A KA ÐÓ GBETA ÐÉ KƆN BO NA WÁ DÓ LEE SƆGUDO TOWE NA CÍ É WU WƐ À? Mɛɖé lɛ lin ɖɔ byɔ̌wa sín xó wɛ, é kún nyí gbeta mɛɖesunɔ tɔn wɛ nɔ ɖɔ lee gbɛ̀ mɛtɔn na cí é ó. Enyi ye ma kpé nǔ e gbé nya wɛ ye ɖè é ɖé lɛ wu ǎ ɔ, ye nɔ gbɔ bo ɖɔ kpowun ɖɔ gbɛ̀ wɛ tò nyì mɔ̌. Ye nɔ ɖɔ ɖɔ è ko wlan dó emi jí ɖɔ “emi kún na kpé nǔ e gbé nya wɛ emi ɖè é wu gbeɖé ó!”

Nú mɛ ɖevo lɛ ma mɔ ali e ye na gbɔn bo gán ɖò gbɛ̀ elɔ e mɛ mǐ ɖè, bɔ nǔ nyanya kpo nǔagɔwiwa kpo ɖè lɛ é ǎ ɔ, ye nɔ flú bǐ. Ye sixu ko tɛ́n kpɔ́n bá jla gbɛ̀ yeɖesunɔ tɔn ɖó, b’ɛ ka nɔ sín nǔ e ye nɔ mɔ lɛ é ɖi ahwan, adakaxixo, adla j’ayǐ lɛ, kpo azɔn e nɔ d’avaja tuto yetɔn lɛ mɛ hwɛhwɛ lɛ é kpo wu kpowun b’ɛ nɔ gló. Ye nɔ kanbyɔ yeɖée ɖɔ, ‘Etɛwu un ka ɖò tagba jɛ wɛ?’

Nugbǒ wɛ ɖɔ ninɔmɛ gbɛmɛ tɔn lɛ sixu wá d’avaja tito towe lɛ mɛ tawun. (Nùnywɛtɔ́xó 9:11) É ɖò mɔ̌ có, a ɖó na wá gbeta taji ɖé kɔn dó sɔgudo towe mavɔmavɔ ɔ wu. Nugbǒ ɔ, Biblu ɖexlɛ́ ɖɔ sɔgudo towe kúnkplá gbeta e kɔn a na wá é. Lin tamɛ kpɔ́n dó nǔ e é ɖɔ é jí.

Mɔyizi e xlɛ́ ali akɔta Izlayɛli hwexónu tɔn é ɖɔ nú ye hwenu e ye xwè Akpádídó Yikúngban ɔ jí é ɖò Jehovah nyikɔ mɛ ɖɔ: “Un sɔ́ kú kpo gbɛ̀ kpo ɖó nukɔn mitɔn; nudómɛ kpo ɖɛxodómɛji kpo ɖó nukɔn mitɔn. Dìn ɔ, mi sɔ́ gbɛ̀ ɔ, bonu mi kpo vǐ mitɔn lɛ kpo na nɔ gbɛ̀, bo na yí wǎn nú Mawu Mavɔmavɔ, Mawu mitɔn, bo na nɔ sè xó tɔn, bo na nɔ gbeji n’i [alǒ tɛ́ dó wutu tɔn].”​—Sɛ́nflínmɛ 30:15, 19, 20.

“Un sɔ́ kú kpo gbɛ̀ kpo ɖó nukɔn mitɔn; nudómɛ kpo ɖɛxodómɛji kpo ɖó nukɔn mitɔn. Dìn ɔ, mi sɔ́ gbɛ̀ ɔ.”​—Sɛ́nflínmɛ 30:19

Nugbǒ ɔ, Mawu hwlɛn Izlayɛli-ví lɛ sín kannumɔgbenu ɖò Ejipu, bo sɔ́ vivo kpo awǎjijɛ kpo sín gbɛ̀ ɖò Akpádídó Yikúngban ɔ jí sín nukúnɖiɖo ɖó te nú ye. Amɔ̌, nǔ enɛ lɛ bǐ na jɛnu dó ye wu kpowun ǎ. Enyi ye na mɔ nyɔna enɛ lɛ ɔ, ye ɖó na “sɔ́ gbɛ̀.” Gbɔn nɛ̌ é? ‘Gbɔn wǎn yí nú Mawu, xó tɔn sísé, kpo títɛ́ dó wǔtu tɔn kpo gblamɛ.’

Égbé ɔ, gbeta mɔhun ɖò nukɔn nú hwi lɔ, bɔ ee kɔn a wà é wɛ na ɖè lee sɔgudo towe na cí é xlɛ́. Enyi a nɔ yí wǎn nú Mawu, nɔ setónú nú gbè tɔn, bo nɔ lɛ́ tɛ́ dó wǔ tɔn ɔ, é ɖò wɛn ɖɔ a na nɔ gbɛ̀ kaka sɔyi ɖò palaɖisi mɛ ɖò ayikúngban jí. Amɔ̌, etɛ nǔ enɛ lɛ ɖokpo ɖokpo ka byɔ?

