Mawu na nǔ bǔnɔ ɖé gbɛtɔ́ lɛ; enɛ wɛ nyí ɖɔ ye hɛn ɔ, ye na ɖɔ xó n’i, bo na ɖɔ lee nǔ cí nú ye é n’i ɖò ɖɛ mɛ. Gbeyiɖɔ Davidi xoɖɛ ɖɔ: “Hwi wɛ nɔ sè ɖɛ, enɛ wu ɔ, gbɛtɔ́ lɛ bǐ na wá gɔ̌n towe.” (Ðɛhan 65:3) Amɔ̌, nɛ̌ mǐ ka sixu xoɖɛ bɔ Mawu na sè, bo na dó nú mǐ gbɔn?

Xógbe hwiɖesunɔ tɔn lɛ zinzan dó xoɖɛ na zɔ́n bɔ a na ɖɔ ‘nǔ e ɖò ayi towe mɛ lɛ bǐ nú Mawu’; enɛ wɛ nyí ɖɔ a na ɖɔ lee nǔ cí nú we nǔgbo nǔgbo é n’i. (Ðɛhan 62:9) Nǔbǐwukpétɔ́ ɔ nɔ yí wǎn nú ɖɛ vívɛ́ e è xò sín ayi mɛ lɛ é.

Mawu ɖó tɛnmɛ nyikɔ gegě có, é lɛ́ ɖó nyikɔ éɖesunɔ tɔn. ‘Nyi wɛ nyí Jehovah; mɔ̌ wɛ nyikɔ ce nyí.’ (Ezayíi 42:8) Nyikɔ Jehovah ɔ tɔ́n ɖò Nǔwlanwlán Mímɛ́ lɛ mɛ azɔn 7 000 mɔ̌. Gbeyiɖɔ gegě zán nyikɔ Mawu ɖesunɔ tɔn dó ɖɔ xó n’i. Ablaxamu ɖɔ: ‘Jehovah, kɛnklɛn un na lɛ́ ɖɔ xó nú we.’ (Bǐbɛ̌mɛ 18:30) Mǐɖesunɔ ɖó na nɔ zán nyikɔ Mawu tɔn Jehovah ɔ, hwenu e mǐ ɖò ɖɛ xò wɛ é.

Mǐ na bo nɔ dó gbè ɖebǔ ɔ, Mawu nɔ mɔ nǔ jɛ linlin mǐtɔn lɛ kpo lee nǔ cí nú mǐ é kpo mɛ. Xó tɔn na mǐ ganjɛwu ɖɔ “Mawu kún nɔ ɖè mɛɖé ɖó vo ɖò mɛɖé mɛ ó. Loɔ, ɖò akɔta ɖebǔ mɛ ɔ, mɛ e nɔ ɖó sísí n’i, bo nɔ xwedó hwɛjijɔ ɔ, mɛ enɛ sín nǔ nɔ nyɔ́ nukún tɔn mɛ.”—Mɛsɛ́dó 10:34, 35.

É ɖò mɔ̌ có, mǐ ɖó na wà nǔ hú ɖɛxixo cobɔ Mawu na kɔn nyɔna dó mǐ jí. Ðò xóta e bɔ d’ewu lɛ é mɛ ɔ, mǐ na gbéjé nǔ e mǐ ɖó na wà lɛ é kpɔ́n.