Klé alɔkpa e nɔ nyí Pomélo é nyí atín sínsɛ́n kloklo ɖé bo nɔ víví. Nú é na bo tlɛ j’ayǐ sín atín e yì jǐ hú mɛtlu 10 é ɖé jí ɔ, nǔɖe nɔ wà ɛ ǎ! Etɛ ka zɔ́n bɔ atín sínsɛ́n enɛ ma nɔ gbà ǎ?

Ðǒ Ayi Nǔ Elɔ Wu: Dobanúnǔtɔ́ lɛ mɔ ɖɔ akpa Pomélo tɔn wewé e ɖò xomɛ é nɔ ɖó kan ɖé lɛ bɔ xokplé yetɔn nɔ cí tiwun tiwun cifɔ́ɔn ɖɔhun, bɔ tɛnmɛ nɔ ɖò tɛntin yetɔn. Tɛnmɛ e ɖò kan lɛ tɛntin é nɔ ɖò gblogbló d’eji wɛ ɖò atín sínsɛ́n ɔ xomɛ, bɔ jɔhɔn, alǒ sin nɔ gɔ́ ye mɛ. Enyi atín sínsɛ́n ɔ j’ayǐ jɛ kɔ́mɛ ɔ, sin e ɖò kan lɛ tɛntin é nɔ wà nǔ cifɔ́ɔn ɖɔhun. Akpa Pomélo ɔ tɔn nɔ wán bo nɔ syɛn, bɔ enɛ nɔ zɔ́n b’ɛ nɔ gbà ǎ.

Nǔnywɛ xwitixwitizɔ́watɔ́ lɛ kpɔ́n dó lee akpa Pomélo tɔn cí é wu bo ɖò nǔ sɔ́ nú cifɔ́ɔn gannɔ ɖaxó e na j’ayǐ bo na gbà ǎ é ɖé wɛ. Ye lin ɖɔ emi sixu xwedó lee akpa Pomélo tɔn cí é bo bló kási lɛ, gan e nɔ nɔ mɔ̌to lɛ sín nukɔn kpo gudo yetɔn kpo bo nɔ cyɔn alɔ ye jí lɛ é, kpodo nǔ e nɔ cyɔn alɔ mɔ e è nɔ sɔ́ ɖó gblolo mɛ b’ɛ nɔ nyí station spatiale é jí é kpo.

Etɛ a ka lin? Nǔwukpíkpé e klé alɔkpa e nɔ nyí pomélo é sín akpa ɖó bo ma nɔ gbà ǎ é jɔ nú éɖée wɛ à, alǒ dǎ wɛ è dá?