ÐO EBLÉE ɖěɖěe ɖo Akpádídó yíkúngban ɔ jí lɛ́ é gɔ́n ɔ, xwe yɔ̌yɔ́ ɖé nɔ bɛ́ hwenu e è jɛ gle lɛ jí, bo jɛ nǔkún dó jí é; táan énɛ́ sɔgbe xá sunzán septembre alǒ octobre tɔn ɖo égbé.

Mɛ lɛ́ ko zɔn dó lěe sun nɔ wá jǐ gbɔn é wú dó lɛ́n azǎn nabí e sun ɖokpó sixú xɔ é, b’ɛ yi azǎn 29 alǒ 30 mɔ̌. Yě zán hwesivɔ́ dó tuun azǎn nabí e xwe ɖokpó nɔ xɔ é. É ɖo mɔ̌ có, xwe e è zɔn dó sun wú bo lɛ́n é nɔ hwe hú xwe e è zɔn dó hwesivɔ́ wú bo lɛ́n é. Énɛ́ wú ɔ, é byɔ́ ɖɔ yě ní ba wlɛnwín ɖé bo bló bónú ali vovo we énɛ́ lɛ́ e nu yě nɔ lɛ́n azǎn lɛ́ ɖe é ní sɔgbe xá yěɖée. Bo ná dó kpé énɛ́ wú ɔ, yě nɔ gɔ́ azǎn ɖé lɛ́ ná, alǒ sín hweɖénu jɛ hweɖénu ɔ, yě nɔ gɔ́ sunzán ɖokpó ná; é sixú nyí jɛ nukɔn nú bǐbɛ́ xwe ɖěvo tɔn. Wlɛnwín énɛ́ sɔgbe xá sunzánwéma e yě nɔ xwedó dó dó nǔkún, alǒ ya nǔkún é.

Amɔ̌, ɖo Mɔyízi sín hwenu ɔ, Mawu ɖɔ nú togun tɔn ɖɔ xwe sinsɛn tɔn yětɔn ná nɔ bɛ́ ɖo Abíbu, alǒ Nisáan sín sun ɔ mɛ; mars, alǒ avril wɛ é nɔ sɔgbe xá ɖo hwe mǐtɔn nu. (Tín. 12:2; 13:4) È nɔ ɖu xwe ɖokpó ɖo sunzán énɛ́ mɛ, bɔ è nɔ ylɔ́ ɖɔ ɔ́ji yiya sín xwe.—Tín. 23:15, 16.

Akɔwé ɖé ɖɔ ɖɔ é bɔ wǔ tawun bɔ è ná tuun hwenu e è ná gɔ́ sunzán ɖé nú sunzánwéma ɖé é. É lɛ́ ɖɔ gɔ́ ná ɖɔ: “Dǐndínwáyixwe e è ɖó ná ɖu ɖo sunzán Nisáan tɔn sín tɛ́ntin é, énɛ́ wɛ nyí ɖo azǎn 14gɔ́ Nisáan tɔn jí é ɔ, è ɖó ná ɖu ɖo gbadanu ɖo sunzán mars abǐ avril tɔn mɛ, xwe ɖokpó mɛ tɛgbɛ, hwenu e ganxixo nabí e kéze ɔ kpó zǎn ɔ kpó bló é bǐ nyí ɖokpó ɔ é. . . . Nǔgbó ɔ, ényí è ɖó ayi wú ɖo ɖibla yi vivɔnu xwe ɔ tɔn ɖɔ è ná ɖu Dǐndínwáyixwe énɛ́ jɛ nukɔn nú táan e mɛ è ɖó ná ɖu é ɔ, Jwifu lɛ́ nɔ gɔ́ sunzán 13gɔ́ ɔ ná, bɔ sunzán énɛ́ nɔ jɛ nukɔn nú sunzán Nisáan tɔn ɔ.”

Kúnnuɖetɔ́ Jehovah tɔn lɛ́ nɔ zán wlɛnwín énɛ́ hwenu e yě ɖo azǎn e jí è ná ɖu Gbadanu-núɖuɖu Aklúnɔ tɔn, éé è nɔ ɖu ɖo sunzán mars, alǒ avril tɔn mɛ, b’ɛ sɔgbe xá azǎn 14gɔ́ Nisáan tɔn ɖo sunzánwéma Eblée lɛ́ tɔn mɛ é sɔ́ wɛ é. È nɔ ko ɖɔ azǎn énɛ́ nú agun e gbɔn gbɛ ɔ bǐ mɛ lɛ́ é jɛ nukɔn. *

Amɔ̌, nɛ̌ Eblée lɛ́ ka nɔ tuun hwenu e sun ɖé ná fó é kpó hwenu e sun ɖěvo ná bɛ́ é kpó gbɔn? Égbé ɔ, a sixú kpɔ́n ɖo sunzánwéma tawun ɖé lě, alǒ éé ɖo alǒkan towe jí é jí. Amɔ̌, ɖo Biblu sín táan mɛ ɔ, é bɔ wǔ ɖě sɔmɔ̌ ǎ.

