É ka nyɔ́ bló ɖɔ tuto akwɛ́ mimɔ tɔn e sɔgbe é ɖé ní tíin a?
Ðo to gěgé mɛ ɔ, mɛ lɛ́ nɔ ɖi nǔvɛ́mɛwúzɔnlin ɖo ali lɛ́ jí, ɖó yě nɔ mɔ ɖɔ tuto akwɛ́ mimɔ tɔn ɔ kún sɔgbe ó. Jɛmɛjí Covid-19 tɔn ɔ lɛ́ zɔ́n bɔ ninɔmɛ ɔ nylá d’é jí. É zɔ́n bɔ ninɔmɛ e mɛ mɛ lɛ́ ɖe é sɔ́ nyɔ́ nukún yětɔn mɛ ǎ, ɖó xɔ mɛ e yě ɖe bó má sɔ́ nɔ tɔ́n ǎ é, nǔɖuɖuhwedómɛ kpó nukúnkpédómɛwú ɖo dotóoxwé linu e ɖó dogbó, bó xlɛ́ vogbingbɔn ɖaxó e ɖo dɔkunnɔ kpó wamamɔnɔ kpó tɛ́ntin é céɖécéɖé é wútu.
Akwɛ́yózo e blá ta nú gbɛ ɔ bǐ é ka ná wá vivɔnu gbe ɖokpó a? Ganjí. Biblu tínmɛ nǔ e Mawu ná wa, dó ɖe ɖɛ tagba mǐtɔn lɛ́ é.
Akwɛ́yózo ɖěɖěe Mawu ná ɖe ɖɛ lɛ́ é
Tagba: Gbɛtɔ́ lɛ́ ko sɔ́ nǔ nú tuto akwɛ́ mimɔ tɔn e nɔ sú nǔ e hudó gbɛtɔ́ lɛ́ bǐ é sín do é ǎ.
Lěe è ná ɖe ɖɛ gbɔn é: Mawu ná sɔ́ acɛkpikpa tɔn dó ɖyɔ́ gbɛtɔ́ lɛ́ tɔn ná; acɛkpikpa énɛ́ wɛ è nɔ ylɔ́ ɖɔ Axɔ́súɖuto Mawu tɔn. É ná kp’acɛ sín jǐxwé dó ayǐkúngban ɔ bǐ jí.—Daniyɛ́li 2:44; Matíe 6:10.
Nǔ e mɛ é ná tɔ́n kɔ dó é: Ðó Axɔ́súɖuto Mawu tɔn ná kp’acɛ dó ayǐkúngban ɔ blěbú jí wútu ɔ, é ná bló tuto nú nǔ e ɖo ayǐkúngban jí lɛ́ é ganjí, bɔ nǔ bǐ ná vɔ ɖ’é wú. Gbɛtɔ́ lɛ́ sɔ́ ná nyí wamamɔnɔ kpɔ́n ǎ, yě ka sɔ́ ná ɖo adohu adohu jí, ɖɔ émí ka ná mɔ nǔ e sín hudó émí ɖó bó ná nɔ gbɛ é a jí ǎ. (Ðɛhan 9:8-10, 19) É nyɔ́ wa ɔ, yě ná ɖu nǔ e mɛ azɔ̌ yětɔn tɔ́n kɔ dó lɛ́ é sín vǐví, bó ná lɛ́ ɖu gbɛzán e nɔ ná sínsɛ́n, bó lɛ́ jɛmɛ nú mɛ é ɖé sín vǐví xá xwédo yětɔn lɛ́. Biblu d’akpá ɖɔ: “Yě ná sá xwé bó nɔ ɛ mɛ. Yě ná tun vǐwun bó ná ɖu sínsɛ́n tɔn. Yě sɔ́ ná sá xwé ɖě, bɔ mɛ ɖěvo ná nɔ mɛ ǎ; yě ka sɔ́ ná tun vǐwun ɖě, bɔ mɛ ɖěvo ná wá ɖu sínsɛ́n tɔn ǎ.”—Ezayíi 65:21, 22.
Tagba: Gbɛtɔ́ lɛ́ sixú nyi alɔ nú ninɔmɛ e nɔ zɔ́n bɔ yě nɔ ji ya, bó nɔ zɔ́n bɔ yě nɔ ba nǔ e sín hudó yě ɖó lɛ́ é kpo é ǎ.