Wanyiyi wɛ nyí jijɔ Mawu tɔn nukɔntɔn ɔ. “Mawu ɔ, wanyiyi wɛ é nyí” wɛ Mawu sɔ́ d’ayi mɛ nú mɛsɛ́dó Jaan bɔ é wlan. (1 Jaan 4:8) Enɛ wu ɔ, hwenu e è kàn sɛ́n e ɖò taji hú sɛ́n lɛ bǐ é byɔ Jezu é ɔ, é ɖɔ: “A na yí wǎn nú Aklunɔ Mawu towe kpodo ayi towe bǐ kpo, kpodo lindɔ̌n towe bǐ kpo, kpodo linlin towe bǐ kpo.” (Matie 22:37) Kancica ɖagbe ɖé ɖiɖó xá Jehovah Mawu ɖó na jinjɔn tónúsíse nukúnta tɔn jí ǎ, loɔ, wanyiyi jí wɛ é ɖó na jinjɔn. Amɔ̌, etɛwu mǐ ka ɖó na yí wǎn n’i?

Wǎn e Jehovah yí nú gbɛtɔ́ lɛ é cí wǎn e mɛjitɔ́ lɛ nɔ yí nú vǐ yetɔn lɛ é ɖɔhun. Mɛjitɔ́ wanyiyinɔ lɛ nyí hwɛhutɔ́ có, ye ka nɔ kplɔ́n vǐ yetɔn lɛ, nɔ dó wusyɛn lanmɛ nú ye, nɔ nɔ gudo nú ye bo nɔ lɛ́ gbɛ́ nǔ nú ye, ɖó ye jló ɖɔ vǐ lɛ ni ɖó awǎjijɛ bo lɛ́ yì nukɔn wutu. Etɛ mɛjitɔ́ lɛ ka nɔ ba ɖò vǐ lɛ sí? Ye nɔ jló ɖɔ vǐ yetɔn lɛ ni yí wǎn nú emi, bo nɔ wlí tó nǔ e ye kplɔ́n ye lɛ é wu nú ɖagbe yetɔn. Ba e Tɔ́ mǐtɔn jixwé tɔn ɔ nɔ ba ɖɔ nǔ tobutobu e é nɔ wá nú mǐ lɛ é ni nɔ sù nukún mǐtɔn mɛ lɛ é sɔgbe à cé?

Ðò gbè dòdó e mɛ è wlan Biblu ɔ dó é mɛ ɔ, xógbe “ɖǒtó” ɔ nɔ lɛ́ dó gesí “tónúsíse” hwɛhwɛ. Nǔ e ɖɔ wɛ è ɖè bo ɖɔ ɖɔ vǐ ɖé ɖó na “ɖótó mɛjitɔ́ tɔn lɛ é nɛ.” Enɛ wu ɔ, tó ɖiɖó gbè Mawu tɔn nɔ byɔ nùkplɔnkplɔn kpo tónúsíse nú nǔ e é ɖɔ lɛ é kpo. Mǐ sixu sè gbè Mawu tɔn tlɔlɔ ǎ có, mǐ ka nɔ ɖótó è gbɔn Xó tɔn Biblu ɔ xixa kpo nǔ e ɖ’emɛ lɛ é zinzan kpo gblamɛ.​—1 Jaan 5:3.

Bo na dó xlɛ́ lee tó ɖiɖó gbè Mawu tɔn nyí nǔ taji sɔ́ é ɔ, Jezu ɖɔ ɖò ninɔmɛ ɖokpo mɛ ɖɔ: “Nùɖuɖu kɛɖɛ wɛ gbɛtɔ́ nɔ ɖu bo nɔ nɔ gbɛ̀ ǎ; loɔ, xó e ko tɔ́n sín Mawu nu mɛ ɔ bǐ wɛ nɔ hɛn mɛ ɖó gbɛ̀.” (Matie 4:4) Lee nùɖuɖu agbaza tɔn ɖò taji nú mǐ sɔ́ é ɖɔhun ɔ, nǔ tuùntuùn dó Mawu wu tlɛ lɛ́ ɖò taji hú mɔ̌. Etɛwu? Axɔsu nùnywɛtɔ́ Salomɔ́ɔ tinmɛ ɖɔ: “Nùnywɛ nɔ nya xɛ ɖò mɛ jí lee akwɛ nɔ nya xɛ ɖò mɛ jí é ɖɔhun, loɔ, nǔ e nùnywɛ ɔ ɖó hú akwɛ é wɛ nyí mɛ e ɖó nùnywɛ ɔ nɔ nɔ gbɛ̀.” (Nùnywɛtɔ́xó 7:12) Nùtuùntuùn kpo nùnywɛ e gosin Mawu gɔ́n é kpo sixu cyɔn alɔ mǐ jí égbé, bo d’alɔ mǐ bɔ mǐ na wá gbeta e nùnywɛ kpé bo na zɔ́n bɔ mǐ na mɔ gbɛ̀ mavɔmavɔ ɖò sɔgudo é kɔn.

