Si onon e ɓeyngu mon maa moodi mon fuɗɗike ngurndan mon ɗan, on heɓay satteendi. Ɗun fow yaltitay e miijooji mon ɗin, no wondirton non, e no yiiroton non ngurndan. Maa on heɓay satteendeeji goo iwrayɗi ka yaasi ɗi on miijaaki fii mun.

Wonnde on faaletaake ndaarude ko woni e feƴƴude kon, kono Deftere Allah nden no waajii en yo en wattan yila e satteendeejii men ɗin (Matta 5:23, 24). On waaway heɓude pehe si on huutorike tugaale Deftere Allah nden.

KO DEFTERE ALLAH NDEN WI’I KON : « Saa’i no woodi [...] fii wowlugol » (Waajotooɗo on 3:1, 7, TMN). Waɗee saa’i fii no yewtidon fii satteendeeji mon ɗin. Etee fii no ɓeyngu mon maa moodi mon anndira no wonirɗon e ko miijiɗon fii ko wonɗon yewtude kon. Haalanon ɓeyngu mon maa moodi mon « goonga » saa’i woo saa’i. (Efeesi 4:25.) Hay siɗon monii wonnde, wota on waɗu gere. Jaaboragol e hoore doy haɗay yewtere lannirde gere (Tindi 15:4 ; 26:20, TMN).

Hay si on fottaali, waɗee doy, hara on yejitaali hollugol giggol e teddingol ɓeyngu mon maa moodi mon (Koloosi 4:6). Etee no jittiron satteendeeji ɗin no yaawiri hara on accaali yewtidude (Efeesi 4:26).

KO HAANUƊON KON WAƊUDE :

• Ɗaɓɓee saa’i haanuɗo ka yewton fii anndeeji mon

• Si tawii ko tuuru mon fii jentagol, waɗee feere hara on taƴƴaali mo haala. Onon kadi tuuru mon aray fii haalugol

KO DEFTERE ALLAH NDEN WI’I KON : « Yiɗindiron giggol siɗɗankaaku, mo kala e mon jogitora oya wa burɗo ɗun teddude » (Roomu 12:10). No jentortoɗon non no hitti. Etee no faamiron ɓeyngu mon maa moodi mon e hoore « yurmeende e angal mawnintinaare ». (1 Petruusu 3:8 ; Yaaquuba 1:19.) Wota on faamin hiɗon jentaade. Si no gasa, accitee kala ko waɗoton jentoɗon ɓeyngu mon maa moodi mon, maa hiɗon waawi mo wi’ude ontuma on yewtoyay fii mun. Si on yiirii ɓeyngu mon maa moodi mon wa giɗo mon hara wonaa gaɲo mon, on hawjataa « monagol ». (Waajotooɗo on 7:9, TMN.)

KO HAANUƊON KON WAƊUDE :

• Jentee e hoore ɓernde laaɓunde, hay si tawii ko wonɗon e nanude kon welataa on

• Wonaa ko o haalata kon tun ndaaroton, kono ko ko woni ɓaawo mun kon. On ndaaray kadi no o haalirta non

KO DEFTERE ALLAH NDEN WI’I KON : « Kala golle sattuɗe no wondi e nafa, kono haala melenha adday faale » (Tindi 14:23, TMN). Fottangol huunde moƴƴunde tun yonataa. Hiɗon haani jokkude e hoore ko fottanɗon kon. Gollidugol e wakkilaare no tawaa, kono hino wondi e nafa (Tindi 10:4, TMN). Si on gollidii wa aaden gooto, on heɓay nafa golle mon ɗen (Waajotooɗo on 4:9, TMN).

KO HAANUƊON KON WAƊUDE :

• Mo kala e mon yo ƴettu feere fii jittugol satteendi mon ndin

• Saa’i woo saa’i, ndartee ko wonɗon e waɗude kon si no yaarude yeeso