Hetta bíbliuskeiðið hevur lært teg nógv um Jehova. Og kanska hevur alt tað, sum tú hevur lært um hann, fingið teg at elska hann so nógv, at tú hevur vígt títt lív til hansara og latið teg doypa. Viss ikki, ætlar tú tær kanska at gera tað skjótt. Men tú mást blíva við at gera framstig, eisini aftan á at tú ert blivin doyptur. Tú kanst blíva við at læra Jehova betur at kenna í allar ævir. Hvussu tá?

1. Hví skalt tú blíva við at styrkja títt vinalag við Jehova?

Vit mugu blíva við at gera nakað fyri at styrkja okkara vinalag við Jehova, tí annars kunnu ’vit reka burtur’ frá honum. (Hebrearabrævið 2:1) Hvat kann hjálpa okkum at vera trúføst móti honum? Vit kunnu vera so nógv við í boðanini sum gjørligt og umhugsa, um vit kunnu gera meira fyri hann. (Les Filippibrævið 3:16.) Tá ið vit tæna Jehova, fáa vit tað besta lívið. – Sálmur 84:11.

2. Hvat annað skalt tú blíva við at gera?

Sjálvt um hetta bíbliuskeiðið skjótt er liðugt, kanst tú blíva við at gera framstig sum ein tænari fyri Jehova. Bíblian sigur, at vit mugu ’lata okkum í hitt nýggja menniskjað’. (Efesusbrævið 4:23, 24) So hvørt sum tú heldur fram at kanna Bíbliuna og at ganga á møti, lærir tú meira um Jehova, og hvussu hann er. Tú kanst royna at líkjast honum enn meira. Tá ið tú uppdagar, at okkurt má broytast, mást tú gera tað fyri at gleða Jehova.

3. Hvussu fer Jehova at hjálpa tær?

Jehova lovar at blíva við at upplæra teg, og Bíblian sigur, at hann skal ’staðfesta, styrkja og grundfesta teg’. (1. Pætursbræv 5:10) Vit verða øll freistað til at gera okkurt skeivt av og á. Men Jehova kann geva okkum styrki til at standa ímóti freistingunum. (Sálmur 139:23, 24) Hann lovar at geva tær bæði hug og styrki til at vera trúfastur móti honum. – Les Filippibrævið 2:13.

 LÆR MEIRA

4. Tú mást halda fram at tosa við og lurta eftir tínum besta vini

Orsøkin til, at tú ert blivin vinur við Jehova, er, at tú hevur biðið til hansara og kannað hansara orð. Hvussu kunnu hesi bæði tingini hjálpa tær at fáa eitt enn tættari samband við hann?

Les Sálm 62:9, og tosa um henda spurningin:

• Hvussu kanst tú forbetra tínar bønir, so tú fært eitt uppaftur tættari samband við Jehova?

Les Sálm 1:2, og tosa um henda spurningin:

• Hvussu kanst tú fáa meira burtur úr tínari bíbliulesing og soleiðis fáa eitt tættari samband við Jehova?

Hvussu kann tað blíva meira spennandi hjá tær at lesa í Bíbliuni? Hygg at VIDEONUM, og fá nøkur uppskot. Tosa síðani um spurningarnar.

• Hvørji uppskot í videonum hevur tú hug at brúka?

• Hvørji evni kundi tú hugsað tær at kannað nærri?

 HVAT HEVUR TÚ LÆRT?

Viss tú blívur við at styrkja títt vinalag við Jehova og at seta tær andalig mál, kanst tú fáa eitt gott lív nú og í allar ævir.

Greið frá

• Hví kanst tú vera vísur í, at Jehova fer at hjálpa tær at vera trúfastur móti honum?

• Hvussu kanst tú styrkja títt vinalag við Jehova?

• Hvussu kann tað at seta tær andalig mál hjálpa tær at gera framstig?