Wěma nukɔntɔn e è wlán sɛ́dó Kɔlɛ́ntinu lɛ́ é 12:1-31
12 Din ɔ, nɔví lɛ́ mi, un jló ɖɔ mi ní nɔ vi mɛ dó nǔníná gbigbɔ tɔn lɛ́ wú ǎ.
2 Mi tuun ɖɔ hwenu e mi nyí nǔmaɖitɔ́ é ɔ, è nɔ dó jɔ nú mi, bo nɔ dɔn mi bú yi bǒcyɔ énɛ́ lɛ́ e ma sixú ɖɔ xó ǎ é kɔn, bɔ mi nɔ xwedó yě yi fí ɖěbǔ e yě dɔn mi yi é.
3 Din ɔ, un jló ɖɔ mi ní tuun ɖɔ mɛ ɖěbǔ kún ná ɖo xó ɖɔ wɛ gbɔn gbigbɔ Mawu tɔn gblamɛ bo ná ɖɔ: “Heelú we Jezu!” ó; mɔ̌ jɛ́n mɛ ɖěbǔ ma sixú ɖɔ: “Jezu nyí Aklúnɔ!” gbigbɔ mímɛ́ ɔ mɛvo ǎ gbɔn é nɛ́.
4 Nǔníná vovo wɛ tíin, amɔ̌, gbigbɔ ɖokpó wɛ ɖe;
5 sinsɛnzɔ́ vovo wɛ tíin, é ɖo mɔ̌ có, Aklúnɔ ɖokpó wɛ ɖe;
6 azɔ̌* vovo wɛ tíin, é ɖo mɔ̌ có, Mawu ɖokpó wɛ nɔ bló bɔ mɛ bǐ nɔ wa azɔ̌ énɛ́ lɛ́ bǐ.
7 Mawu nɔ ɖe gbigbɔ tɔn xlɛ́ gbɔn mɛ ɖokpó ɖokpó jí nú le mɛ bǐ tɔn.
8 Ðó è nɔ sɔ́ nǔnywɛ́ sín xó* dó nu nú mɛ ɖě gbɔn gbigbɔ ɔ gblamɛ, bo nɔ sɔ́ nǔtuuntuun sín xó dó nu nú mɛ ɖěvo gbɔn gbigbɔ ɖokpó ɔ gblamɛ.
9 È nɔ ná nǔɖiɖi mɛ ɖěvo gbɔn gbigbɔ ɖokpó ɔ gblamɛ, bo nɔ ná nǔníná azɔn gbigbɔ nú mɛ tɔn lɛ́ mɛ ɖěvo gbɔn gbigbɔ ɖokpó énɛ́ gblamɛ.
10 É ɖo mɔ̌ có, è nɔ ná nǔwúkpíkpé mɛ ɖěvo bónú é ná bló nǔjíwǔ lɛ́, è nɔ ná mɛ ɖěvo bónú é ná wa gbeyíɖɔzɔ́, è nɔ ná mɛ ɖěvo bónú é ná mɔ nǔ jɛ wú ɖɔ Mawu gɔ́n wɛ xó lɛ́ nɔ gosín, è nɔ ná mɛ ɖěvo bónú é ná dó gbe vovo lɛ́, bo nɔ ná mɛ ɖěvo bónú é ná tínmɛ gbe.
11 Amɔ̌, gbigbɔ ɖokpó ɔ wɛ nɔ bló nǔ énɛ́ lɛ́ bǐ, bo nɔ ná nǔwúkpíkpé mɛ ɖokpó ɖokpó, lěe é jló è gbɔn é.
12 Ðó lěe agbaza nyí ɖokpó bo ka ɖó wǔjɔnú gěgé, bɔ wǔjɔnú lɛ́ bǐ nyí agbaza énɛ́ tɔn, bɔ yě sukpɔ́ có, yě nyí agbaza ɖokpó gbɔn é ɔ, mɔ̌ wɛ é nyí gbɔn nú Klísu lɔmɔ̌.
13 Ðó gbigbɔ ɖokpó ɔ wɛ è sɔ́ dó bló batɛ́mu nú mǐ bǐ, bónú mǐ ná nyí agbaza ɖokpó; Jwifu oo, Glɛ̌kinu oo, kannumɔ oo, mɛ e ɖo éɖée sí é oo, mǐ bǐ wɛ mɔ gbigbɔ énɛ́ yí.
14 Ðó wǔjɔnú ɖokpó wɛ agbaza nɔ ɖó ǎ, loɔ, wǔjɔnú gěgé wɛ é nɔ ɖó.
15 Ényí afɔ ɖɔ: “Ðó un nyí alɔ ǎ wútu ɔ, un nyí wǔjɔnú agbaza ɔ tɔn ǎ” ɔ, énɛ́ ná zɔ́n bónú é ná gɔn wǔjɔnú agbaza ɔ tɔn nyí ǎ.
16 Gɔ́ ná ɔ, ényí tó ɖɔ: “Ðó un nyí nukún ǎ wútu ɔ, un nyí wǔjɔnú agbaza ɔ tɔn ǎ” ɔ, énɛ́ ná zɔ́n bónú é ná gɔn wǔjɔnú agbaza ɔ tɔn nyí ǎ.
