Mawu cyan Klisanwun gbejinɔtɔ́ alɔsɛ́xwi bǔ ɖé, bɔ ɖò kú yetɔn gudo ɔ, è na fɔ́n ye dó jixwé. (1 Piyɛ́ɛ 1:3, 4) Ee è cyan ye gudo é ɔ, ye ɖó na lɛ́ kpò ɖò nǔɖiɖi Klisanwun tɔn yetɔn hɛn lidǒ wɛ, lobo lɛ́ kpò ɖò mimɛ̌ jí ɖò walɔ lixo bo ma wá xò ajɔ jixwé tɔn yetɔn kpò ó.—Efɛzinu lɛ 5:5; Filipunu lɛ 3:12-14.

Etɛ mɛ ɖěɖee xwè jixwé lɛ é ka na wà ɖò dɔ̌n?

 Ye na nyí axɔ́su bo na lɛ́ wà vɔsanúxwlémawutɔ́zɔ́ nú xwè 1 000 ɖò Jezu kpá. (Nǔɖexlɛ́mɛ 5:9, 10; 20:6) Kplékplé yetɔn wɛ na nyí “jinukúnsin yɔyɔ̌” ɔ, alǒ acɛkpikpa jixwé tɔn e na kp’acɛ dó “ayikúngban yɔyɔ̌” ɔ, alǒ gbɛtɔ́ e ɖò ayikúngban ɔ jí lɛ é jí é. Acɛkpatɔ́ jixwé tɔn enɛ lɛ na d’alɔ bɔ è na jlá ninɔmɛ gbɛtɔ́ lɛ tɔn ɖó bɔ ye na nɔ ninɔmɛ e sɔgbe bɔ Mawu lin ɖò bǐbɛ̌mɛ lɛ é mɛ.—Ezayíi 65:17; 2 Piyɛ́ɛ 3:13.

Mɛ nabi è ka na fɔ́n dó jixwé?

 Biblu ɖexlɛ́ ɖɔ è na fɔ́n gbɛtɔ́ 144 000 bɔ ye na nɔ gbɛ̀ ɖò jixwé. (Nǔɖexlɛ́mɛ 7:4) Ðò nǔmimɔ e ɖò Nǔɖexlɛ́mɛ 14:1-3 mɛ é mɛ ɔ, mɛsɛ́dó Jaan mɔ “Lɛngbɔ̌ví ɔ ɖò te ɖò Sinyɔ́ɔ sín só ɔ jí,” bɔ “gbɛtɔ́ adɔ̌kpo tɛnwe děgba (144 000) . . . ɖò finɛ xá ɛ.” Ðò nǔmimɔ enɛ mɛ ɔ, “Lɛngbɔ̌ví ɔ” nɔte nú Jezu e fɔ́n sín kú é. (Jaan 1:29; 1 Piyɛ́ɛ 1:19) “Sinyɔ́ɔ sín só ɔ” nɔte nú tɛn ɖaxó e mɛ Jezu kpo mɛ 144 000 e ɖò acɛ kpa xá ɛ wɛ lɛ é kpo ɖè ɖò jixwé é.—Ðɛhan 2:6; Eblée lɛ 12:22.

 Mɛ ɖěɖee “è ylɔ́ bo cyan” bonu ye na kp’acɛ xá Klisu ɖò Axɔ́suɖuto ɔ mɛ lɛ é wɛ è dó gesí ɖɔ “lɛngbɔ̌hwan kpɛví” ɔ. (Nǔɖexlɛ́mɛ 17:14; Luki 12:32) Enɛ xlɛ́ ɖɔ enyi è sɔ́ ye jlɛ́ dó kplékplé lɛngbɔ̌ Jezu tɔn lɛ tɔn sín kɛ́n wu ɔ, ye na hwe tawun.—Jaan 10:16.

Nukúnnúmɔjɛnǔmɛ agɔ lɛ dó mɛ ɖěɖee xwè jixwé lɛ é wu

 Nukúnnúmɔjɛnǔmɛ agɔ: Kɛ́n 144 000 e xó è ɖɔ ɖò wema Nǔɖexlɛ́mɛ tɔn mɛ é ɔ, nǔɖe lě tlɔlɔ wɛ ǎ, nǔjlɛdonǔwu wɛ.

 Nǔgbo: Nǔgbo wɛ ɖɔ kɛ́n nǔjlɛdonǔwu tɔn lɛ ɖò wema Nǔɖexlɛ́mɛ tɔn mɛ, amɔ̌, kɛ́n ɖé lɛ tíìn bɔ é zán tlɔlɔ. Ði kpɔ́ndéwú ɔ, é ɖɔ xó dó “Lɛngbɔ̌ví ɔ sín mɛsɛ́dó wěwe lɛ sín nyikɔ” wu. (Nǔɖexlɛ́mɛ 21:14) Kpɔ́n kúnnuɖenú e zɔ́n bɔ è wá gbeta ɔ kɔn ɖɔ è ɖó na sɔ́ kɛ́n 144 000 ɔ lɔ ɖó tlɔlɔ é.

 Nǔɖexlɛ́mɛ 7:4 ɖɔ xó dó “mɛ nabi e è ko ɖó wuntun Mawu tɔn nukɔn na lɛ é [alǒ, mɛ ɖěɖee è yí gbè na bɔ ye na nɔ gbɛ̀ ɖò jixwé lɛ é]” wu, bo ɖɔ “ye mɛ adɔ̌kpo tɛnwe děgba (144 000) wɛ.” Nǔ e lɛlɛ̌ dó wemafɔ enɛ é xlɛ́ ɖɔ gbɛ̌ta wegɔ́ ɔ tɔn gbɔn vo, ɖó “mɛ wɔbuwɔbu ɖé” wɛ ɖò éyɛ mɛ, bɔ “mɛ ɖebǔ sixu xà mɛ e ɖò ahwan ɔ mɛ lɛ bǐ ǎ.” Mɛ ɖěɖee ɖò “mɛ wɔbuwɔbu” ɔ mɛ lɛ é lɔ na mɔ hwlɛngán Mawu tɔn. (Nǔɖexlɛ́mɛ 7:9, 10) Nú kɛ́n 144 000 ɔ nyí nǔjlɛdonǔwu bo ɖò gesí dó gbɛ̌ta e mɛ mɛ maxamaxa ɖè é ɖé wɛ hǔn, vogbingbɔn e ɖò gbɛ̌ta we lɛ tɛntin é na blí bú nɛ. a

 Gɔ́ na ɔ, è ɖɔ dó 144 000 lɛ wu ɖɔ è “vɔ́ ye xɔ sín gbɛtɔ́ lɛ mɛ, bonu ye na nyí mɛ nukɔntɔn e è na” lɛ é. (Nǔɖexlɛ́mɛ 14:4) Xógbe ‘mɛ nukɔntɔn e è na lɛ é’ nɔ dó gesí mɛ klewun e è cyan bɔ ye sɔ́ mɛ e kpò lɛ é sín afɔ ɖó te é. Xógbe enɛ wɛ é jɛxa ɖɔ è ni zán dó ɖɔ xó dó mɛ ɖěɖee na kp’acɛ xá Klisu dó mɛ maxamaxa ɖěɖee na ɖò ayikúngban jí lɛ é jí é wu.—Nǔɖexlɛ́mɛ 5:10.