Lɛ̌ flín nǔ e Jezu ɖɔ ɖò nùjlɛdonǔwu tɔn e jí mǐ ɖɔ xó dó ɖò xota e wá yì é mɛ é, é ɖɔ: “Hɔn e nu è nɔ gbɔn, bo nɔ yì gbɛ̀ mavɔmavɔ mɛ ɔ hwe, bɔ ali e è nɔ gbɔn yì ɔ sobwé, bo vɛ́ gbɔn, bɔ mɛ kpɛɖé jɛn nɔ ba mɔ.” (Matie 7:13, 14) Enyi mǐ na ɖi zɔnlin ɖò ali mɔhun jí, bo na nɔ jí bo mɔ gbɛ̀ mavɔmavɔ ɔ, é ɖò wɛn ɖɔ mǐ ɖó na sɛkpɔ alixlɛ́mɛtɔ́ e tuùn azɔ̌ ganji é ɖé. Enɛ wu ɔ, é sɔgbe ɖɔ mǐ ni sɛkpɔ Mawu ganji. (Ðɛhan 16:8) É ɖò mɔ̌ có, nɛ̌ mǐ ka na wà mɔ̌ gbɔn?

Ayihɔngbe ayihɔngbe ɔ, nǔ gègě nɔ ɖè bɔ mǐ ɖó na bló, bɔ wɔbuwɔbu ɖevo lɛ nɔ tíìn bɔ mǐ nɔ jló na bló. Nǔ mɔhun lɛ sixu ján tɛn nú mǐ alǒ fɛ́ ayi mǐtɔn kaka bɔ mǐ sɔ́ na mɔ hwenu kaka ɖé, alǒ ɖebǔ bo na lin tamɛ kpɔ́n dó nǔ e Mawu jló ɖɔ mǐ ni wà lɛ é jí ǎ. Enɛ wɛ zɔ́n bɔ Biblu flín mǐ ɖɔ: “Hǔn mi bo cɔ́ miɖée ganji dó gbɛ̀ e zán wɛ mi ɖè ɔ wu. Mi ma zán gbɛ̀ mitɔn xlonɔ ɖɔhun ó; loɔ, mi zán gbɛ̀ mitɔn nùnywɛtɔ́ ɖɔhun. Mi hwlɛndo hwenu lɛ, bo wà nǔ; ɖó hwenu e mǐ ɖè ɔ nyɔ́ ǎ.” (Efɛzinu lɛ 5:15, 16) Enyi mǐ nɔ sɔ́ kancica e ɖò mǐ kpo Mawu kpo tɛntin é dó ylɔ ɖɔ nùjɔnǔ ɖò gbɛzán mǐtɔn mɛ ɔ, mǐ na sɛkpɔ ɛ ganji.​—Matie 6:33.

Nǔ ɖebǔ sɔ́ ɖè bɔ a sixu wà dó huzu nǔ e a ko wà wá yì lɛ é ǎ có, nùɖé lɛ ɖè bɔ a sixu wà bonu hwi kpo mɛvívɛ́ towe lɛ kpo na ɖó sɔgudo ɖagbe ɖé. Biblu ɖexlɛ́ ɖɔ Tɔ́ mǐtɔn jixwé tɔn Jehovah Mawu yí wǎn nú mǐ tawun, enɛ wu ɔ, é bló bɔ mǐ tuùn nǔ e é bá ɖɔ mǐ ni wà lɛ é. Ð’ayi xó e gbeyiɖɔ Micée ɖɔ lɛ é wu:

“Hwi gbɛtɔ́, Mawu xlɛ́ we nǔ e nyɔ́ bɔ a ɖó na wà é. Etɛ wɛ Mawu Mavɔmavɔ jló ɖɔ a ni wà? Nǔ e é jló ɖɔ a ni wà kpowun ɔ wɛ nyí ɖɔ a ni nɔ wà nǔ jlɔjlɔ. A na nɔ yí wǎn nú nǔwiwa kpo xomɛnyínyɔ́ kpo, bo na nɔ zán gbɛ̀ ɖò mɛɖesɔhwe mɛ ɖò Mawu towe nukɔn.”​—Micée 6:8.

A ka na yí gbè nú ylɔ̌ Jehovah tɔn bo na ɖi zɔnlin xá ɛ bo na mɔ nyɔna mavɔmavɔ ɖěɖee é sɛ̀ xwè nú mɛ ɖěɖee sɔ ylɔ̌ tɔn lɛ é à? É kpó ɖò así we!