Ðo Sinvɔgbɛ ɔ hwenu ɔ, azǎn 30 wɛ sun lɛ́ nɔ xɔ. (Bǐb. 7:11, 24; 8:3, 4) Nukɔnmɛ ɖo Eblée lɛ́ hwenu ɔ, sunzánwéma ɔ sɔ́ nɔ nyí azǎn 30 ǎ. Sɔgbe xá sunzánwéma Eblée lɛ́ tɔn ɔ, sunzán ɖé nɔ bɛ́ hwenu e sun wá jǐ bɔ è sixú mɔ ganjí é. Sunzán ɖé sixú ko bɛ́ bɔ é ná bló azǎn 29, alǒ 30 mɔ̌ có nǔ nɔ wá nyí mɔ̌.

Ðo ninɔmɛ ɖé mɛ ɔ, Davídi kpó Jonatáan kpó bǐ ɖɔ xó dó bǐbɛ́ sunzán ɖé tɔn wú, bo ɖɔ: “Sɔ wɛ sun yɔ̌yɔ́ ná wá jǐ.” (1 Sam. 20:5, 18 nwt) Énɛ́ wú ɔ, é cí ɖɔ hwe yětɔn nu ɔ, è nɔ ko lɛ́n sunzán lɛ́ jɛ nukɔn. Nɛ̌ Izlayɛ́li ví lɛ́ ka nɔ tuun hwenu e sun yɔ̌yɔ́ ɖé bɛ́ é gbɔn? Xokplé sɛ́n Jwifu lɛ́ tɔn e è dó ɖó nu wú é kpó hwɛndomɛnú yětɔn lɛ́ kpó tɔn e è ylɔ́ ɖɔ Mishnah é ɖɔ nǔɖé lɛ́ nú mǐ dó ali énɛ́ nu. Énɛ́ ɖo xlɛ́xlɛ́ wɛ ɖɔ hwenu e Jwifu lɛ́ lɛ́ kɔ sín kannumɔgbénu ɖo Babilɔ́nu é ɔ, hwɛɖɔxɔsá ɖaxó yětɔn lɔ ɖ’alɔ ɖ’é mɛ. Ðo sunzán tɛ́nwe e mɛ è nɔ ɖu xwe lɛ́ ná é mɛ ɔ, hwɛɖɔxɔsá ɔ nɔ bló kplé ɖé ɖo azǎn 30gɔ́ sunzán ɔ tɔn jí. Súnnu énɛ́ lɛ́ wɛ nɔ ɖɔ hwenu e sunzán e bɔ d’é wú é ná bɛ́ dó é. Bɔ étɛ́ lɛ́ jí wɛ yě ka nɔ zɔn dó?

Súnnu ɖěɖěe è sɔ́ ɖó atɔxwɛ jí lɛ́ lɛ̌ dó Jeluzalɛ́mu lɛ́ é nɔ kpɔ́n aga zǎnmɛ, bá mɔ tɛn dó tuun hwenu e sun yɔ̌yɔ́ ɔ tɔ́n tlóló é. Nú yě mɔ ɔ, yě nɔ hwlɛndó bo nɔ yi ɖɔ nú Hwɛɖɔxɔsá ɖaxó Jwifu lɛ́ tɔn. Ényí súnnu ɖěɖěe ɖo hwɛɖɔxɔsá énɛ́ lɛ́ é ɖ’ayi wú ɖɔ kúnnuɖenú gěgé xlɛ́ ɖɔ sun yɔ̌yɔ́ ɔ ko wá jǐ ɔ, yě nɔ ɖó gbe ɖɔ sun yɔ̌yɔ́ ɖé bɛ́. Amɔ̌, é ka sín dó akpɔ́kpɔ́,  alǒ amǔ wú bónú zǎncɔ́tɔ́ lɛ́ ma kpé wú bo mɔ sun yɔ̌yɔ́ ɔ ǎ ɔ ka lo? Ényí nǔ mɔ̌hun jɛ ɔ, è nɔ ɖɔ ɖɔ sunzán e ɖo yiyi wɛ é ɔ, azǎn 30 wɛ é ɖó, bɔ ayǐhɔ́ngbe tɔn ɔ, sunzán yɔ̌yɔ́ ɖěvo nɔ bɛ́.

Bo ná dó ɖɔ ɖɔ sunzán yɔ̌yɔ́ ɖé bɛ́ ɔ, è nɔ tá myɔ ɖó Olívutín só e ɖo malínmálín dó Jeluzalɛ́mu é jí. È nɔ lɛ́ tá myɔ ɖó kpe ɖěɖěe è mɛ bɔ yě yi jǐ tawun ɖo Izlayɛ́li toxo ɔ bǐ mɛ lɛ́ é jí, bo ná dó bló bɔ wɛn ɔ ná gba kpé. Hwenu ɖo yiyi wɛ é ɔ, mɛ lɛ́ wɛ è nɔ sɛ́dó bɔ yě nɔ yi jlá. Mɔ̌ mɛ ɔ, è nɔ bló bɔ Jwifu ɖěɖěe ɖo Jeluzalɛ́mu kpó fí ɖěvo lɛ́ kpó é, nɔ tuun ɖɔ sun yɔ̌yɔ́ ɖé bɛ́. Énɛ́ ɔ, yě bǐ sixú ɖu xwe e è nɔ ɖu ɖo táan vovo mɛ ɖo xwe ɔ mɛ lɛ́ é zɛ̌ɛ́n.

Gbǎví e zɔn kpɔ́ xá é sixú d’alɔ we bɔ a ná mɔ nǔ jɛ sun lɛ́, xwe lɛ́ kpó táan lɛ́ kpó mɛ, sɔgbe xá sunzánwéma Eblée lɛ́ tɔn.