A ka tuun a?
Étɛ́wú gbe e Jehovah yí bɔ Izlayɛ́li ví lɛ́ ná nɔ ná ɛ xwelé kpó ahwannɛ́ kpó é ka nyí nǔ ɖagbe?
SƆGBE xá nǔ e Sɛ́n ɔ ɖɔ é ɔ, è hɛn ɔ è ná ná xwelé kpó ahwannɛ́ kpó bǐ bɔ è ná dó sá vɔ̌ nú Jehovah. Xɛ we énɛ́ lɛ́ bǐ xó wɛ è nɔ ɖɔ zɛ̌ɛ́n ɖo sɛ́n e kúnkplá vɔ̌sísá lɛ́ é mɛ, bɔ è sixú sɔ́ ɖě dó ɖyɔ́ ɖě. (Lev. 1:14; 12:8; 14:30) Étɛ́wú énɛ́ ka nyí nǔ ɖagbe? Nǔ e wú wɛ é ɖokpó wɛ nyí ɖɔ, xwelé ɔ nɔ tíin hwebǐnu ǎ. Aniwú?
Xwelé
Izlayɛ́li sín xá lɛ́ bǐ mɛ wɛ xwelé lɛ́ nɔ gbɔn ɖo sun e mɛ yǒzo nɔ gbɛ́ ɖe lɛ́ é. Ðo Octobre mɛ tɛgbɛ ɔ, yě nɔ zɔn yi tofɔligbé ɖo to ɖěɖěe mɛ yǒzo ɖe lɛ́ é mɛ, lobo nɔ lɛ́ kɔ wá Izlayɛ́li ɖo Avril mɛ. (Han. 2:11, 12; Jel. 8:7) Énɛ́ ɖo xlɛ́xlɛ́ wɛ ɖɔ ɖo Izlayɛ́li hwexónu tɔn ɔ, é ná vɛ́ wǔ nú Izlayɛ́li ví lɛ́ bɔ yě ná ná xwelé bónú è ná dó sá vɔ̌ ɖo avivɔ hwenu.
Ahwannɛ́ sókan mɛ Tɔn
Ðo alɔ ɖěvo mɛ ɔ, ahwannɛ́ lɛ́ nɔ sɛ tɛn mɔ̌ ǎ, énɛ́ wú ɔ, yě nɔ ɖo Izlayɛ́li hwebǐnu ɖo xwe ɔ mɛ. Gɔ́ ná ɔ, ahwannɛ́ lɛ́ ɔ, xɛ ɖěɖěe nɔ nɔ xwégbe lɛ́ é wɛ nú yě. (Sɔ́ jlɛ́ dó Jaan 2:14, 16 wú.) Sɔgbe xá nǔ e wěma Bible Plants and Animals ɖɔ é ɔ, “gletoxo kpó toxo kpó e ɖo Palestine lɛ́ é bǐ mɛ wɛ è nɔ nyi ahwannɛ́ ɖe. Xwétɔ́ ɖokpó ɖokpó ɖó nǔ e mɛ é ná nyi ahwannɛ́ ɖe é, alǒ nǔɖé ɖo dǒ tɔn wú bɔ xɛ lɛ́ sixú nɔ mɛ.”—Sɔ́ jlɛ́ dó Ezayíi 60:8 wú.
Ahwannɛ́ e ɖo nǔ e mɛ è nɔ nyi ahwannɛ́ ɖe é ɖé mɛ é
Énɛ́ wú ɔ, gbe e Jehovah yí bɔ è ná nɔ xwlé è xɛ ɖěɖěe nɔ tíin ɖo xwe ɔ bǐ mɛ ɖo Izlayɛ́li lɛ́ é xlɛ́ ɖɔ é yí wǎn nú mɛ, bó lɛ́ ɖo jlɛ̌ jí.