17 Ényí agbaza ɔ blěbú ko nyí nukún wɛ ɔ, nɛ̌ é ka ná nɔ se nǔ gbɔn? Ényí éɖésúnɔ blěbú ko nyí tó wɛ ɔ, nɛ̌ é ka ná nɔ se nǔ wán gbɔn?
18 Amɔ̌, Mawu to wǔjɔnú agbaza ɔ tɔn lɛ́ ɖokpó ɖokpó, lěe é jló è gbɔn é.
19 Ényí wǔjɔnú lɛ́ bǐ ko nyí ɖokpó ɔ wɛ ɔ, nǔ ɖě ka ná nyí agbaza bo ná tíin a?
20 Amɔ̌, wǔjɔnú lɛ́ sukpɔ́ có, agbaza ɖokpó wɛ tíin.
21 Nukún sixú ɖɔ: “Un ɖó hudó towe ǎ” nú alɔ ǎ; mɔ̌ ɖokpó ɔ, ta sixú ɖɔ: “Un ɖó hudó towe ǎ” nú afɔ ǎ.
22 É nyɔ́ wa ɔ, wǔjɔnú agbaza ɔ tɔn ɖěɖěe mǐ nɔ mɔ ɖɔ yě kún ɖó gǎn sɔmɔ̌ ó lɛ́ é ɖo tají.
23 Wǔjɔnú agbaza ɔ tɔn e mǐ nɔ lin ɖɔ yɛ̌yi kún jɛxá sɔmɔ̌ ó lɛ́ é ɔ, mǐ nɔ wlí yɛ̌yi nú yě hú gǎn, mɔ̌ mɛ ɔ, mǐ nɔ lébe nú wǔjɔnú mǐtɔn e ma nɔ dɔn mɛ sɔmɔ̌ ǎ lɛ́ é hú gǎn.
24 Wǔjɔnú mǐtɔn ɖěɖěe nɔ dɔn mɛ lɛ́ é ka nɔ ɖó hudó nǔ ɖě tɔn ǎ. Mawu bló agbaza ɔ gbɔn mɔ̌, bɔ wǔjɔnú ɖěɖěe yɛ̌yi hwedó lɛ́ é ɔ, é wlí yɛ̌yi nú yě hú gǎn,
25 bónú kínklán ɖěbǔ ní ma nɔ agbaza ɔ mɛ ó, é nyɔ́ wa ɔ, wǔjɔnú agbaza ɔ tɔn lɛ́ sín nǔ ní nɔ ɖu ayi mɛ nú yěɖée lɛ́.
26 Ényí wǔjɔnú ɖokpó ɖo wǔvɛ́ se wɛ ɔ, wǔjɔnú ɖě lɛ́ bǐ nɔ se wǔvɛ́ xá ɛ; alǒ nú è xɔ susu nú wǔjɔnú ɖokpó ɔ, wǔjɔnú ɖě lɛ́ bǐ nɔ j’awǎ xá ɛ.
27 Din ɔ, agbaza Klísu tɔn wɛ mi nyí, bɔ mi mɛ ɖokpó ɖokpó nyí wǔjɔnú ɖé.
28 Mawu zɔ́n azɔ̌ mɛ ɖokpó ɖokpó ɖo agun ɔ mɛ: nukɔntɔn, mɛsɛ́dó lɛ́; wegɔ́, gbeyíɖɔ lɛ́; atɔngɔ́, nǔkplɔ́nmɛtɔ́ lɛ́; énɛ́ gúdo ɔ, mɛ e nɔ bló nǔjíwǔ lɛ́ é; mɛ e ɖó nǔníná azɔn gbigbɔ nú mɛ tɔn lɛ́ é; mɛ e nɔ d’alɔ mɛ ɖěvo lɛ́ é; mɛ e ɖó nǔwúkpíkpé bo nɔ xlɛ́ ali mɛ lɛ́ é; mɛ e nɔ dó gbe vovo lɛ́ é.
29 Mɛ bǐ nyí mɛsɛ́dó ǎ, kabǐ? Mɛ bǐ nyí gbeyíɖɔ ǎ, kabǐ? Mɛ bǐ nyí nǔkplɔ́nmɛtɔ́ ǎ, kabǐ? Mɛ bǐ nɔ bló nǔjíwǔ ǎ, kabǐ?
30 Mɛ bǐ ɖó nǔníná azɔn gbigbɔ nú mɛ tɔn lɛ́ ǎ, kabǐ? Mɛ bǐ nɔ ɖɔ xó dó gbe vovo lɛ́ mɛ ǎ, kabǐ? Mɛ bǐ nɔ tínmɛ gbe ǎ, kabǐ?
31 Amɔ̌, mi ní nɔ ɖo gǎn dó wɛ bá mɔ nǔníná e ɖo tají hú gǎn lɛ́ é yí. É ɖo mɔ̌ có, un ná xlɛ́ ali e nyɔ́ hú bǐ é mi.
