TOƁƁERE 03
En waaway hoolaade Deftere Alla nden ?
Deftere Alla nden no okki en fodooje buy e waajuuji ɗuuɗuɗi. Haray hiɗon humpaa ko nde jannata kon, kono no gasa hiɗon rentii kadi. On hooloto fodooje e waajuuji ko iwri e nder deftere hinnde ? On waaway hoolaade tigi tigi ko Deftere Alla nden wi’i fii heɓugol ngurndan welɗan hannde e janngo ? Miliyonji yimɓe no hoolii ɗun. Ndaaren si onon kadi on waaway.
1. Ko woni ka nder Deftere Alla kon ko goonga kaa ko taali ?
Deftere Alla nden wi’i hinde mari ‘konnguɗi ɗi goonga winndaaɗi no selliri’ (Waajotooɗo on 12:10). Hinde haali fii ko feƴƴunoo tigi tigi e fii yimɓe wuurunooɓe ɓaawo ɗoo (janngee Luuka 1:3 ; 3:1, 2). Taariikayankeeɓe buy e taskotooɓe batteeji kiɗɗi sellinii ko Deftere Alla nden sifii fii ɲalaaɗe hittuɗe, yimɓe, nokkeeli e ko feƴƴi.
2. Ko fii honɗun wi’anten Deftere Alla nden fuutaali ?
E cenɗe buy, Deftere Alla nden no haali fii piiji ɗi yimɓe anndaano fii mun fewndo ko nde winndaa. E piide misal, hinde haali fii antaaku. Piiji buy ko nde haali hari no yeddondiraa fii mun fewndo ko nde winndaa. Kono, antaaku hannde no sellini wonndema ko Deftere Alla nden haali kon ko ko selli. Ko « tabituɗ[i] haa poomaa e ɓaawo poomaa » (Zabuura 111:8, VPFJ).
3. Fii honɗun hoolantoɗen ko Deftere Alla nden wi’i kon fii ko aroyta ?
Deftere Alla nden no mari hiitanɗe * haaluɗe fii « piiji ɗi waɗaali taho » (Isaaya 46:10). Nde hiitino fii piiji buy hay ko ɓuri e fanɗude ko neeɓi ado yo ɗi waɗude. Hinde sifii kadi ko laaɓi pos ko woni e feƴƴude e nder aduna on hannde. E nder ndee toɓɓere, en taskoto goɗɗe e hiitanɗe Deftere Alla nden. No nde siforii fii mun non ŋalɗinay on !
LUGGINEE
Taskee honno antaaku hannde yaadiri e Deftere Alla nden, e lasindoɗon goɗɗe e hiitanɗe hawniiɗe Deftere Alla nden.
4. Antaaku no yaadi e Deftere Alla nden
Ɓaawo ɗoo, yimɓe buy no hoolinoo leydi ndin no jooɗii e hoore goɗɗun. Fijinee VIDIO on.
Ndaaree ko winndii ka nder deftere annabi Ayyuuba ko yahata gila duuɓi 3 500. Janngee Ayyuuba 26:7 e yewton fii ngal lanndal :
-
Fii honɗun ko winndii kon fii leydi ndin yowaaki « e hoore huunde » no ŋalɗini ?
Ko yahata duuɓi 200 ɓaawo ɗoo hari faamaaka moƴƴa fii no ndiyan saaƴirta. Kono, ndaaree ko Deftere Alla nden wi’i ko yahata gila duuɓi guluuji guluuji. Janngee Ayyuuba 36:27, 28 e yewton fii ɗee lanndaale :
-
Ko honno ko sifaa ɗoo kon fii no ndiyan saaƴirta hawnori ?
-
Aayeeje ɗe jannguɗon ɗoo ɗen tiiɗinii hoolaare mon nden e Deftere Alla nden ?
5. Deftere Alla nden hiitino piiji hittuɗi
Janngee Isaaya 44:27-45:2 e yewton fii ngal lanndal :
-
Ko honɗun Deftere Alla nden hiitinoo ko laaɓi pos duuɓi 200 ado Baabiila lanceede ?
Taariika no holli wonndema Sirus Lanɗo Persi on fooluno saare Baabiila nden e nder hitaande 539 ado saa’i men on. Ɓe selinno maayo hiwunoongo saare nden. Ɓe naatuno saare nden tawi baafe ɗen no udditii, ɓe nanngi nde ɓaawo gere. Hannde, ko ɓuri duuɓi 2 500, Baabiila ko saabeere. Ndaaree ko Deftere Alla nden hiitinoo kon.
Janngee Isaaya 13:19, 20 e yewton fii ngal lanndal :
-
Ko honno ndee hiitannde fii saare Baabiila nden laatori ?
Saare Baabiila nden e nder Irak hannde wontii saabeere.
6. Deftere Alla nden hiitino ko woni e feƴƴude hannde
Deftere Alla nden wi’i hiɗen ka « ɲalaaɗe sakkitore » (2 Timotee 3:1, NWT). Ndaaree ko Deftere Alla nden hiitinoo fii oo saa’i.
Janngee Matta 24:6, 7 e yewton fii ngal lanndal :
-
Ko piiji hittuɗi honɗi Deftere Alla nden haali fii ɲalaaɗe sakkitore ɗen ?
Janngee 2 Timotee 3:1-5 e yewton fii ɗee lanndaale :
-
Ko honno Deftere Alla nden haaliri fii jikkuuji yimɓe buy ka ɲalaaɗe sakkitore ?
-
Ko honɗi e ɗii jikkuuji yi’uɗon ?
WOƁƁE GOO NO WI’A : « Deftere Alla nden ko tinndi e taali. »
-
E miijo mon, ko huunde honnde ɓurnde hittude waɗata hooloɗon Deftere Alla nden ?
RAWNOODE
Taariika, antaaku e hiitanɗe no holli en waaway hoolaade Deftere Alla nden.
Ndartannde
-
Deftere Alla nden ko deftere goonga kaa ko deftere taali ?
-
Ko toɓɓe honɗe antaaku e Deftere Alla nden fottani ?
-
Hiɗon miijii Deftere Alla nden no hiitii fii ko aroyta ? Fii honɗun ?
TASKEE
Deftere Alla nden no wondi e palje antaaku ?
« Antaaku no fotti e Deftere Alla nden ? » (Winndannde ka jw.org)
Ko piiji honɗi yi’eten ka « ɲalaaɗe sakkitore » ?
« Hiitanɗe 6 wonɗe e laataade hannde » (Suudu Aynirdu ndun, 1 mee 2011)
Janngee honno hiitanɗe Deftere Alla nden fii Lamlaamateeri gereeki laatori.
« Konguɗi ɗi annabaaɓe ɓen longinaa ɗin » tiiɗinii en (5:22)
Ndaaree honno hiitanɗe Deftere Alla nden wayliri miijo gorko goo fii Deftere Alla nden.
^ § 9 Hiitanɗe ko nele iwruɗe ka Alla fii ko aroyta.
