XÓTA e wá yì lɛ é xlɛ́ lee adǎngbomɛ lɛ sixu zɔ́n bɔ gbɛ̀ ninɔ vɛwǔ gbɔn é. Hwenu e a ɖò wuvɛ̌ mɛ gbɔn wɛ é ɔ, a sixu nɔ kanbyɔ hwiɖée ɖɔ gbɛ̀ ɔ, nɔ jɛn è ka na nɔ mɛ à, alǒ mɛɖé ka ɖò towe ɖɔ wɛ à jí. Ðeji ɖɔ Mawu nɔ mɔ nǔ jɛ wuvɛ̌ towe lɛ wu. A xɔ akwɛ n’i.

Mɛ e wlan Ðɛhan 86gɔ́ ɔ é ɖɔ ɖɔ emi ɖeji dó Mawu wu bo ɖɔ: “Adǎn gbò mì ɔ, hwi wɛ un nɔ ylɔ́, ɖó a nɔ yí ɖɛ ce.” (Ðɛhan 86:7) É ɖò mɔ̌ có, a sixu nɔ kanbyɔ hwiɖée ɖɔ, ‘Nɛ̌ Mawu ka na yí ɖɛ ce hwenu e “adǎn gbò mì” é gbɔn?’

Nǔgbo wɛ ɖɔ Mawu sixu nɔ ma ɖè tagba towe lɛ síìn tlolo, amɔ̌, Xó tɔn Biblu ɔ na ganjɛwu we ɖɔ é na na we fífá ayi mɛ tɔn bɔ a na dɛ: “Ado ma hu mi dó nǔ ɖebǔ wu ó; loɔ, mi ɖò ninɔmɛ ɖebǔ mɛ hǔn, mi ni nɔ sɔ́ kúdónúmɛ sín ayixa dó xoɖɛ, bo byɔ nǔ e hudo mi lɛ Mawu. Enɛ ɔ, fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ na bló ayixa mitɔn kpodo linlin mitɔn lɛ kpo ɖó.” (Filipunu lɛ 4:6, 7) Kɛnklɛn ɖ’ayi lee wemafɔ Biblu tɔn e bɔ d’ewu lɛ é na ganjɛwu mǐ ɖɔ Mawu nɔ kpé nukún dó mǐ wu tawun gbɔn é wu.

‘Mawu nɔ wɔn gboli ɖokpo vɔ́vɔ́ ǎ. Mi xɔ akwɛ hú gboli mɔkpan.’—Luki 12:6, 7.

LIN TAMƐ D’EJI: Xɛ kpɛví kpɛví gboli ɖɔhun lɛ sixu nɔ ma xɔ akwɛ nú mɛ gegě, amɔ̌, Mawu nɔ kpé nukún ye wu. Mawu nɔ ɖ’ayi gboli tíwúntíwún lɛ bǐ wu; ye mɛ ɖokpo ɖokpo wɛ nyí nǔɖogbɛ xɔ akwɛ. Gbɛtɔ́ lɛ xɔ akwɛ nú Mawu hú gboli lɛ flaflá tɔn. Gbɛtɔ́ lɛ wɛ nyí nǔɖiɖó Mawu tɔn e jiwǔ hugǎn ɖò ayikúngban jí lɛ é. É ɖó ye ɖó “akpajlɛ” éɖesunɔ tɔn mɛ, bɔ ye hɛn ɔ, ye na sɔnǔ nú jijɔ tɔn ɖagbeɖagbe lɛ bo lɛ́ ɖè ye xlɛ́.—Bǐbɛ̌mɛ 1:26, 27.

“Mawu mavɔmavɔ, a mɔ nukúnnú jɛ ayi ce mɛ, a tuùn mì bǐ. . . . Un ɖò nǔɖe lin wɛ ɔ, a nɔ ko mɔ . . . Kpɔ́n lee un ɖè é, kpɔ́n nǔ e ɖò gbigbo mì wɛ ɖò ayi mɛ é!”—Ðɛhan 139:1, 2, 23.

LIN TAMƐ D’EJI: Mawu tuùn we ganji. É tuùn lee nǔ nɔ cí nú we ɖò ayi mɛ é kpo linkpɔ́n towe lɛ kpo. Mɛ ɖevo lɛ sixu nɔ ma mɔ nukúnnú jɛ tagba kpo linkpɔ́n towe lɛ kpo mɛ, amɔ̌, Mawu nɔ kpé nukún wǔ we bo lɛ́ jló na d’alɔ we. Enɛ zɔ́n bɔ gbɛ̀ ninɔ xɔ akwɛ tawun!

“Mawu Mavɔmavɔ, ɖǒtó ɖɛ ce, xó e sú wɛ un ɖè ɔ ni hun kaka wá gɔ̌n towe. . . . sè ɖɛ ce, ma lín ó! . . . É na nɔ ɖótó lelenɔ lɛ sín ɖɛ.”—Ðɛhan 102:2, 3, 18.

LIN TAMƐ D’EJI: É cí ɖɔ sín hwenu e wuvɛ̌ mimɔ gbɛtɔ́ tɔn bɛ́ é wɛ Jehovah ko ɖò ɖasin yetɔn yí dó nǔ mɛ wɛ ɖɔhun. (Ðɛhan 56:9) Ðasin towe lɔ ɖ’emɛ. Mawu nɔ flín wuvɛ̌ kpo ɖasin towe lɛ kpo ɖó a xɔ akwɛ n’i.

“Ma ɖò nukún dó gbɛmɛ kpɔ́n wɛ ó, ɖó nyi wɛ nyí Mawu towe. Un na na akɔ́nkpinkpan we; un na gɔ́ alɔ nú we . . . Nyɛ Mawu Mavɔmavɔ ɔ, nyi wɛ . . . ɖò ɖiɖɔ nú we wɛ ɖɔ: ‘Ma ɖi xɛsi ó, un na gɔ́ alɔ nú we.’”—Ezayíi 41:10, 13.

LIN TAMƐ D’EJI: Mawu ɖò gbesisɔmɛ bo na d’alɔ we. Enyi a j’ayǐ ɔ, é na fɔ́n we site.

“Mawu yí wǎn nú gbɛtɔ́ lɛ sɔmɔ̌, bo sɔ́ Vǐɖo-kponɔ tɔn jó, bonu mɛ e na ɖi nǔ n’i lɛ ɖebǔ ma dɔn ó; loɔ, ye bǐ ni mɔ gbɛ̀ mavɔmavɔ.”—Jaan 3:16.

LIN TAMƐ D’EJI: A xɔ akwɛ nú Mawu sɔmɔ̌ bɔ é sɔ́ jlǒ dó sɔ́ Vǐ tɔn Jezu dó savɔ̌ dó ta towe mɛ. Vɔsisa enɛ zɔ́n bɔ a ɖó nukúnɖiɖó bo na nɔ gbɛ̀ kaka sɔyi ɖò awǎjijɛ mɛ. *