Kanlin e nɔ nɔ xuzan jí bo nɔ lɛ́ nɔ nǔɖogbɛ ɖevo e nɔ nyí récif corallien lɛ é jí lɛ é wɛ kɔnkɔ́nbu xumɛ tɔn lɛ nyí. Wǔtu yetɔn lɛ sixu zun gǒ, cí kancankancan alǒ tlɛ lɛ́ xwíɖí. Ye bɔ tawun, bo tlɛ lɛ́ nyɔ́ xásá hú wǐinkpa alǒ nyɔ́ xásá hú atɛ e è nɔ mlá ɖò cɛju kabǐ segɔndu yɔywɛ ɖé mɛ é. Bibɔ e ɖò kɔnkɔ́nbu xumɛ tɔn sín lanmɛ é nɔ zɔ́n b’ɛ nɔ sá gbɔn fí e ján tawun lɛ é, bo nɔ lɛ́ tɛ́dó nǔ wu gbánwúngbánwún bonu nǔwlikanlin lɛ ma kpé wǔ tɔn ó. Lee kɔnkɔ́nbu xumɛ tɔn sín wǔtu cí é wɛ zɔ́n b’ɛ kpé nǔ wu gbɔn mɔ̌.

Ðǒ ayi nǔ elɔ wu: Kɔnkɔ́nbu xumɛ tɔn sín wǔtu ɖó nǔwukpíkpé bo sixu xú kánwúnkánwún, syɛn ɖó bǎ mɛ, bo lɛ́ bɔ. Kan ɖé lɛ ɖò kɔnkɔ́nbu xumɛ tɔn sín lanmɛ. É yá ɔ, é nɔ cá kan lɛ ɖě dó ɖě nu, alǒ gbɔ cícá ɖó kpɔ́. Mɔ̌ biblo nɔ zɔ́n bɔ wǔtu tɔn nɔ xú kánwúnkánwún, syɛn ɖó bǎ mɛ, alǒ bɔ. Protéine e nɔ bló bɔ nǔ nɔ syɛn lɛ é, alǒ ee nɔ bló bɔ nǔ nɔ bɔ lɛ é wɛ é nɔ zán dó wà mɔ̌.

Protéine e nɔ bló bɔ nǔ nɔ syɛn lɛ é nɔ cá kan e ɖò lan tɔn mɛ lɛ é ɖó kpɔ́ bɔ wǔtu tɔn nɔ mɔ tɛn bo nɔ xú kánwúnkáwún. Protéine e nɔ bló bɔ nǔ nɔ bɔ lɛ é nɔ tún kan lɛ bɔ mɔ̌ mɛ ɔ, wǔtu ɔ nɔ bɔ. Kɔnkɔ́nbu xumɛ tɔn sín wǔtu sixu wá bɔ kaka b’ɛ na cí ɖɔ é ɖò sínsínsínsín wɛ ɖɔhun.

Nǔnywɛ xwitixwitizɔ́watɔ́ lɛ ɖò tintɛnkpɔn wɛ bo na bló azɔ̌wanú e na ɖó nǔwukpíkpé kɔnkɔ́nbu xumɛ tɔn sín wǔtu tɔn ɖɔhun lɛ é. Nǔ e gbé nya wɛ ye ɖè lɛ é ɖokpo wɛ nyí ɖɔ ye na bló azɔ̌wanú e nɔ zán kuláan bo nɔ syɛn ganji bɔ è hɛn ɔ è na sɔ́ ɖó tɛn e jɛxa é mɛ b’ɛ ka na lɛ́ bɔ é, dó dó zɛ fɔn gbɛtɔ́ tɔn. Enyi azɔ̌wanú lɛ kpéwú bo w’azɔ̌ gbɔn mɔ̌ ɔ, fɔn gbɛtɔ́ tɔn zizɛ na ɖibla lɛ́ kpa mɛ hugǎn.

Etɛ a ka lin? Lee kɔnkɔ́nbu xumɛ tɔn sín wǔtu jiwǔ gbɔn é jɔ nú éɖée kpowun wɛ à? Alǒ dǎ wɛ è dá?