Ndaaree kun paykun gorun e oo fotoo. Himo nanndi e huluɗo e wonduɗo e wulaa kaa ? Sifa ɗun hebii on ? — Sifa ɗun heɓay mo kala wonnde. Deftere Allah nden no yewti fii jiyaaɓe Yahuwah wondunooɓe e wulaa e kulol. Goɗɗo e maɓɓe hari ko Eliiya. Etoɗen annden fii makko.

Eliiya ko leydi Isra’iila o wonunoo ko neeɓi ado yo annabi Iisaa heɓeede. Ahab, laaminooɗo Isra’iila hari hinaa o rewoowo Yahuwah Allaahu on. Ahab e ɓeyngu makko Jizabeela, hari ko sanamuru innetenoondu Baal ɓe rewaynoo. Ko ɗun waɗi, yimɓe buy e nder Isra’iila fuɗɗii rewude ndun sanamuru. Ɓeyngu lanɗo on, Jizabeela hari himo hunƴii e himo faalanoo warude rewooɓe Yahuwah ɓen, tentinii Eliiya. Hiɗon anndi honɗun Eliiya waɗi ? —

Eliiya doguno ! O yahuno ka woɗi ka jeereende, o suuɗoyi e nder fammeere.  Ko fii honɗun o waɗani ɗun ? — Ko goonga, hari himo huli. Kono Eliiya haanaano hulude. Fii honɗun ? Ɓayri himo anndunoo Yahuwah wallay mo. Ko feƴƴunoo, Yahuwah holluno mo mbawdi makko ndin. E saa’i goo, hari Yahuwah jaabike toraare Eliiya nden ko o addi yiite iwrunge ka kammu. Ko ɗun holli Yahuwah no waawunoo mo wallude.

Fewndo ko Eliiya wonunoo ka nder fammeere, Yahuwah daalanno mo, o lanndii mo : « Ko honɗun wonuɗaa e waɗude ɗoo ? » Eliiya jaabii : « Ko min tun wonu maa e rewude oo saa’i ɗoo. E miɗo huli fii ta ɓe waran. » Eliiya sikkuno rewooɓe Yahuwah ɓen fow waranooma. Kono Yahuwah daalani mo : « Oo’o, ɗun wonaa goonga. No woodi yimɓe 7 000 wonuɓe lan e rewude haa jooni. Wota hulu. Miɗo maran ma golle ! » Hiɗon sikkude Eliiya weltino nanugol ɗun ? —

Ko honɗun taariika Eliiya on janni on ? — On haanaa wondude e wulaa maa hulon. Hiɗon mari njaatigiiɓe yiɗuɓe Yahuwah e yiɗuɓe on. Kadi, Yahuwah no wondi e mbawdi. Himo waawi on wallude saa’i woo saa’i ! Hiɗon weltii nanugol ɗun ? —