Eǒ. Biblu ɖɔ nyi wɛn ɖɔ Mawu dá gbɛtɔ́ lɛ kaka jɛ kanlin, atín kpo gbehan “tɛnmɛ tɛnmɛ” lɛ kpo jí. a (Bǐbɛ̌mɛ 1:12, 21, 25, 27; Nǔɖexlɛ́mɛ 4:11) É ɖɔ ɖɔ Adamu kpo Ɛvu kpo, ee nyí mɛjitɔ́ mǐtɔn nukɔntɔn lɛ é sín kúnkan mɛ wɛ gbɛtɔ́ lɛ bǐ jɔ sín. (Bǐbɛ̌mɛ 3:20; 4:1) Tan Biblu tɔn lɛ nɔ gudo nú nǔkplɔnmɛ e ɖɔ ɖɔ Mawu bló bɔ nǔɖogbɛ tɛnmɛ tɛnmɛ lɛ jɔ nú yeɖée é ǎ; nǔkplɔnmɛ enɛ wɛ è nɔ ylɔ́ hweɖelɛnu ɖɔ nǔkplɔnmɛ nǔ lɛ jɔ nú yeɖée tɔn. Amɔ̌, Biblu yí xó nú nǔnywɛ xwitixwitizɔ́watɔ́ ɖěɖee ɖɔ ɖɔ nú è sɔ́ nǔɖogbɛ ɖokpo ɖokpo ɔ, tɛnmɛ tɛnmɛ tɔn wɛ ɖè lɛ é.

•  Mawu nɔ bló bɔ nǔ lɛ nɔ jɔ nú yeɖée wɛ à?

•  Biblu xò nǔ dó akpa ɖokpo ɔ mɛ xá nǔkplɔnmɛ nǔ lɛ jɔ nú yeɖée tɔn ɔ wɛ à?

•  Nǔwukpíkpé e gbehan, atín kpo kanlin lɛ kpo ɖó bo na huzu ninɔmɛ sɔgbe xá fí e ye ɖè é ka xlɛ́ ɖɔ nǔ lɛ jɔ nú yeɖée wɛ à?

 Mɛ ɖěɖee ɖi nǔ ɖɔ Mawu bló bɔ nǔ lɛ jɔ nú yeɖée lɛ é nɔ ɖó linlin vovo lɛ dó lee é dá gbɛ̀ ɔ gbɔn é wu. Sɔgbe xá Encyclopædia Britannica ɔ, “mɛɖé lɛ nɔ ɖɔ ɖɔ lee nǔ e ɖò gbɛ̀ lɛ é nɔ huzu sɔgbe xá xá e mɛ ye ɖè é, b’ɛ nɔ zɔ́n ye nɔ nɔ gbɛ̀ bo nɔ lɛ́ gbà kún ganji gbɔn é nyí wlɛnwín ɖé bɔ Mawu zán dó dá nǔ e ɖò gbɛ̀ ɔ mɛ lɛ é.”

 Linlin elɔ lɛ lɔ sixu ɖò nǔkplɔnmɛ nǔ lɛ jɔ nú yeɖée tɔn ɔ mɛ:

•   Tɔ́gbó ɖokpo géé dó kún nǔ e ɖò gbɛ̀ lɛ é ɖokpo ɖokpo tɔn dìn é ɔ, é ko lín tawun.

•   Nǔɖogbɛ alɔkpa ɖé sixu ɖò huzuhuzu wɛ kaka bo wá huzu nǔɖogbɛ alɔkpa ɖevo sésé.

•   Mawu wɛ nyí tɔn bɔ nǔ enɛ lɛ bǐ nɔ jɛ gbɔn mɔ̌ ɖò ali ɖé nu.

 Nǔkplɔnmɛ nǔ lɛ jɔ nú yeɖée tɔn ɔ nɔ xlɛ́ ɖɔ tan Biblu tɔn e ɖò Bǐbɛ̌mɛ mɛ, bo ɖɔ xó dó nǔɖiɖó lɛ wu é kún sɔgbe bǐ mlɛ́mlɛ́ ó. É ɖò mɔ̌ có, Jezu ɖè xó sín tan Bǐbɛ̌mɛ tɔn mɛ, bo xlɛ́ ɖɔ kúnnuɖenú ɖejid’ewu wɛ. (Bǐbɛ̌mɛ 1:26, 27; 2:18-24; Matie 19:4-6) Biblu ɖɔ ɖɔ cobonu Jezu na wá ayikúngban jí ɔ, é ko nɔ gbɛ̀ ɖò jixwé xá Mawu bo d’alɔ Mawu b’ɛ bló “nǔ e ɖò gbɛ̀ ɔ mɛ lɛ bǐ.” (Jaan 1:3) Enɛ wu ɔ, linlin e mɛ lɛ ɖó ɖɔ Mawu bló bɔ nǔ vovo lɛ jɔ nú yeɖée é sɔgbe xá nǔkplɔnmɛ Biblu tɔn lɛ ǎ.

 Biblu tinmɛ huzuhuzu ɖěɖee nǔ e ɖò gbɛ̀ é ɖé sixu bló lɛ é ǎ. Mɔ̌ jɛn é ma ka lɛ́ gbɛ́ ɖɔ kanlin kpo atín kpo tɛnmɛ tɛnmɛ e Mawu dá lɛ é kún sixu huzu ninɔmɛ sɔgbe xá fí e ye ɖè é ǎ é nɛ. Nǔgbo wɛ ɖɔ mɛɖé lɛ nɔ mɔ ɖɔ huzuhuzu enɛ lɛ e nɔ tíìn é ɔ, nǔ lɛ jɛn nɔ jɔ nú yeɖée ɖò ali ɖé nu, amɔ̌, huzuhuzu enɛ lɛ nɔ bló bɔ nǔ e ɖò gbɛ̀ é yɔyɔ̌ ɖevo nɔ tíìn ǎ.