Lěe è ná ɖe ɖɛ gbɔn é: Mawu ná gbɔn Axɔ́súɖuto tɔn gblamɛ, bó ná ɖe nǔ e nɔ zɔ́n bɔ xɛsi nɔ ɖi gbɛtɔ́ lɛ́, bɔ yě nɔ lɛ́ mɔ ɖɔ émí kún ɖo ayijayǐ mɛ ó lɛ́ é bǐ síin.
Nǔ e mɛ é ná tɔ́n kɔ dó é: Hwenu e Mawu ná ɖo nukún kpé dó gbɛtɔ́ lɛ́ wú wɛ é ɔ, yě sɔ́ ná mɔ nǔ e nɔ zɔ́n bɔ yě kpó xwédo yětɔn lɛ́ kpó nɔ hɛn nǔ e sín hudó yě ɖó bó ná nɔ gbɛ lɛ́ é bú é ɖěbǔ ǎ. Ði kpɔ́ndéwú ɔ, ahwan, nǔɖuɖuhwedómɛ, kpó jɛmɛjí kpó ɖě sɔ́ ná tíin gbeɖé ǎ. (Ðɛhan 46:10; 72:16; Ezayíi 33:24) Mawu ɖɔ: “Togun Mawu tɔn ná mɔ fífá; é ná vo, é sɔ́ ná nɔ lin nǔɖé ǎ.”—Ezayíi 32:18.
Tagba: Hwɛhwɛ ɔ, gbɛtɔ́ cejɛ́nnábínɔ kpó nukúnkɛnnɔ kpó lɛ́ nɔ xo dǎká mɛ ɖěvo lɛ́ wú.
Lěe è ná ɖe ɖɛ gbɔn é: Toví Axɔ́súɖuto Mawu tɔn tɔn lɛ́ ná kplɔ́n bó ná nɔ ɖe xlɛ́ ɖɔ yě yí wǎn nú mɛ ɖěvo lɛ́ hú gǎn yěɖésúnɔ.—Matíe 22:37-39.
Nǔ e mɛ é ná tɔ́n kɔ dó é: Ðo Axɔ́súɖuto Mawu tɔn glɔ́ ɔ, mɛ lɛ́ bǐ ná nɔ yí wǎn nú mɛ Mawu ɖɔhun. Wǎnyíyí Mawu tɔn “nɔ ba ɖɔ émíɖokpónɔ géé tɔn jɛ́n ná nyɔ́ ǎ.” (1 Kɔlɛ́ntinu lɛ́ 13:4, 5) Biblu ɖɔ: “È ná wa nǔ nyanya ɖěbǔ ǎ, è ná hɛn nǔ ɖěbǔ gblé ɖo só mímɛ́ tɔn jí ǎ, ɖó Mawu Mavɔmavɔ tuuntuun ná gɔ́ to ɔ, lěe sin gɔ́ xuzan jí é ɖɔhun.”—Ezayíi 11:9.
Biblu xlɛ́ ɖɔ mǐ ɖo gbɛ nɔ wɛ ɖo azǎn gǔdo gúdo tɔn gbɛ élɔ́ tɔn lɛ́ mɛ, bɔ zaanɖé din ɔ, Mawu ná ɖe akpá e é dó, bó ná ɖó nǔ akwɛ́yózo lɛ́ bǐ nu é. a (Ðɛhan 12:6) Amɔ̌, din hwɛ̌ ɔ, nǔgbódodó Biblu tɔn lɛ́ sixú d’alɔ we bɔ a ná ɖí xwi xá akwɛ́yózo e mɛ a ɖe din é. Ði kpɔ́ndéwú ɔ, kpɔ́n xóta “Lěe è sixú nɔ gbɛ hwenu e è ma ɖó akwɛ́ káká ɖé ǎ é gbɔn é” kpó “L’argent et vous” kpó.
a Nú a jló ná tuun nǔ e wú a sixú ɖeji dó Biblu wú é hǔn, kpɔ́n xóta “Biblu: Jɔtɛn nǔgbó tɔn ɖejidéwú ɖé.”
Xóta élɔ́ lɛ́ lɔ sixú jɛjí nú we
ATƆXWƐ
Etɛ lɛ Axɔ́suɖuto Mawu Tɔn ka Na Wà?
Jezu tuùn ɖɔ Axɔ́suɖuto Mawu tɔn wɛ nyí acɛkpikpa ɖokpo géé e sixu ɖeɖɛ tagba lɛ ɖò ayikúngban jí é. Etɛ lɛ Axɔ́suɖuto enɛ ka ko bló bonu mǐ na ɖó jiɖiɖe?
