivolatabu me baleta na itovo. Au via maliwai ira sara ga na mataveitacini mamarau qori. Ni oti toka noqu sasaga kei na noqu veisautaka na noqu bula, au papitaiso meu iVakadinadina i Jiova ena 2008.

E veisautaki au na iVolatabu meu biuta noqu dau guta na ivalavala voravora, vakayagataki ni wainimate gaga, gunu vakasivia kei na bobula ina soka, meu qarava na Kalou, au marautaka na veivakavulici ena iVolatabu. Au se taleitaka tiko ga na soka, ia au saga meu kua ni vakaliuca.

Au marautaka tiko qo noqu bula vakawati kei Esther, e dua na yalewa totoka e qaravi Jiova tale ga. Keirau marautaka na veivakavulici ena iVolatabu vei ira na vosa vakaPoladi era tiko ena vualikuira kei Igiladi. Au sa qai vakila tu vakadua na bula vakacegu. E savasava noqu lewaeloma, vakainaki tale ga noqu bula.