Yalataka na Dauveibuli na Veika Totoka
E yalataka na Kalou e levu na veika totoka ena veigauna se bera mai. Ena vakaotia na rarawa qai raica mera marautaka na tamata na bula ena vuravura. (Same 37:11) Cava meda vakabauta kina na yalayala qori? Ni “Kalou e sega ni tamata me vosa lasu.” (Tiko Voli Mai na Lekutu 23:19) Dikeva mada eso na ka vinaka ena cakava na Dauveibuli.
Na Kalou ena Vakarusai Ira na Tamata Ca
“Nira kadre na daucaka ca me vaka na co ca ra qai bulabula na dau cakacala, sa rauta mera vakawabokotaki vakadua.”—SAME 92:7.
Eda sa vulica ena ulutaga sa oti, ni sa qai levu tiko ga na veika ca. Meda kua ni kurabuitaka, ni sa tukuna tu na iVolatabu ena 2 Timoci 3:1-5 ni na torosobu na nodra itovo e levu ena “iotioti ni veisiga.” Na cava na ibalebale ni iotioti ni veisiga? Na iotioti ni nodra gauna o ira na talaidredre vua na Kalou. Sa voleka na gauna me vakarusai ira na Kalou. Mera qai bula ga na tamata vinaka era talairawarawa vua. “O ira na yalododonu era na taukena na vuravura, era na qai bula tawamudu kina.”—Same 37:29.
Na Kalou ena Vakarusai Setani
“Na Kalou ni vakacegu ena qai butuqaqi Setani.”—ROMA 16:20.
Ena vakilai na vakacegu e vuravura ni sa vakarusai o Setani, ira na timoni kei ira na tamata ca. E yalataka na Dauveibuli: “Ena sega ni dua me vakarerei [iko.]”—Maika 4:4.
Ena Vakaotia na Kalou na Tauvimate kei na Mate
“Sa tiko vei ira na tamata na vale ni Kalou . . . Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.”—VAKATAKILA 21:3, 4.
Na Kalou ena vakaotia na rarawa kei na tauvimate e vakavuna o Setani, Atama, Ivi, kei na noda valavala ca. ‘Sa na sega tale ga na mate.’ Era na qai bula tawamudu o ira era lomana na Dauveibuli, ra qai talairawarawa vua. Ia era na qai bula i vei?
Ena Veisautaka na Dauveibuli na Vuravura me Parataisi
“Ena reki na vanua talasiga kei na vanua sigasiga, kei na buca dravuisiga ena marau, ena se me vaka na senikau na sefaroni.”—AISEA 35:1.
Ni sa na vakarusai na veika ca kece, ena qai parataisi na vuravura! Ena levu na vanua ni gade rairai vinaka kei na iteitei, ena levu tale ga na kakana. (Same 72:16) Ena savasava na waitui, drano kei na uciwai, ena qai marautaki na bula. Eda na sega tale ni rogoca na vakacacani ni veika bula! Era na tiko na tamata ena nodra dui vale era tara. Ena oti vakadua na leqa ni veivakavaletaki, leqa ni kakana, se bula dravudravua.—Aisea 65:21, 22.
Na Kalou ena Vakabulai Ira Tale na Mate
“Nira na vakaturi.”—CAKACAKA 24:15.
O na via sotavi ira tale na wekamu lomani era sa mate? Na Kalou Kaukaua Duadua ena vakaturi ira mera bula tale ena vuravura Parataisi. Ni o raici ira, oni na veikilai qai veimarautaki! Eda na vakadeitaka vakacava ni na yaco dina qo? E tu ena iVolatabu na ivakadinadina ni nodra vakabulai na qase kei na gone mera sotavi ira tale nodra vuvale. E levu era vakadinadinataka tale ga na veivakaturi e cakava o Jisu.—Luke 8:49-56; Joni 11:11-14, 38-44.
Rawa ni o Wilika Tale ga
YADRA!
Sa Veilecayaki o Vuravura—Taqomaka Nomu iNuinui
E vukei keda na iVolatabu meda vosota na ituvaki dredre, e yalataka tale ga na inuinui totoka e se bera mai.
SAUMI NA TARO VAKAIVOLATABU
Na Cava na Veivakaturi?
O na rairai kurabui ena nodra vakaturi mai e levu.
ESSENTIAL BIBLE TEACHINGS
Na Cava na Kedra iTuvaki na Mate?
E yalataka na iVolatabu nodra na vakaturi e levu, se tu cake tale mai na mate, me vakataki Lasarusa.
SAUMI NA TARO VAKAIVOLATABU
Sala Cava ena Vakilai Kina e Vuravura na Vakacegu?
Vulica na ka e yalataka na Kalou me baleta na vakacegu ena kauta mai nona Matanitu.
SAUMI NA TARO VAKAIVOLATABU
Au na Kunea i Vei na iNuinui?
Ena rawa ni yaga na iVolatabu ena nomu bula ena gauna qo, o na nuidei tale ga ena veigauna se bera mai.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
