Ado annabi Iisaa maayude, o yewtiduno e taalibaaɓe makko nayo — Petruusu, Yaaquuba, Yuuhanna e Andaraawu. Ko o yewtaynoo ɓe fii “ maande aroygol ” makko ka sakkitoonde, o lanndino ɓe : “ Hara ko jiyaaɗo hommbo reeniiɗo holniiɗo woni ko jom mun halfinta neemingol kurkaaɗi mun ɗin e saa’i haanuɗo ? ” (Matta 24:3, 45 ; Markuusa 13:3, 4). Annabi Iisaa fellintinnano taalibaaɓe makko ɓen, o wi’i, o suɓoto woɓɓe e maɓɓe fii jannugol taalibaaɓe makko ɓen ganndal Allah ngal ka lannitoonde aduna. Ko hommbo woni on jiyaaɗo ?

Ko mojobere’hun toɗɗoraaɓe ruuhu Allah on jokkuɓe annabi Iisaa. “ Jiyaaɗo ” on ko nanndo ɓee Hikkiiɓe ka fewjoore Seedeeɓe Yahuwah ɓen. Himo jannude rewooɓe Yahuwah ɓen no haaniri non. Meɗen hoolori oo jiyaaɗo reeniiɗo holniiɗo fii okkugol men ganndal “ e saa’i haanuɗo ”. — Luuka 12:42.

Himo kippi suudu Allah ndun. (1 Timotee 3:15.) Annabi Iisaa halfinno jiyaaɗo on golle tiiɗuɗe fii kippugol rewooɓe Yahuwah ɓen e hoore ndii leydi — wano kippugol jawle, golle fii waajagol e jannde ka mofte. Fii okkugol men jannde haanunde e saa’i haanuɗo ka pottital maa ka mottondiral amen, “ jiyaaɗo reeniiɗo holniiɗo ” on no huutorde defte cewɗe ko men sennditata si meɗen waajaade.

“ Jiyaaɗo on ” no “ holnii ” ɓayri himo ɗoftii ko Deftere Allah nden janni kon e fii waajagol oo kibaaru moƴƴo, e himo “ reenii ” fii golle ko annabi Iisaa halfini mo kon e hoore ndii leydi (Kuuɗe sahaabaaɓe ɓen 10:42). Yahuwah no barkinde golle makko ɗen fii ko o jannata kon no yaarira yeeso. — Isaaya 60:22 ; 65:13, TMN.

• Ko hommbo annabi Iisaa halfini jannugol taalibaaɓe makko ɓen ?

• Ko honno “ jiyaaɗo on ” woniri “ holniiɗo ” e “ reeniiɗo ” ?