E TOKA o Nepal ena vualiku kei Idia qai levu na kena ulunivanua. Ena Vakarauwai na ika25 ni Epereli, 2015, a kurei Nepal e dua na uneune vakaitamera e 7.8 na kena kaukaua. A yaco na uneune ena vuaira ni kena koroturaga o Kathmandu. Era mate kina e le 8,500, qori na iwiliwili levu duadua ni lewenivanua mera mate ena dua na leqa tubukoso. E vakacacani e sivia e veimama na milioni na vale. Era le 2,200 na iVakadinadina i Jiova e Nepal, levu vei ira qori era vakaitikotiko ena vanua e yaco kina na uneune. E ka ni rarawa ni mate e dua na iVakadinadina kei na rua na luvena.

E kaya e dua na iVakadinadina o Michelle nira tiko ena nodra soqo ni lotu e levu na iVakadinadina i Jiova ena gauna e yaco kina na uneune. Ke ra tiko ena nodra vale, a rawa nira mate e levu tale. Na cava era bula kina na iVakadinadina era tiko ena nodra soqo ni lotu? A veivuke vakalevu na itaratara ni nodra Vale ni Soqoni.

Ni yaco na uneune, e rawa ni duri tu ga na nodra Vale ni Soqoni na iVakadinadina i Jiova e Nepal ena vuku ni kena itaratara. E kaya o Man Bahadur e dua na turaga e dau veivuke ena tara ni vale qori: “Ni ka lalai ga na vale, era dau taroga e levu se cava e vakarautaki vinaka sara kina na kena yavu. Keimami sa qai raica qo na kena yaga!” Oti na uneune, a vakadonui me idrodro na nodra Vale ni Soqoni na iVakadinadina i Jiova. O ira na lai vakaruru e kea era vakila na lomavakacegu, dina ni se tarai ira tu na revurevu ni uneune.

Era yavala totolo na ivakatawa ni iVakadinadina i Jiova ena nodra vaqarai na lewenilotu era se yali tiko. E kaya e dua na iVakadinadina o Babita ni tarai ira sara ga na nodra veinanumi kei na nodra loloma na ivakatawa qori. Eratou veisiko tale ga na lewe ni komiti e qarava tiko na nodra cakacaka na iVakadinadina i Jiova e Nepal, ra qai veitomani eso tale na ivakatawa mera lai laurai na lewenilotu kei na veivuke e gadrevi me caka vei ira.

Erau gole tale ga i Nepal o Gary Breaux kei na watina o Ruby, rau veiqaravi ena itikotiko liu ni iVakadinadina i Jiova mai Merika. E kaya o Reuben e lewe ni komiti sa cavuti oti mai: “E veilecayaki na ituvaki e Kathmandu ni se vakilai tu na revurevu ni uneune. Keimami lomalomaruataka kina na nona veisiko yani o Gary Breaux. Ia sega ni dua na ka ena tarova na ilakolako qo, ena yaco ga mai ke o Gary! Dua na ka nodra marautaka na iVakadinadina na nona veisiko.”

E kaya o Silas e veiqaravi ena valenivolavola ni iVakadinadina i Jiova e Nepal: “Gauna ga e rawa tale kina na qiri, sa taqiri tu ga ena bogi kei na siga na talevoni! Era nanumi keimami tu mai na iVakadinadina e veiyasa i vuravura. Keimami sega ni veikilai vosa, ia keimami kila nira lomani keimami ra qai vinakata dina mera veivuke.”

 Ni oti na uneune, era kau kakana yani ena nodra Vale ni Soqoni na iVakadinadina me lai soli vei ira na vinakata na veivuke. A tauyavu tale ga e dua na Komiti ni Vakacoko, levu na iyaya ni veivuke e vakau mai Bangladesh, Idia, kei Japani. Oti tale e vica na siga, eratou yaco yani eso na iVakadinadina mai Urope qai vakayagataki e dua na Vale ni Soqoni me vakayacori kina nodratou veiqaravi vakavuniwai. Era laurai vakavuniwai o ira era vakaleqai ena uneune, era vakacegui tale ga ena rarawa ni lomadra.

E kaya e dua na yalewa o Uttara me baleta na ka era vakila e levu: “E vakadomobula na uneune. Ia keimami veivolekati kina vakalevu kei ira na lewe ni neimami vuvale vakayalo.” Io, na uneune sa qai vaqaqacotaka ga na nodra lomani Jiova na nona iVakadinadina, kei na loloma era vakaraitaka vei ira era vakabauta vata.